ADAT KRISTIAN JADI MELAKI BINI Haribulan: 30.12.2023 Jam: 8.45 am Endur: Sacred Heart Cathedral, Sibu
Jaku Gerah 1. Parking ka moto kita enggau manah lalu padam ka injin kereta maya ba area gerija. 2. Anang segau-segau enggau anang ragak maya gawai missa. 3. Semina sida ke Katolik aja ti udah nerima sakramen nyambut Tubuh enggau Darah Kristus aja ulih nyambut maya komuni. 4. Minta semua muai uras sebedau mupuk pulai ari gerija. 5. Semua kaban belayan ti datai dipinta ke kitchen gerija sepengudah missa laban bisi makanan ringan disediaka. Pengumuman 1. Diminta semua hadirin untuk meletakkan kenderaan dengan betul tanpa menganggu keadaan trafik dan pastikan enjin kereta ditutup semasa berada di kawasan gerija. 2. Dilarang merayau-rayau dan membuat bising semasa perayaan ukaristi sedang dijalankan. 3. Hanya umat Katolik yang sudah menerima sakramen Tubuh dan Darah Kristus sahaja boleh menyambut semasa komuni. 4. Semua yang hadir diminta menjaga kebersihan kawasan gereja. Pastikan semua sampah dibuang sebelum meninggalkan gereja. 5. Selepas perayaan missa diadakan, diminta semua hadirin dijemput ke kitchen gereja untuk jamuan ringan.
1 Adat Kristian Jadi Melaki Bini Pengawa nyabung orang jadi melaki bini benung gawai misa. Kena nerang ka seduai tu pugu pengawa nya seduai dipesendi duduk berimbai. Seduai patut duduk chukup penyemak ari mua mija sembiang. Lebuh orang udah terenah magang, patut chermin gerempung orang Kristian dalam rumah panjai meri jaku selamat datai ngagai semua orang dia. Iya mega ngasuh sida enda nginsap, enda bejaku agi. Udah nya paderi bejaku munyi tu (ka chunto). MERI TABI NGAGAI ORANG MAIOH P: Kitai datai begempuru ditu deka nyabung orang jadi melaki bini. Kitai nemu enti Allah Taala enda nyukung pengawa kitai, tentu pengawa kitai enda nyadi. Nya alai awak ka semua kitai minta Allah Taala ngentap negap pengawa tu, ngambika iya enda rumbau, enda sabau, tang ngasuh iya nyadi, ngasuh menuku. SAMPI MUKA PENGAWA S: Dalam nama Apai, enggau Anak, enggau Roh Kudus. Amen. P: Tabi sereta basa ka semua kita. Allah Taala, Apai kitai ti di serega, Tuhan Jesus, Penebus dunya, enggau Roh Kudus, Pengidup mensia, deka datai, deka sangkai begulai sejalai enggau kitai semua, deka nulung nyukung kitai dalam pengawa kitai sabung jadi ka seduai tu di gerija
2 ba mua Allah Taala, sereta ba mua mensia di dunya. MINTA AMPUN KA PENYALAH P: Aram kitai sama sereta, beradu lalu besedia, ingat ka penyalah ti udah digaga jari, gaga kaki, penyalah ti salah pansut ari mulut, runding enggau ati. …………………… P: Tuhan, Nuan nyadi ka pengajar enggau penghulu kami. Tuhan, kasihka kami. S: Tuhan, kasihka kami. P: Tuhan, Nuan nyadi ka teladan pengerindu ngagai semua kami. Kristus, kasihka kami. S: Kristus, kasihka kami. P: Tuhan, Nuan nyadi ka jalai kami ngagai Apai. Tuhan, kasihka kami. S: Tuhan, kasihka kami. P: Awakka Allah Taala ti pemadu bekuasa, kasihka kitai, ngampun dosa kitai, lalu mai kitai ngagai pengidup ti meruan belama. S: Amen.
