NKB Song Book

NYISHI
KRISTIAN BEMIN

“Kokwso Mw(Jisu) bulv bemin(hymn) bel Olib yornwb lenl uknum”
Mt 26:30 & Mk.14:26

The last thing Jesus did with His deciples is singing a hymn
Mt 26:30 & Mk.14:26

NYISHI
KRISTIAN BEMIN

6th Edition
Reprint and enlarged

“At Swwn nity beminloq ak bijyto, swcw soq mwlwngv At Swwn bemin beto”
Mwwmin Nwwswr 96:1

“Hoolu-luuxy saqnbo mwlwngv At Swwn paqto, At Swwn paqto”
Mwmin Nwwswr 150:6

Published
by

Nyishi Baptist Church Council (NBCC)
MODEL VILLAGE

NAHARLAGUN Post Box – 241
ARUNACHAL PRADESH 791 110

Society Registration
SR/ITA/187/90

NYISHI
KRISTIAN BEMIN

6th Edition
Reprint and enlarged

5000 – copies

All Rights Reserved
by

The Publisher

Swapna Pringting Work (P) LTD.
52 RAJA RAM MOHAN SARANI

KOLKATA – 9 700 009

BETUMCOONAM

Ngoo Pwnbo Abbwn soq Bemin Potagab vigo paqdwn, ngulv Pwnbo Abbwn Rev. Khoda Tana
nvn bon nyin kogab vigo paqdwb nyido, mwam bemin tulungam nookum layil, jobkumlayil hoo
asaq-asaq agum hoqgv dvrwqbo beminam ngulwg Nyishi agumb xeqlin jigumgab vigo paqtju.
Ngoo Rev. Tar Choya, O.T. Translator, NBCC, gab kam Pwnbo Abbwn vigo paqdwn, mwv
sijag bemin pota soqg lvr cwrxiam kadar-kapar kunv mvdar jipan hoo kucuq beminam nookum
layil soq NKB sam beminv vidvb mwbw jipan. Ngoo hvraqb Rev. Ter Tana Tara gab kam
Pwnbo Abbwn vijaqg paqdwn, mwv soq bemin pota tvqpw sam vtwr-anya jaqb lvr cwrxiam
kadar-kaparl mvdar jinum. Hoqlvgab ngoo hvraqb bemin mvlinbo tulugab la nyi asaqg beminam
ngulwg agumb xeqlin jinbo tulugab Pwnbo Abbwn vigo paqyalinco hvl paqdwn. Pwnbo Abb
bulam la bulwg dvpar ngam vigo lvqcy cil svka gvnka.

Ngoo Miujik Tomswrbo, Mizoram Baptist Ywrkum aloq NBCC so haanbo L.H. Lalnghakmawia
gab kam Pwnbo Abbwn ceceqjaqb paqdwn, mwg Yuma-karmab taip palayil hoo aldvb mvdarl
soq bemin pota sam mwg NBCC so vnyww nywnyig bon nyideso mvlin jigumgab, Pwnbo Abbv
mwam la mwg dvpar ngam mwwpa gvnka hoo hvraqb Mwg aljaqnbo dupum-dvrap gob ngul
Arunachal gab mwam vi yayago bon nyin gvnka.

Ngoo Libing Huord Komuniketor-Shillong ngam, otuqg vpy dvb ngulwg Nyishi Kristian Bemin
Pota ngam printing mvlindvb vigo svka ator jilayil mvlin jigumgab Pwnbo Abbwn vigo paqdwn.
Bulwg hvb mvlin jigumgab sool soq bemin pota sam mvlindvb kapapan. Pwnbo Abb bulwg
Jisugab bon nyinammam koi alwb svka ator jig nvka, hoo bulam vi yayago nyob lusaq-lusaq
pengkolo lvqcy baqabo nyi gob mvgnvka.

Soq xinamjaq Nyishi Koog Bemin Pota sam mvlin mvdwb hiv xeq alaq idaql svka jipan, niicwr
cwrxiam hoo dvpar pvrxiam Pwnbo Abb lvqcy gvnka. Hoggab hvb nyiloq si ngulwg Kristian
Miujik gab dvqgwngv hoq lvgab ngulwg Nyishi Litrecar gab kam xinamjaq pota taqgwb
nyidwn.

Pwnbo Abbv soq Bemin Pota soqgv ngulwg mwjwngam ho yayaq hwngkw mvdwb bon nyin
gvnka, hoqgv Nyishi koo pengko hoqg mwjwbo koo tulungv hoo nyi asaq ngvjaqkam soqg
bemin lvgab Pwnbo Abbwg anya abiam kapaal swwnka hoo Mwg eminam nwrbagob paql
swwnka. Amen.

Dated __.__.2014

Kara Mama
Literature Secretary
Nyishi Baptist Church Council

1. Dvrwq, Dvrwq, Dvrwq

( Holy, Holy, ! Lord Almighty )

Doh is Eb NB - 1 SSS – 22

1 Dvrwq, Dvrwq, Dvrwq, Mwlwgv ab Pwnbo,
Arkomcam mwlwngv nam paql ngul bemin dvn;
Dvrwq, Dvrwq, Dvrwq, Mwlwngam anya bo,
Dvrwq anyangam, Akin doog gvg do.

2 Dvrwq, Dvrwq, Dvrwq, Mwjwl nam paql doo do,
Rup vyinam haagnv nam bul poqkumnv doonya do;
Gumtw mwlw mwlwngv, Nam paql doonya do,
Mwlwngv nam paql, Xumnv doonya do.

3 Dvrwq, Dvrwq, Dvrwq, Kannv pulub jaqkam,
Nyic nyiig vnyiqkv nam kaacin ma jaqkukam;
Dvrwqbo si no twq, dvrwq yanbo doo ma,
Pwnbo oum gob, Oummv akin gob.

4 Dvrwq, Dvrwq, Dvrwq, Mwlw gv ab Pwnbo,
Noqg pwnam mwlwngv nam poqkumnv doonya do;
Dvrwq, Dvrwq, Dvrwq, Mwlwngam anya bo,
Pwnbo oum gob, Oummv akin gob.

2. Ngoqg Ab Pwnbo

( O Lord, my God )

Doh is C NB - 156 CGH – 38

1 Ngoqg ab Pwnbon ngo swr al mwwpa yaado,
Noqg pwnam mam mwlwngam kaapa tvl;
Doony-poolam kaal doogum dooiyamkam tayin,
Mwlwngv nam poqkumla doonya do.

Bikkur
Ngoqg yvj yalv nam akin paql doo do,
No Pwnbongv, No Ywnbongv;
Ngoqg yvj yalv nam akin paql doo do,
No Pwnbongv, No Ywnbongv.

2 Ngo morolo vpwb gaqkarla yv yin,
Ngo tapa do pvta beminam mam;
Yorn ao hoqgv ngo akob kaabob yukam,
Ngo tapa do hempa do dooi yinam.

3 Bos mwwpa do mwwg ko tuup akin jaqkam,
Mwam simnamsam ngo mwwc nyoya ma;
Daapo aotv ngoqg nyic gab Jisun simnum,
Jisu sinkun ngam nyedar darxaq tab.

4 Aal loog Jisu goqrrol mw hookur tayin,
Mw ngam wg yin hwdgo hemp potayin;
Tol ngo Jisun nwrba gob xuml doo tayin,
Tol betayin ab no nyedar darnbo.

3. Pwnbonvn Paqnyato

( To God be the Glory )

Doh is A NB - 157 SSS – 23

1 Pwnbo nvn paqnyato nyispotam nyipa,
Gvda gvtam abynv mwwg kongam jilpa;
Nyi mwlwg nyic gab mw daapo tv si pan,
Nwrba swwgam mwlw gab mvko jipan.

Bikkur
Paqnyato ! Paqnyato ! Gvda gvtv tat o,
Jisunvn paqnyato ! Mwlwngv hempnyato;
Abwg dookub haadvb mwwjw to Jisun,
Poqkum nyato Jisu nyicam nyedar dvn.

2 Dvrwqbo mwwg uiyv ngulam rvpakun,
Mwwjwbo mwlwngam Pwnbog birnamv;
Nyic nyinbo mwlwngv mwwjw to Jisun,
Ho dara nam Jisu nyedar darxaq tayin.

3 Mwwg nyinam wnammam ngulam tomswrpan,
Ngul mwlwngv hempdvn mwwg ko Jisunvn;
Gvda so ngul dvrwqb mwwjwl doobalo,
Ngul hemp pomin tayin Jisun kaapa yin.

4. Mwlwngv bemin benyato

( Oh, for a thousand tongues to sing )

Doh is A NB-158, SSS-243, III Alex-291 & TSC-77
1
Mwlwngv bemin benya to,
Ngam nyedar darnbonvn;
Bir abwg Pwnbog anyangv,
Anyangv nyedarpan.

2 Anyabo Pwnbog gora ab,
No ngam svka tvbv;
Gvda gvtwb pui baql wmto,
Noqg yuunam eminnam.

3 Jisug emin bosso maado,
Mwwdwqkam naaxaq tvl;
Nyic nyinbongv sam tapa yin,
Hemp pol mwwjw nya dwn.

4 Nyic attoram mw mviya pan,
Nyum mam topaq jidwn;
Mwwg uiyv nyicam nyedar dvn,
Uiyv ngam nyedar pan.

5. Mwlwngv Jisun paqnyato SSS – 203

1st Tune ( All hail the power of Jesus’ Name )
Dohis A
NB - 142

1 Jisun mwlwngv paqnya to,
Gumtw nul xumnya to, Gumtw nul xumnya to,
Jisun akin xum kum nya to,
Bir abnvn paq to, paq to, paq to,
Bir abnvn paqnya to.

2 Boopya bem to, Pwnbog nyi nul,
Daapo tol sinbongam, Daapo tol sinbongam,
Debidg nyub tulungam paq to,
Bir abnvn paq to, paq to, paq to,
Bir abnvn paqnya to.

3 Xuqnam Israelig ko tulu,
Anya bo nyob tulu, Anyabo nyob tulu,
Paq to nulam ywwnbo akam,
Bir abnvn paq to, paq to, paq to,
Bir abnvn paqnya to.

4 Gvda soqg nyob luuci luutv,
Gvda so doonbo nul, Gvda so doonbo nul,
Mwlwngv mwwn poqkum nya to,
Bir ab nvn paqto, paq to, paq to,
Bir abnvn paqnya to.

5 Lvpw tol doonbo ao nyi nul,
Ngul mwlw kumbw tvl, Ngul mwlw kumbw tvl,
Nwrba cvtamg bemin beto,
Bir abnvn paq to, paq to, paq to,
Bir abnvn paqnya to.

5. Mwlwngv Jisun paqnyato

2nd Tune (All hail the power of Jesus’ Name)

Doh is G.

1 Mwlwngv Jisun paqnya to,
Gumtw nul xumnya to,
Jisun akin xum kumnya to, Bir abnvn paq nya to;
Jisun akin xum kumnya to, Bir abnvn paq nya to;

2 Boopya bem to Pwnbog nyi nul,
Daapo tol sinbongam,
Debidg nyub tulungam paq to, Bir abnvn paq nya to;
Debidg nyub tulungam paq to, Bir abnvn paq nya to;

3 Xuqnam Israelig ko tulu,
Anyabo nyob tulu,
Paq to nulam ywwnbo akam, Bir abnvn paq nya to;
Paq to nulam ywwnbo akam, Bir abnvn paq nya to;

4 Gvda soqg nyob luuci luutv,
Gvda so doonbo nul,
Mwlwngv mwn poqkum nya to, Bir abnvn paq nya to;
Mwlwngv mwn poqkum nya to, Bir abnvn paq nya to;

5 Lvpw tol doonbo ao nyi nul,
Ngul mwlw kumbw tvl,
Nwrba cvtamg bemin be to, Bir abnvn paq nya to;
Nwrba cvtamg bemin be to, Bir abnvn paq nya to;

6. Hempol, hempol nam ngul xumdwn

( Joyful, joyful, we adore Thee )

Doh is G NB- 11, TSC-14, CW-95, HFG-377

1 Hempol, hempol nam ngul xum dwn, Yuunam Pwnbo, anya ab;
Hangam nam ngul lolin jig yin, Doonyamkam ngulkam gv yin:
Nyic mwwnam sam mwwkur mvm tvb,Mwumnan hangsam naaxa tvb;
Nwrba swwgam jinbongv no, Ngulug hangso haal doo to.

2 Noqg pwnam v hempol doodo, Swcw nyodo nam paq do;
Takar gumtw bemin be do, Mwlwg poqkum namv no:
Moro, haapa, bwdw, yornv, Puunbo opu, sa issv;
Pvta, kubu, iss pobungv, Ngulam goq do nam paqmdvb.

3 No lvqc cinbo nyedar darnbo, Kol nwrba gob ywwnbo no;
Hemp subuqkam no buql doom do, Swnyiq sa hvb hemp pom do:
No ngulug ab Jisu vbw, Anya minsbo noq gvku;
Anyal doom dvb tomswr swrtbv, Ngulam wg tvb noqg dook tol.

4 Gvdag nyi no bemin be to, Soram huto huulin yin;
Anyal ab no ngulam doog tvb, Anyangv akinb mwwm do:
Bemin bel ngul codul doodwn, Nyelin dorsam mvi yanv;
Hemp be min v ao yabwg do, Bemin bel ngul swwl doo dwn.

7. Poqkum nyato

( Priase Him ! Praise Him ! )

Doh is Ab NB – 159 SSS – 208

1 Poqkum nya to ! ngulam nyedarbo Jisunvn,
Gvda gvt no, bemint mwwg anyangam;
Mwam xum to ! Ao lvpwg gumtw mwlwngv,
Mwwg eminam mwlwngv paqnya to,
Jisu yvg dvn, mwwjwbo ko mwlwngam,
Mwwg alaqkv bulam mw bool yvg dvn.

Bikkur
Paql doonya to ! Jisug dvrwqbo eminam,
Hemp pominnv ! beminam bel doo to.

2 Poqkum nya to ! ngulam nyedarbo Jisunvn,
Ngulug nyic gab sinum mw daa po tol;
Mwwjwbongam, Jisu nwrba swwgam ji do,
Xuml doonya to, daapo tol sinbonvn;
Jisun paq to, ngulug nyicam nyedarpan,
Mwwg anyangam, nyiv mwc nyoma dvn.

3 Poqkum nya to ! ngulam nyedarbo Jisunvn,
Ao lvpwngv, hemppol bemin nyado;
Ngulam ywwnbo, Jisu nwrba gob swwl doodo,
Poqkum nya to ! Nyijwq nyet mwlwngv,
Jisu haaiku, gvda gvtsam nyel doog tab,
Yuunam, paqnamv haadybo Jisugab.