3 P: Mulia ka Allah Taala ba endur ti pemadu tinggi, S: lalu pemaik di dunya ke orang ti mentas. Kami muji nuan, kami ngemesaika nuan, kami nyembah nuan, kami ngemuliaka nuan, kami meri terima kasih ngagai nuan ketegal mulia nuan ti besai, Tuhan Allah Taala, Raja serega, O Allah Taala, Apai ti pemadu bekuasa. Tuhan Jesus Kristus, Ada Anak Tunggal, Tuhan Allah Taala, Anak Domba Allah Taala, Anak Apai, Nuan nanggung dosa dunya, kasihka kami; Nuan nanggung dosa dunya, terima sembiang kami; Nuan duduk ba sepiak kanan Apai, kasihka kami. Laban nuan aja siku ti Kudus, Nuan aja ti Tuhan, Nuan aja ti Pemadu Tinggi, Jesus Kristus, enggau Roh Kudus, dalam mulia Allah Taala Apai. Amen. P: Besembiang kitai. Apai, dinga sembiang kami ka JUDE ROY enggau KAREN ti sehari tu disabung jadi di mua mija sembiang Nuan. Beri ka seduai berekat Nuan lalu tetap ka pengerindu sida ka pangan diri. Kami minta tu ulih Jesus Kristus, Tuhan kami. S: Amen. JAKU ALLAH TAALA Bacha Keterubah O.P.: Bacha ari Surat Pemungkal (1:26-28;31)
4 Udah nya Allah Taala bejaku, “Aram Kitai ngaga mensia neladan gamal Kitai Empu, baka gamal Kitai Empu; lalu awakka sida bekuasa atas ikan, burung, enggau semua jelu di dunya tu, enggau semua utai ti ngerayap ba tanah. Nya alai Allah Taala ngaga mensia neladan gamal Iya Empu; Iya ngaga sida lelaki enggau indu. Allah Taala merekatka sida, lalu bejaku ngagai sida, “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.” Allah Taala meda semua utai ti udah digaga Iya manah magang. Lemai abis lalu pagi pen datai. Nya hari ti keenam. Jaku Tuhan. S: Terima kasih ke Allah Taala. Masmur ti ditulis di baruh tu tau diganti mega enggau nanyi. Masmur Entara (Masmur 128) S: Lantang senang anembiak Tuhan. T: Lantang meh semua orang ti nangi ka Tuhan, orang ti ngintu pesan Iya. S: Lantang senang anembiak Tuhan. T: Nuan tentu deka bulih semua utai ti diguna nuan Nuan deka lantang sereta mujur dalam pengawa. S: Lantang senang anembiak Tuhan. T: Bini nuan deka baka anggur ti lebat bebuah nguan rumah,
5 lalu bala anak nuan deka baka buah ara bekerindi ngelingi mija nuan. S: Lantang senang anembiak Tuhan. T: Orang ti ngasi ka Tuhan, tetap deka bulih berekat ti baka nya. S: Lantang senang anembiak Tuhan. T: Awak ka nuan gayu, lalu meda tubuh uchu! Lantang senang anembiak Tuhan. S: Lantang senang anembiak Tuhan. Bacha Kedua O.P.: Bacha ari Surat St. Paul ngagai orang di Rome (12:1-2, 9-18) Nya alai, menyadi, ulih pengasih Allah Taala, aku minta kita nyerahka tubuh kita nyadi piring ti idup, ti kudus, ti dikerinduka Allah Taala. Nya meh jalai kita patut nyembah Iya. Anang nitihka chara dunya, tang awakka Allah Taala ngubah chara kita berunding, ngambika kita nemu peneka Iya-iya nya utai ti badas, ti ngerinduka ati Iya, ti pemadu menyana. Rindu enggau pengabis ati; begedika penyai; bepegai teguh ba utai ti badas; rinduka pangan diri enggau ati ti angkun laban kita diri menyadi enggau pangan diri; awakka kita berebut ngayanka basa ngagai pangan diri. Anang lembau, seruran rajin nitihka Roh Kudus, bekereja ke Tuhan. Gaga ati ke pengadang kita, liat ati natka pemerinsa, majak besampi. Beri utai ngagai nembiak Tuhan ke suntuk, lalu sambut temuai ngagai rumah kita. Berekatka orang ke merinsaka kita; berekatka sida, anang nyumpah sida. Rami gaga enggau orang ke rami gaga, nyabak enggau orang ke nyabak. Diau bepangan enggau diri sama diri;