8. Ngul Pwnbon paqdwn

( We praise Thee, O God )

Doh is G NB - 56 GH – 291 & TSC - 350

1 Ngul Pwnbon paq dwn,
Noqg anyanam ko gab,
Jisu sipekul aolvpwb mw wnkun.

Bikkur
Haleluya ! nam paql doom to,
Haleluya ! Amen;
Haleluya ! nam paqldoom to,
Ngulv hurab dvn.

2 Ngul Pwnbon paq dwn,
Noqg huto yvj yal gab,
Ywwnbon ngulam kaakin laka nam namlpan.

3 Mwlwg yuunammam,
Mengnam sviya konvn,
Ngulug nyiccam baqnv nyedar darxaq pan.

4 Ngulv mwwkur dvn,
Hangso anya doom to,
Mwlwg yvj yalam ao wmlo bioql doomto.

9. Tangam albo tugupui ak Baibelv bedo

( Yesterday, today, forever )

Doh is Bb NB – 16 GH – 271

1 Tangam albo tugu pui ak Baibelv bedo,
Kulyum kolgv, sija godab, Jisu swwl doodo;
Sijakam vcboam mwpdo, nyicam nyedardo,
Swnyiq sangam biimab mvnbo, Jisun paqnyato.

Bikkur
Kulyum kolgv, sija godab, Jisu swwl doodo,
Mwlwngv silleq kujaqkam, Jisu dootayin;
Jisu dootayin, Jisu dootayin,
Mwlwngv silleq kujaqkam, Jisu dootayin.

2 Nyic nyinboam ajin jinbo, Jisu nam goqdo,
Mwwg ogumho haag dvl xumto, mwwjw jwtwnv;
Anya mwwpanv mw benum, “Nyic nyitin kumab,
Nam ngo apaq jigyin wnku, nookam tagabto.”

3 Gvda gvtso Jisu dooikho, vcboam mwpnum,
Sijakam vcbongv aldo, Jisug eminho;
Tergil doonbo nyemv alnum, vjam gvbwnv,
Nookam hvb mwwjw baloqkam, namkam mwptayin.

4 Jisu ajin tulu lvgab, Immab wnam hvb,
Hvbkalam ngoqg swwg bumpwngam, mw ngam kaal yvgdo;
Lokta mwn ngul kaapa tayin, Jisu hookuryin,
Mwv hoggub nyil wnum, hvb mw hookur taikun.

10. Aotv bemin bedo

(Ring the bells of Heaven)

Doh is Bb NB – 77 SSS – 650

1 Aotv bemin be do! Hempol doonya do;
Sol gaqxarbo akv hookur do;
Kaa to, Ab akv mw lvmbwb wrw do,
Nyiinbo mwwg ko akam wrw tab.

Bikkur

Paqto! Paqto! Gumtw bemin do,
Paqto! Paqto! Hvl pipa miqdo;
Mwwjwbo mwlwngv hookuml doonya do,
Hempol bul mwlwngv bemindo.

2 Aotv bemin be do! Gumtw tulungv;
Nyic nyinbo-am nyedar darpaku;
Nyic lampya apaq pel mwwkurl haapaku,
Sol nyedar darxaqnam kob nyinkun.

3 Gvdaso bemin to, mwwjwbo nyi nul;
Tugu puisam bekarl yvnya to;
Hempol puisam baqto, nyob luxig dookub,
Nyic nyinbo nyi akam nyedarpan.

11. Debidg huul doonbo takar

( O Bright star of David )

Doh is D KHB – 9

1 Debidg huul doonbo takar mwwg nyob tulu,
Yuunam dook ak ngoqg gab no xuqpwl appa;
Swnyiq sa hvb ngoqg hangv hempol dood,
Aal log noqg eminam ngo yuum tayin.

Bikkur
Nyedarbon paql bemin ngo betayin,
Pwnam mwlwngv poqkum nyato;
Mwlwngv nam paql bemin nyato,
Pwnam mwlwngv beminl haato.

2 Ngam pwma dab noqg anyangv ngam doogpa,
Ngam ko bvma dab ngoqg doodam ywqpaku;
Ngo mwwl dooiyin noqg anyangam mwwc lama,
Gvda gvt mwlwngv nam paql dooiyin do.

3 Immanuel, ao lvpw dookv hoglo,
Nwrba gob nam kaapal ngoqg dookv hoglo;
Daniel hvb kumbw tvl nam ngo xumdwn,
Viyin lvpw gab ngo kaaiya yaal doodwn.

4 Ao lvpwg lamta tol ngo gaql yvnwdo,
Anyangv noqg pwnam ao lvpwtv;
Kaacinam mwlwngv yuunam vj kootwl,
Ajin sicobon ngo tol kaapa tayin.

12. Hemp ponyato Jisu haadku

( Joy, to the world )

Doh is Eb NB - 150 SSS –111

1 Hemp ponya to Jisu haadku,
Gvda gvtv xum to;
Mwlwngv mwn mwwjw nyato,
Jisun xumkum nya to;
Jisun xumkum nyato;
Jisun, Jisun xumkum nyato.

2 Hemp ponyato Jisu haadku,
Bemin bel paqnya to;
Yorn haa pangv wllw issv,
Hempol bemin nyato;
Hempol bemin nyato;
Hempol, hempol bemin nyato.

3 Swcw nyodong ammw kaag do,
Nyob luci lut nyingam;
Mwwg jvqtwngam yuukum nyato,
Mwwg anyanam samkam;
Mwwg anyanam samkam;
Mwwg anya, anyanam samkam.

13. Gumtwg beminam tato

( Hark ! the herald Angels sing )

Doh is G NB - 48 SSS – 30

1 Gumtwg beminam ta to,
“Bvvpnam bir kongam yuug do;
2 Gvda gvt no hempo to,
Nyicbon Pwnbo ywwpa ku:
3 Nyob mwlwngv hempo to,
Aolvpwngam looba to;
Gumtwngam nul beba to,
“Jisun bvvp pa Betlehem;
Bikkur

Gumtwg beminam ta to,
“Bvvpnam bir kongam yuu to.”

Aotv Jisun poqkum do,
Jisu nwrbag swwg abv;
Kaato mw mood xikub haad,
Dvn ak hoqgv bvvlin pan:
Pwnbongv nyiib nyil haapku,
Nyib nyinbo Pwnbon paq to;
Nyib nyil nyingam dooba do;
Jisu ngulam dooba do;

Paq to, a-og bir abnvn,
Paq to, doony tvb jvqtwbon!
Nyi mwlw gab swwg haagpa,
Nyic nyiingam mw nyedar tab:
Mwwg yuunammam apaq pel,
Nyiingam simmab ko bvpan;
Nyiingam tormdvb ko bvpan,
Nwrbab swwmdvb ko bvpan;

14. Haato, mwjwbongv.

( Oh Come, all ye faithful )

Doh is A NB - 46 SSS-31

1 Haato, mwwjw bongv,
Hempol goqr ronya to,
2 Betlehembv haato hempominla;
Kaato, dokumbv, Gumtw abam bvvpa:
3
Haato, mwam paqnya tuj,
Haato, mwam paqnya tuj,
Haato, mwam paqnya tuj,
Jisunvn.