6 anang ngeninggika diri, tang begulai enggau orang ke baruh ati; anang sumbung. Anang malas penyai ngena penyai, tang kereja utai ti ngena dipeda semua orang. Enti ulih, seagi-agi utai nya bepanggai ba kita, diau bebaik enggau semua orang. Jaku Tuhan. S: Terima kasih ke Allah Taala. tauka: O.P.: Bacha ari Surat ti keterubah ari St. Peter (3:1-9) Baka nya mega kita ke bini: nunduk ngagai laki kita, ngambika enti sida enda ngasika jaku Allah Taala, sekeda sida ulih dibai arap ketegal ulah kita, ukai ketegal jaku kita, lebuh sida meda pengudus enggau pemadas ulah kita. Pemajik kitai ukai datai ari utai ti ulih dipeda, baka jalai kita ngaduka buk kita, tauka bekenaka perengka emas, tauka gari, tang awakka pemajik kita datai ari ati kita ti bendar, ti enda nemu luya, ti nelap sereta imun, ti pemadu berega di mua Allah Taala. Nya meh chara sida indu ke kudus dulu kelia, ke manggaika pengadang sida ba Allah Taala, ngias diri kena sida nunduk ngagai laki sida. Baka nya ku jalai Sarah ngasika Abraham, lalu ngumbai Abraham tuan iya. Kita anak Sarah, enti kita ngereja utai ti ngena lalu enda takutka sebarang utai. Baka nya mega kita ke laki, kita enda tau enda siru enggau bini kita, lalu bebasaka sida laban sida iya indu sereta lemi agi ari kita, laban sida mega sama enggau kita bempu pengidup ti diberi Allah Taala, ngambika nadai utai nekul sampi kita. Ke pengujung iya, semua kita enda tau enda segempung dalam roh, siruka pangan diri, rinduka pangan diri, nelap enggau pangan diri, sereta baruh ati. Anang malas penyai ngena penyai, tauka jaku kelese ngena jaku kelese, tang balas jaku kelese ngena
7 jaku berekat. Tu meh kebuah kita dikangau – ngambika kita bulih berekat. Jaku Tuhan. S: Terima kasih ke Allah Taala. tauka: O.P.: Bacha ari Surat ti keterubah ari St. John (4:7-12) Menyadi, aram kitai rinduka pangan diri, laban pengerindu datai ari Allah Taala. Semua orang ke rinduka pangan diri endang anak Allah Taala, lalu ngelala Allah Taala. Barang sapa enda rinduka pangan diri, enda ngelala Allah Taala, laban Allah Taala endang pengerindu. Baka tu ku jalai pengerindu Allah Taala udah dipandangka ngagai kitai: Iya udah ngirumka Anak Tunggal Iya ngagai dunya, ngambika kitai tau idup ulih Iya. Tu meh pengerindu, ukai reti nya kitai udah rinduka Allah Taala, tang Iya udah rinduka kitai, lalu udah ngirumka Anak Iya nyadika piring kena muai dosa kitai. Menyadi, laban Allah Taala udah balat rinduka kitai, kitai mega patut rinduka pangan diri. Nadai orang udah kala meda Allah Taala, tang enti kitai rinduka pangan diri, Allah Taala meruan dalam kitai, lalu pengerindu Iya digaga nyadi pemadu badas dalam kitai. Jaku Tuhan. S: Terima kasih ke Allah Taala. Aklamasi Injil 1. Alleluia, Alleluia. Nyadi iya ti meruan dalam pengerindu, Meruan dalam Allah Taala,
8 Lalu Allah Taala meruan dalam iya. Alleluia. 2. Alleluia, Alleluia. Semua orang ti rindu, Sida diperanak ulih Allah Taala Lalu nemu Allah Taala. Alleluia. 3. Alleluia, Alleluia. Enti kitai rindu ka diri sama diri Allah Taala meruan dalam kitai, Lalu ati kitai rindu bendar ka Iya. Alleluia. Bacha Injil P: Tuhan enggau kita. S: Lalu enggau roh nuan. P: Bacha ari Injil Kudus nitihka St. Mark (10:6-9). S: Mulia ke nuan, O Tuhan. Tang kenyau ari penumbuh dunya, ‘Allah Taala ngaga mensia lelaki enggau indu.’ Ketegal nya, lelaki deka ninggalka apai indai iya, lalu begulai enggau bini iya, lalu seduai iya deka nyadi setubuh. Nya alai, seduai iya ukai dua iku agi, tang siku. Nya alai, nadai orang tau nyeraraka utai ti udah ditampilka Allah Taala. P: Injil Tuhan. S: Puji ke nuan, Tuhan Jesus Kristus. tauka: P: Tuhan enggau kita. S: Lalu enggau roh nuan.