Bemin beto gumtw,
Goqr ronyato vcjaqb,
Aogumtw tulu nulmwnpoqkum nyato;
Ngulug Pwnbongam,
Aotv poqkum nyato:

Haato, mwam xumnya tuj,
Haato, mwam xumnya tuj,
Haato, mwam xumnya tuj,
Jisunvn.

Jisu, nam ngul xum dwn,
Ngulam nyedar darnbo,
Ab Jisu, kol godab Nam paql doo tayin;
Abwg birnamv,
Nyiakob nyil haapakun:

Haato, mwam xumnya tuj,
Haato, mwam xumnya tuj,
Haato, mwam xumnya tuj,
Jisunvn.

15. Suyumg ai ! Dvrwdo !

( Silent night ! )

Doh is C GHF – 85

1 Soiyig ai ! Dvrwq do !
Mwlwngv huul doo do;
Anko vnyam huuyiql doog do,
Dvrwq ko bv kaangam al do;
Anya yubl doomin do,
Anya yubl doomin do.

2 Soiyig ai ! Dvrwq do !
Sviya kaanbo tvmdwr do;
Ao toloqgv huuto huul do,
Haleluya hvl gumtw bedo;
Jisun ko bvvpaku,
Jisun ko bvvpaku.

3 Soiyig ai ! Dvrwq do !
Pwnbog kov huul doo do;
Mwg aloqkv huuto huul do,
Nyedar anya huuto huul do;
Jisun ko bvvpko ho,
Jisun ko bvvpko ho.

16. Ao gumtwngv ugu pui baqlnum

( The first Noel, the angels did say )

Doh is D NB - 160 TSC-94, CW-197, GH-369

1 Ao gumtwngv tugu pui baqlnum,
Sviya kaanbo tulungam baqkinum;
Haapa gol bul sviya kaal doonum,
Swkwr cwk tapam pool aikan jaqho.

Bikkur
Hempto, hempto, hempto, hempto,
Israelig abam ko bvv pakun.

2 Huunbo takar cwrkinam kaal,
Nyijwq nyet oumgo nyody bool haanum;
Gora abam bul meel haanum.
Huunbo takaram bul kaal kaal wnum.

3 Takar cwrv odumb caal doonum,
Betlehemho siromol doonum;
Takar cwrv wkmab dooknum,
Jisunko bvwpwl apkonam jaqho.

4 Nyijwq nyet nyi oumv haanv,
Hangv hempol bul al kumbwtvl;
Rup viyin baqnammam taakonv,
Jisug ogumb bul bval ap jinum.

17. Sviya kaanbo tulungv ai

( While shepherds watch their flocks by night )

Doh is G NB – 86 SSS - 33

1 Sviya kaanbo tulungv ai
Mwlwngv tuul doonum;
Abwg gumtwngv ipoqnv,
Mwlwngam huuyiqnum.

2 “Bosmab” hvl gumtwngv benum,
Bos sodul doonbongam;
“Hempnam tugupui ngo haagyin,
Swcw nyi mwlw gab.”

3 Nul gab sool Debidg dvpargv,
Kotuup ak bvvlinpan;
Nyicam nyedar darnbongv mw,
Sam nul kaacin nyato.

4 “Aog kongam nul kaapa tayin,
Nyiako hvb bvvpnammam;
Jomp lvpwngam apaqpel mw,
Jwwgwb nyil haa pakun.

5 Gumtw tulungv hvl bepel,
Vigo huu yiql haanum;
Pwnbo abnvn paqnya to hvl,
Hempol bemin nyanum.

6 “Gvda gvtwg nyi mwlwngv,
Pwnbo abnvn paqto;
Nyedar darnbo Pwnbo haapku,
Nyiako nul hemp nyato.”

18. Ai nyiywra bemin belpan

( It came upon the midnight clear )

Doh is Ab NB - 64 GH – 373

1 Ai nyi ywra bemin belpan, Ao lvpwg beminam;
Gumtw tulungv pipa miql, Gvda gvt ura so:

“Gvda gvtwg nyia kog al gab, Anyabo Pwnbov”
Gvda gvtv tamol doonum, Gumtw beminam tal.

2 Sijakam gumtwngv haadwn, Aolvpw toloqgv;
Sijakam beminam bedwn, Gvda gvt mwlw ho:

Hintwr kaany gvda so haanv, Bemin albo belpan;
Gvda so nyob luxig agamb, Gumtw bemin bedo.

3 Noqg swwl caak noqg swwg lamtaho, Hentwr hendkukoho;
Viy vbar baql mwwdwq saqknv, Duleq pammeql wkho:

Kaa to hempko moodv haadku, Gumtwngv haal bedo;
Nyelin dors lamtaho dootwl, Gumtwg bemin ta to.

4 Kaaka to, kolwg nyiig benam, Nyijwq nyiig bel apnam;
Oiyu kokw so hvxiqpan, Hog hemp aalam kaa to:

Gvda gvtv hemp ponya do, Kolwg hempam hempal;
Gvda gvt mwlwngv gumtwg, Beminam be nyado.

19. Ao lvpwg jomp mwlwngam apaqpel

( Thou didst leave Thy throne….. )

Doh is Gb NB - 50 SSS – 35

1 Ao lvpwg jomp mwlwngam apaqpel,
Ngoqg gab no soq gvdab haapan;
Betlehemho noq gab nam doomanum,
Dvrwqbo ko tuupam doom dvb.

Bikkur
Haa to, hang urab ab Jisu,
Noq gab ngoqg hang si dook doodwn.
Haato, hang urab ab Jisu haat,
Noq gab ngoqg hang si dook doodwn.

2 Gumtw tulungv aotv bemindo,
Nam paql bemin bel doomindo;
Hvbmab gvda so nam hentwrb ko bvvpan,
Ngam anya mww pabanv.

3 Svcagv ungv doodwn, pvtagv osup doodwn,
Soq gvda mooro lvpa so;
Hvbmab Pwnbog ko gap dook doomanum,
Soq gvda gvtwg ura so.

4 Nwrba swwg agammam no ipoq gvpan,
Nyic nyiingam nyedar darxaq tab;
Hvbmab nam benyi-benyal ta bopya bemnum,
Kalbarib bul nam wg gvnum.

5 Gumtw tulungv aotol bemin betayin,
No meiya pvkul haagum gab;
Noqg dook nam tol dookv doodwk hvl no goqdo,
Ngoqg dooksi noqgab dook doodo.

20. Svk huto lok huukama

( Never shone a light so fair )

Doh is Eb SSS – 27

1 Svk huuto lok huuka ma,
Svk bemin lok taka ma;
Aotv beminl doonya do,
Ao gumtwngv benya do;
Takarv gonsam tapa nvn.

Bikkur
“Yuunam ab Jisu haapaku.
Ngulug hang so haal doo to,
Dooba do, dooba do,
Dooba do, Pwnbo ngulam.

2 Jubilig beminammam,
Pa dedib bemin doodo;
Beminam bel dooi kalam,
Gvdab huuto haal doodo;
Mwlwngv gonsam tapa nvn.

3 Ngulug abnvn paqd aalsam,
Xinam aal gob nvvrwq to;
Mwn ngul paqtab hookumyin,
Mwwg anyangam bemin do;
Gvda gvt no gonsam xww to.

21. Dookum mam ngul hwwkuml doogdvn

( We gather round the manger bed )

Doh is G NB - 87

1 Dookum mam ngul hwwkuml doogdvn,

Bvvpnam kongam kaadwb;

Ao huutongv mwn huul doog do,

Mwwg nyuqm mam huul doomdo:

Bemin bel dul doogdo.

2 Soq kog eminv hogv yu?
Anya jaqb yubl doodo;

Pwnbog kongv bul hvl bedo,
Mwlwngv xumtayin,

Hwdam si nyitayin?

3 Mwam Jisu hvl eminpan,
Nyia kob nyil mw haapan;

Pwnbo abnvn ngul kaany maadwn,
Hvbmab sam ngul kaagdo,

Si Pwnbog mwwnamv.

4 Ngulug kaagdvn him anyo so,
Pwnbog mwwkub haapan;

Daapo aotol mwwg sinam si,
Ngulam aotol doomdvb,

Nwrba gob tol doomdvb.

5 Mwlwngv haal xumnya tayin,
Mwlwg gora abnvn;

Mwwg lvpwngam poqkum nyagdo,
Nyiib nyil haagum gabla,
Swrdorxeqb mwwg nyinam gab.

22. Gon tatv hog hvl ngam bedwn

( What do they say those bells )

Doh is Gb NB - 88

1 Gon talv hog hvl ngam bedwn,
Tangam albv duminl doodo;
Ao lvpwg hempam kaakindo,
Jisun ko bvvpaku.

Bikkur
Gon talv hog hvl ngam bedwn,
Tangam albv duminl doodo;
Ao lvpwg hempam kaakindo,
Jisun ko bvvpaku !

2 Sviya kaanbongv yubl doodo,
Ao huutongv huulupl doogdo;
Gumtwg beminam bul tagnvn,
Jisun ko bvvpaku !

3 Gvda gvtv, swnyiq sangv,
Jompv la hempv nyi kogv;
Bemin bel soqsam pui dupan,
Jisun ko bvvpaku !

23. Betlehemgv kangambo takar

( Beautiful Star of Bethlehem )

Doh is Eb NB - 171

1 Betlehem kaangambo takar,
Aado toloqgv huupoq do,
Wcobo tulungam huuto jigdo;
Nyijwq huuto lamtab wg do,
Jisun ko bvvkwb huul wg do,
Betlehem kaangambo takar huuto.

Bikkur
Betlehem kaangambo takar,
Jisug haa madab ngulam huul doog tvb;
Ngulam huuto lamtab wg to,
Jisug haad mood aal goda gob,
Betlehem kaangambo takar huuto.

2 Kaangam takaram mwwgw dvn,
Moiyw wnbongam huul wg do;
Nyoi ywwnbongam wg to pa maa dabv;
Xinam gvdab huuto haag to,
Huuto anyangv huu rwq tayin,
Betlehem kaangambo takar huuto.

3 Kaangambo takar doonu kongv,
Nyedar darxanam mwlwngam,
Nwrba cetam swwgam naal doog tayin;
Jisu mw dvrwq takarv,
Nwrba cetam gob huu tayin,
Betlehem kaangambo takar huuto.

24. Goqr ronyato, husana

(Shout, eternal Hosanna…)

Doh is G KHB – 116

1 Goqr ronyato Hosana, Halleluya Amen,
Soolwg aalso Jisun Betlehemho ko bvvpan;
Anya agam mw bedo, mwp jido mwlwngam,
Mwwg koibo eminsam goqr rol ngul paqnyatuj.

Bikkur
Yorn haapa Betlehemho,
Nwrbag takar hua duku goqr rol paqnyato;
Mwam mwwjwbongv hemponam mam naatayin,
Mwwg yvj yalv lokam mwwdwql nyiqs diram.

2 Ngulug ab Jisunvn, mwlwg yuukum poqkumnamv,
Mwwg anyangv gvda si pobu hvb todo;
Nyicam mviya jigam gab bemin bel ngul mwn paqdwn,
Mwlwngam, anya yanbongv ngulug Jisu.

3 Kolwg Pwnbog birnamv, ngulug nyicam mwpdvb,
Kalbaritol; mwwg anyangam ngul kaapado;
Swr dorxeqsam bela nyoram, paqnam paqnyin nyoram,
Anya gvdab mw wgdo, nyicam nyedartvl.

4 Mwlwg yuunam ab jaqkv, nyiinboam meetab haanum,
Ao gumtwngv Pwnbog anyangam bekinum;
Mwlwngv mwn poqkumto, Pwnbo mwlwg abnvn,
Mwwg anyangam ngul benyma, xeqlakam xeqnyma.

25. Mwwg vminnv la nyob

( The Great Physician )

Doh is Eb SSS – 89

1 Ywwnbongv ogum si doo do,
Ngulam anyabo Jisu;
Mwwdwq saqkbo ngam hemp pomdo,
Jisug agammam ta to.

Bikkur
Gumtw agam bemindo,
Eminam nyiingv yuugdo;
Tangam beminam bedo,
“Jisu ! Ywwnbo Jisu”.

2 Noqg nyic mwlwngam appaqpan,
Jisug agammam ta to;
Hempol aolvpwb no wto,
Swwg bopyangam benl doo to.

3 Mwwg eminv bossam nyiim do,
Nyiig eminma Jisugv;
Tatwl ngoqg yvj yalv hempdo,
Ywwnbo Jisug eminam.

4 Aal loog huul doonbo ao lvpwb,
Jisun kaa tab caa tayin;
Mwn daqg tvl ngo bemin tayin,
Mwwg emin jaqkv Jisu.

26. Dvrwq jaqb ngam nyedarpan

( Complete healing )

Doh is A HLB – 20

1 Nyelin dorsbo jwwgwbo hurapto,
Nyedar dark lamtangam ab Jisu mvko jipan;
Sipekul mw lokta gorap kunum,
Nyi mwlwg nyicam nyedartab.

Bikkur
Ngam nyedar darpku, paqyalinco ab,
Halleluya, Amem !
Ab Jisug xinam ui hoqgv
Dvrwq jaqb ngam nyedarpan.

2 Anya assorb mwwdwql doonbo nyi nul,
Nulam nyedar pakun hvl mwwjw nul doonyato;
Nyic atoram Jisu mviya gvnkun,
Dvrwqbo yvj yal haapaku.

3 Jisun mwwjwbongv mviya keedwn,
Bul uiyam ruqtayin, assaq agamb gootayin;
Bul vcbon alaq idaql mwp tayin,
Jisug emin ator hoqgv.

27. Jisu ngoqg ajin albongv

(I’ve found a friend in Jesus)

Doh is G NB - 121 SSS – 104

1 Jisu ngoqg ajin albongv,
Mw ngoqg hog mwlwngv,
Ngoq gab mw mwlwngam anya yanbongv;
“Opu mwlwg kaangambongam”,
Mwwg ho ngo kaapa do,
Ngo mw galoq nyedar darxaq konw do;
Mwwdwq saqk yin ngam maa do,
Hentwr yinngam doog do,
Ngoqg nyelin dors mwlwngam mw gaqdo;
“Jisu opu anya bongv”, “Huunbo Takarv mw”,
Ngoq gab mw mwlwngam anya yaanbongv.

Bikkur
Mwwdwq saqkyin ngam maado,
Hentwryin ngam doog do
Ngoqg nyelin dors mwlwngam mwgaq do,
“Jisu opu anya bongv”, “Huunbo Takarv mw”,
Ngoq gab mw mwlwngam anya yaanbongv.

2 Mw ngoqg nyic mwlwngam baqgnvn,
Nyelin dorsam naagnvn,
Ui opo pwqkho mw ngoqg ator jaqkv;
Mww gab ngo apaq jipakun,
Swcw nyodog abyam,
Jisu mwwg uiyv ngam nye dar darxaqpan;
Mwlwngv apaq jaqkam,
Uiyv pooka jaqkam,
Jisun wbal ngo ao lvpwb wc tayin;

“Jisu opu anya bongv”, “Huunbo Takarv mw”,
Ngoq gab mw mwlwngam anya yaanbongv.

Bikkur
Mwwdwq saqkyin ngam maado,
Hentwryin ngam doog do
Ngoqg nyelin dors mwlwngam mwgaq do,
“Jisu opu anya bongv”, “Huunbo Takarv mw”,
Ngoq gab mw mwlwngam anya yaanbongv.

3 Mw ngam lokam apaq jaqram,
Mwwpa mab ngam nyiram,
Jisun mwwjwl mwwg mwwkub ngo nyi balo;
Nyemaqkv ngam doqtum jaqkam,
Ngo sija boskuram,
Ngoqg yvj yalam anyab mw raol doog to;
Swwg bopya mw ngam bem tayin,
Mwn ngo lok kaapa tayin,
Nwrba cvtamg hempko abwk nam tol;
“Jisu opu anya bongv”, “Huunbo Takarv mw”,
Ngoq gab mw mwlwngam anya yaanbongv.

Bikkur
Mwwdwq saqkyin ngam maado,
Hentwryin ngam doog do
Ngoqg nyelin dors mwlwngam mwgaq do,
“Jisu opu anya bongv”, “Huunbo Takarv mw”,
Ngoq gab mw mwlwngam anya yaanbongv.

28. Xoomabo iss

(Living water)

Doh is G Dr. Ramdínthara Sailo

1 Hemp mwlwngam, ngo doog gv do,
Pobu hvb ngoqg, hangso tol doo do;
Soq pobu si nwrbab tol doon bongv,
Soq hempsam gvdangv jiny madwn.

Bikkur
Jisu tol doon bo pobu,
Hvngwrl doon bo yvjyalam no iss twwm do,
Gvda gvtso dood dedib ngo hvngwram,
Ab! ngoqg swwg gab hog mwlwngam no jilpan.

2. Aal loxiam no ngame kaal yegdo,
Ngoqg nyicam no nyedar darxaqpan;
Albo lamtab no ngam bookarl yvgdo,
Dvrwq yvj yalv ngam tomswr do.

3 Noqg anyangv ngam meelinpan,
Ab nam ngo lokam apaqkuram;
Ngam anyanam dodsam ngo jinykuram,
Ngoqg hog mwlwsam nam ngo jigyin.

29. Jisuk eminam no naato

( Take the name of Jesus with you )

Doh is Ab NB - 164 SSS – 91

1 Jisug eminam no naa to,
Mwwdwq saqkwl no dooi yin;
Hemp ponammam nam ji tayin,
Jisun mwwgabl no sww to.

Bikkur
Jisu gv eminam,
Mwwgab to hang uraho;
Jisu gv eminam,
Mwwgab to hang uraho.

2 Loxiam Jisug emin naato,
Hoglo no wl yv jaqkam;
Uiyv pooka yarka yinnam,
Jisug eminam xumto.

3 Jisug emin si xinam go,
Ngulam hempol si doom do;
Mw ngulam boo tab haaikukam,
Mwwg beminam be tayin.

4 Jisug eminam xumnya to,
Kumbwl mwwg all lwkw tol;
Bir ab gob mwn ngul xum tayin,
Ngulug sixo kokwngam.

30. Mwlwg emin koi yaanbo

( Sweeter far than other names )

Doh is Eb MCS - 35

1 Mwlwg emin koibo,
Ngoqg gab Jisug eminv ;
Ngoqg nyicam nyedarpan,
Ao lvpwtv mw doodwn,
Gvda gvtwg ab.

Bikkur
Kaaiya yal ngul doodwn,
Kolwg kaacin minsnam tol hookum ramyv;
Nwrbab mwwg opu puul dook tol?

2 Gaqxarbo ngoqg yvj yal,
Noqg abnvn kvvnw maiyv;
Jaiyonwg kongv wdo,
Hempol ao lvpw nammwb,
Nwrbab hempok tol.

3 Nyicv kanho doompan,
Yvj yalam nyiqcal doompan;
Noqg lamtab ngam wmmab,
Dvrwq yvj yal ngam wgto,
Gvda gvt kanso.

31. Kaa to, mwc nyoma anya sam

( Behold, what Love )

Doh is Db NB - 112 SSS – 21

1 Kaa to mwc nyoma anya sam,
Abwg toloq jilnam;
Nyic nyinbo nyia ko mwlwngam,
“Pwnbo ko gob yuumdvn.

Bikkur
Kaa to, soq anya jaq sam,
Soq anya jaq sam ngul gab
jilnam abwg anya sam,
Ngulam aal loog hvl yuum dvb,
“Pwnbo kongv hvl yuum dvb.

2 Sija mwwg ogumho dood kun,
“Ji su gv ui galoq”
Anya aljaqb ngulam haagnv,
Pwnbog dook tol doomdvn.

3 Ngul mwlwngam yuuta yukun,
Hoq moodv haama da;
Hvbmab Jisun ngul kaapayin,
Mwwg hvb ngul nyi tayin.

4 Sam ngulug hangso mwwgabnv,
Dvrwqb nyil mwwl doo tuj;
Sipekul turl doonbo abnvn,
Lokngul kaapa tayin.

32. Pwnbog anya

( What a wonderful love !!)

Doh is E Wel Born Manner HLB - 68

1 Pwnbog anya sam mwc nyoma,
Si nyic mwlwngam nyedar darnbo;
Kaacbo daapo tol Pwnbo abnvn,
Ngoqg yvj yalam mwv ywwt ywwtab sinum

Bikkur
Swcw nyodongam Pwnbov,
‘Hvngwrpan daapo tol xabnum;
Pwnbo ab svv rwk namho doonum,
Soq nyinam mwlw si, ngoqg gab mwv nyinum.

2 Pwnbog anyangam mwc lama,
Ngo cwql doony ma mwwg anya bemaab;
Swwl dood dedidnam ngo paql doo tayin,
Ab nam ngo abydvn no ngam aby compan.

3 Pwnbog anyangv taqt aldvn,
Ngoq gab mwv aolvpw apaq pan;
Nyiig nyic gab mwv gvda so haanum,
Mwwg abynam sam ngo bela nyomadvn.

4 Pwnbog anya sam mwc nyoma,
Ngoq gab mwwg nyinam sam xilama;
Mwwg bonam nyim dvb ngulam goqdo,
Mwwg bonam nyidwb ngul taqp kamasu.

33. Ngo hemp aldo Pwnbo Ab ao lvpwtv

( I am so glad that our Father in heaven )

Doh is G SSS – 38

1 Ngo hemp do Pwnbo ab ao lvpw tv,
Baibelv mwwg anyangam betam do;
Swr agammam Baibel so kaapa do;
Tangamnam si Jisu ngam anya do.

Bikkur
Ngo hemp dvn Jisu ngam anya do,
Ngam anya do, ngam anya do;
Ngo hemp dvn Jisu ngam anyado,
Jisu ngam anyal dood.

2 Ngam anya do ngokam mwwn anya dvn,
Ngam yuum dvb anyangv mwwn bool igpan;
Anyangv daapo tol Jisun simpan,
Ngo cengl doo dwn Jisu ngam anya dvn.

3 Bekin tvbwk hvl ngam beba loqkam,
Jisun paqnya to hvl ngo be tayin;
Pwnbog yvj yalvkam ngam loobado,
Bel doo tayin Jisu nam anya do.

4 Soq sib begum gab hempol ngo doo dwn,
Jisun mwwjwnv ngo hempol doo dwn;
Ngoqg hang hoqgv uiyv kelin nukun,
Jisu ngam anya dvn bekin kalam.

34. Ngam no anyado

( Your love for me )

Doh is A HLB – 23

1 Ngo be min tayin, mw ngam anyanam sam,
Ngoq gab si bemin albongv;
Si nyic mwlwngam nyedar darnbongv,
Swwl dood dedib sam ngo bel doo tayin.

Bikur
No hwdjaqg ngam anyal doognam sam,
Ab! sam ngo bekin nyoram;
Gvda gvtsokam ao tolokam,
Nam ngo paql doomin tayin.

2 Nyic nyil nyelin dors gob ngo doo jaqkam,
Ab no ngoqg swwgsam nvvrwq to;
Noqg bonnam nyimdeb no ngam goql doo do,
Noqg bonam nyidwb ngo taqp yaama.

3 Swwd dedib ngo noqg bonam nyinw do,
Gvda gvt so ngo dood dedib;
Ngam nyedar darxaq tvl Ab no doog tvb,
Jvqtwjaqb nam ngo aby biol doodwn.

35. Kolwg gonam xwwkintvb

( Tell me the Old, Old Story )

Doh is C NB - 52 SSS – 1131

1 Kolwg gonam xwwkintvb, Ao lvpwg gon akam;
Jisun yuunam gonam la, Jisug mwwg anyangam;
Anya jaqb ngam bekintvb, Himmiam xwwkinam hvb;
Ngo nyelin gob nyil doodwn, Ngam svka bo dooma.

Bikkur
Kolwg gonam xwwkintvb,.. (3)
Jisu mwwg anyangam

2 Aljaqb gonsam xwwkintvb, Ngam sam tagab mvmtvb;
Swr dorxeqb ywwlinko sam, Nyicam nyedar darksam;
Gonsam looxiam xwwkintvb, Ngo mwwpa mab nyikydvn;
Sor komc gums kaapanam mam, Aalam kaapa maadkun.

3 Gon xwsiqnv xwwkintvb, Hang so mwwgabl doomtvb;
Mwwgab to ! ngo nyic nyingv, Ywwtab Jisu haapan;
Gonsam looxiam xwwkintvb, No jvqtw gonyloqkam;
Hintwr kaanyil ngo dooiyin, No ngam svka kaato.

4 Gon lukinsam xwwkintvb, Ngo bos sodul dooiyin;
Gvdag abynam mwlw si, Larl doog dvb nyima do;
Swcw nyodog abynamv, Ngoqg hangam pwql dooiyin;
Kolwg gonsam xwwkintvb, Jisunvn ngam ywwmtvb.

36. Jisug gonam ngam xwwkintvb

( Tell me the story of Jesus )

Doh is E NB - 53 SSS – 43

1 Ngam Jisug gonam xwwkintvb,
Ngoqg hangso xiqlwql aptvb;
Gon albo jaqsam xwwkintvb,
Tangam albo gon aksam:
Gumtwg beminam bekintvb,
Mwwg ko bwdho beminam;
“Aotv Pwnboam paql doodo,
Hemp albongam gvdaso”.

2 Bekintvb mwwg hintwr kaanyam,
Hogub nyil mw hintwrnum;
Ngulug nyic gab uiyv pwqnum,
Uiyam mw mviya kunum:
Bekintvb mwwg bon nyinam mam,
Mwwg hintwrnum mwlwngam;
Anya assorb mwam mengnum,
Mwwg dook namgo doomanum.

3 Mwwg sik daapongam bekintvb,
Nyelin dors gob mwwg nyinam mam;
Mwwn liik nyubungam bekintvb,
Lokta mwwg turnam mamkam:
Soq gon uraso anyangam,
Dvrwq jaqb ngo kaapado;
Jisun nwrba gob paqnyato,
Ngoqg nyicam ywql mw sinum.

37. Gon aksam ngo xwwnwdo

( I love to tell the Story )

Doh is Ab SSS – 46

1. Gon akam ngo xwwnwdo, Ao lvpwg gon aksam;
Jisun yuukum namsam la, Jisu mwwg anyangam:
Gon aksam ngo xwwnwdo, Si jvqtw agamv;
Hangam si hempol doomdo, Hiyvkam sam nyinyma.

Bikkur
Gon aksam ngo xwwnwdo,
Sam ngo xwwminl dootayin;
Kolwg gonsam xwwtayin,
Jisu mwwg anyangam.

2. Gon akam ngo xwwnwdo, Si xinam gon jaqgo;
Si hang mwbuqnam gonma, Yuma manam kama:
Gon aksam ngo xwwnwdo, Si ngam nyedar darpan;
Hoq gab soq gon aksam ngo, Sija nam xwwkin dvn.

3. Gon akam ngo xwwnwdo, Gon si xwwngam algo;
Hwdgo gonsam xwwtayin, Hwdgo xwwngam aldo:
Gon aksam ngo xwwnwdo, Nyi tuugin sam cengma;
Nyedar dark tugu puisi, Pwnbog agam hoqgv.

4. Gon akam ngo xwwnwdo, Nyi mwlw mwlw gab;
Gon aksam tvnwbongam, Gonsam xwwkin nwwdo:
Ao lvpw tolo kam ngo, Nit bemin betayin;
Kol kolwg kucuq gonsam, Vigo ngo sam abydvn.

38. Nyic nyil vc-cil doonbongam

( In tenderness He sought me )

Doh is G NB - 96 SSS – 59

1 Anyal mw ngam meepanum,
Nyic nyil vccil doo num;
Mwwg langkho ngam mw baq twl,
Mwwg dookho baqapan;
Gumtw tulungv mwwg dookho,
Mwam poqkumnv doonya dvn.

Bikkur
Anyangam ywwlin pan ! Uiyv ngamywwlinpan !
Anyangv mwwg dookho ngam haagpan !
Hemp pominl mwwg dookho ngam doom do !

2 Untar gvl ngo sil doonum,
Unam mw mwp jinum;
Bisnv mw ngam hvl benum,
“No sija ngoqg gvku!”
Tangam agammam tapa tvl,
Mwwdwql doonbo hangv hemp do.

3 Mwwg al alaq un hoqgv,
Ngoq gab mwwg ui compan;
Taa gvnbo bopya piag mvl,
Mwwg dumpoho bemnum;
Ngoqgho mwv hogv kaapa tvl,
Ngoqg gab mw hengtwram hengnum.

4 Mwwg ogumho ngo doo twl,
Huunbo mwwg nyuqmmam kaal;
Mwwg anya ngam mwwrap yin,
Ngoqg hangv mwc nyoma;
Nwrba cetamb swwl doo jaqkam,
Mwwn paqnamsam paqnya nyoram.

39. Nyic nyil ngo lamtasi doodwn

( Sitting by the Wayside )

Doh is Ab NB - 9 SSS – 37

1 Nyic nyil ngo nyiqca caal lamta si doo dwn,
Huuto gab kansi kaaiyal doo dwn;
Nyicam nyedar darnbo anyabo Jisu,
Sijada ngoqg nyicam nyedar tvb.

Bikkur
Hiyvkam cengma dvn, mwwma dvn ngoq gab,
Pa ngam kaaiyal kansi ngo doo dwn;
Nyic nyiig ngoqg xumnamsam, Ab no nvvrwq to,
Jisu haag dvl nyicsam nyedar tvb.

2 Kansi kaaiya yal ngo vpy ai mwwl doo dwn,
Noqg nyuqmmam ngo kaatuj mwwl doo dwn;
Nyedar darnbo Jisu no ngam boolin tvb,
Tugupui bekinl ngam naalin tvb.

3 Nyiqcal ngo aal lopw kaaiya yal doo dwn,
Mwwdwq saqkwl ngo mwwl doodu dvn;
Debidgko nam xumg dwn apaqjaqmab ngam,
Anya asorb kanso ngam doom mab.

4 Anya assorb nyil ngo lamta si doo dwn,
Ngoqg hvb nyinbongam anya dvnyv ?
Ngoqg nyic mwwnnan hangsi nyi ak bekin do,
Jisu nyicam nyedar darxaq dvn.

40. Jisug ui subuqkam paqto

( Blessed be the fountain of Blood )

Doh is D NB - 12 SSS - 113

1 Jisug ui subuqkam paq to,
Nyic nyi mwlw gab sam lempan;
Poqkum nyato Pwnbog kongam,
Mwwg unv ngulam nyedarpan:
Mw hoqgv ngo gaqxarl yvnum,
Ngoqg hangv mwwdwq dwql doonum;
Jisug uiyam hwrxaq mvm tvb,
Tapammam ngo huubin tayin.

Bikkur
Ngo huubin tayin, Ngo huubin tayin,
Jisug uiyam hwrcaq mvmtvb
Tapammam ngo huubin tayin.

2 Taa bopyangam mwam bemnum,
Mwwg daapongvkam vi alnum;
Mw nyelin dors vigo duqnum,
Hvbmab mwv sam duqnyib duqma:
Ngokam subuq urab haag dvl,
Nyic sam ngo nyedar dark nww do;
Mwwg uiyam ngam hwrxaq mvm tvb,
Tapammam ngo huubin tayin.

3 Ab nam ngo apaqpeel gaq num,
Ngoqg hangv gaqxarl yvg pakun;
Ngoqg nyic nyinam hog mwlwsam,
Issv sam hwrxaq nyoma dvn:
Jisug ui subuq buql dookub,
Mwwg birnammam mwwjwl haaikun;
Ngam dvrwq jaqb ho hwrxaq tvb,
Tapammam ngo huubin tayin.

41. Doon mviyv nul

( Were you there )

Doh is Eb NB - 25 FHP - 287

1 Doon mviyv nul, Ab Jisug daapo siktol?
Doon mviyv nul, Ab Jisug daapo siktol?
Si ngam! Lok lokub hang homdo!
Ngam tvmdwr, tvmdwr dwrmdo,
Doon mviyv nul, Ab Jisug daapo siktol?

2 Doon myv nul, Jisun yoqdwr taqtinyo ?
Doon myv nul, Jisun yoqdwr taqtinyo?
Si ngam ! Lok lokab hang homdo !
Ngam tvmdwr, tvmdwr dwrmdo,
Doon myv nul, Jisun yoqdwr taqtinyo?

3 Doon mviyv nul, Ab Jisun noxo nwqyikho?
Doon mviyv nul, Ab Jisun noxo nwqyikho?
Si ngam! Lok lokub hang homdo !
Ngam tvmdwr, tvmdwr dwrmdo,
Doon mviyv nul, Ab Jisun noxo nwqyikho?

4 Doon mviyv nul, Ab Jisun svma liiyikho?
Doon mviyv nul, Ab Jisun svma liiyikho?
Si ngam ! Lok lokub hang homdo!
Ngam tvmdwr, tvmdwr dwrmdo,
Doon mviyv nul, Ab Jisun svma liiyikho?

5 Doon mviyv nul, Ab Jisun sipel turyikho?
Doon mviyv nul, Ab Jisun sipel turyikho?
Si ngam ! Lok lokub hang homdo !
Ngam tvmdwr, tvmdwr dwrmdo,
Doon mviyv nul, Ab Jisun sipel turyikho?

42. Swrdorxeq daapongam kaapayin

( When I survey the Wondrous Cross )

Doh is Eb NB - 129 SSS – 115

1 Swr dornyi daapongam kaapayin,
Pwnbog yuunam ko tuup sikv;
Ngoqg nyet sam nyetgob ngo mwwk ma,
Ngoq larnam sam kac gob mwwdkun.

2 Jisug sinammam apaq pel,
Ab ngam atam paqs mvm mabv;
Ngoqg aby bonam mwlw jaqkam,
Ngo apaq jigyin mwwg ui gab.

3 Mwwg all, alaq, dumpongam kaat,
Abivla nyelinv tol do;
Vnyiv lvkinb wrwq dvnyv ?
Kaangam nyet bopya bem dvnyv?

4 Gvda gvtsam ngam ji jaqkam,
Jisug daapo anya taqp ram;
Ao lvpwg Jisug anyangv,
Ngoqg yvj yal swwgam gaql doo do.

43. Jisug daapo ogumtv

( Jesus, keep me near the Cross )

Doh is F NB - 130 SSS – 134

1 Jisug daapo ogum tv,
Xinam subbuq buql do;
Mwlwngam nyedar kongv,
Kalbaritol tol do.

Bikkur
Daapongam, daapongam,
Ngo paql doomin tayin;
Nwrba cetam swwnam gob,
Jisun paql doo tayin.

2 Jisug daapo ogum tv,
Anyangam kaapa pan;
Toloq takar huutongv,
Ngam huuto huulub do.

3 Jisug daapo ogum tv,
Anyangam kaakin pan;
Ngam looxiam wkar yvm tvb,
Daapo dunyium ko tol.

4 Jisug daapo ogum tv,
Mwwjwl mwwgabl doo dwn;
Viyin lamtab w tayin,
Pobu soiyoq tolo.

44. Aado yorn puutu tv

(On a hill, far away)

Doh is Bb NB – 139 GHF – 113

1 Aado yorn puutu tv,
Kaacnam daapo ak daqd,
Hintwr kaanyw hvnyw nyw kumko;
Jisun mengk daapongam,
Ngo anya mwwpa do,
Nyic nyi gab gvda gvtwg meng num.

Bikkur
Hoqgab ngo daapongam paq tayin,
Kolam ngo amin naama deedib;
Daapongam ngo mwwjwl doo tayin,
Aal loog ngo nwrba swwg naa tayin.

2 Jisug sik daapongam,
Mwlwngv oiyum num,
Daapo si ngoq gab abynam jaqgo;
Pwnbog ko tuup jaqkv,
Mwwg dookam apaq pel,
Kaacbo Kalbaritol ham bvqc dvb.

3 Jisun mengk daapongam,
Mwwjwl ngo doo tayin,
Hoqg hvnyw mwlwngam baq tayin;
Aal loog ngam goq tayin,
Aado mwwg nam dookub,
Nwrba gob tol ngo dooba tayin.