9 P: Bacha ari Injil Kudus nitihka St. Matthew (7:21,24-29) S: Mulia ke nuan, O Tuhan. “Ukai semua orang ke ngangauka Aku ‘Tuhan, Tuhan’ deka tama ngagai Perintah serega, tang semina orang ke ngereja peneka Apai Aku ti di serega.” “Nya alai, orang ke ninga jaku Aku lalu ngasi nya baka orang siku ke pintar, ke nirika rumah iya ba atas batu. Hari ujan, ai bah, lalu ribut bepuput lalu mangka ngagai rumah nya, tang rumah nya enda tumbang, laban iya didirika ba atas batu. “Tang orang ke ninga jaku Aku, lalu enda ngasi, nya baka orang ke beli, ke nirika rumah iya ba pasir. Hari ujan, ai bah, lalu ribut bepuput lalu mangka ngagai rumah nya, lalu rumah nya tumbang. Balat amat rumah nya tumbang.” Lebuh Jesus udah nyebut jaku nya, orang mayuh alit ati ke ajar Iya, laban Iya ngajar sida baka orang ke bisi kuasa, lalu enda baka sida pengajar Adat. P: Injil Tuhan. S: Puji ke nuan, Tuhan Jesus Kristus. tauka: P: Tuhan enggau kita. S: Lalu enggau roh nuan. P: Bacha ari Injil Kudus nitihka St. John (15:12-16) S: Mulia ke nuan, O Tuhan. Tu pesan Aku: rinduka pangan diri, baka Aku ke udah rinduka kita. Nadai orang ngembuan pengerindu ti besai agi ari tu, datai ke iya nyerahka nyawa diri ke pangan iya. Kita pangan Aku enti kita ngasika pesan Aku. Aku enda agi ngumbai kita ulun, laban
10 ulun enda nemu utai ti dikereja tuan iya. Tang Aku udah ngumbai kita pangan, laban Aku udah madah ngagai kita semua utai ti didinga Aku ari Apai. Ukai kita ke milih Aku, tang Aku ke milih kita, lalu ngasuh kita bejalai lalu bebuah lebat, buah ti tan. Nya baru Apai deka meri ngagai kita sebarang utai ti dipinta kita ari Iya dalam nama Aku. P: Injil Tuhan. S: Puji ke nuan, Tuhan Jesus Kristus. TANYA KA PENEKA Lebuh paderi udah meri jaku ajar, iya bejaku munyi tu: P: Menyadi, seduai datai begulai ditu ngambi Tuhan ulih netap lalu ngering ka pengerindu seduai ka pangan diri aba mua paderi enggau bala kaban gerija. Jesus Kristus endang meri berekat Iya enggau penuh ka pengerindu ka bansa tu. Iya udah milih sereta nuchi seduai maya seduai dibasu pala, lalu diatu iya nambah lalu ngering ka pengarap seduai enggau sakramenta sabung jadi ngambika seduai ulih netapka diri jadi melaki bini, betul ati enggau diri sama diri belama- lama. Nya alai aku, ngari ka Gerija Allah Taala, nanya ka kebuah seduai ti ka jadi enggau pangan. Paderi nanya ka orang laki dulu: P: JUDE ROY aku nanya nuan: Kati bisi nuan udah berunding ngabas ati diri enggau Allah Taala? L: Bisi.
11 P: Kati nuan kitu ka jadi enggau tunang nuan tu, ari ati diri empu tauka ari asuh orang? L: Ari ati diri empu. P: Deka nuan rinduka bini nuan, bebasaka iya, lalu begulai sejalai enggau iya nyentukka parai? L: Ka. P: Deka nuan nyanggup semua anak ti ka diberi Allah Taala ka seduai sereta nupi sida nunda enggi apai orang Kristian? L: Ka. Udah nya paderi nanya ngagai orang indu: P: KAREN aku nanya nuan: Kati bisi nuan udah berunding ngabas ati diri enggau Allah Taala? I: Bisi. P: Kati nuan kitu ka jadi enggau tunang nuan tu, ari ati diri empu tauka ari asuh orang? I: Ari ati diri empu. P: Deka nuan rinduka laki nuan, bebasaka iya, lalu begulai sejalai enggau iya nyentukka parai? I: Ka. P: Deka nuan nyanggup semua anak ti ka diberi Allah Taala ka seduai sereta nupi sida nunda enggi indai orang Kristian? I: Ka.
12 SEMPEKAT P: Diatu seduai ka jadi enggau pangan nitihka peneka ati diri, nya alai bepegai jari kanan, lalu ngaku di mua Allah Taala enggau Gerija iya. JUDE ROY kati nuan amat ka ngambi KAREN ka bini nuan? Kati nuan amat ka jadi enggau iya, rindu sereta bebasaka iya seumur-umur nuan idup, lebuh maya senang, tauka tusah, lebuh maya tabin tauka gerai? L: Amat. KAREN kati nuan amat ka ngambi JUDE ROY ka laki nuan? Kati nuan amat ka jadi enggau iya, rindu sereta bebasaka iya seumur-umur nuan idup, lebuh maya senang, tauka tusah, lebuh maya tabin tauka gerai? I: Amat. PENERANG P: Ngarika Gerija, aku ngemendar ka sempekat ti digaga seduai tu tadi, lalu merekat iya: Dalam nama Apai, enggau Anak, enggau Roh Kudus. S: Amen. P: Nyadi semua kita ti enggau ditu diambi aku nyadika saksi sempekat kudus tu. “Mensia enda tau sekali-kali nyerara utai ti udah dipegulaika Allah Taala.”
13 BEREKAT TINCHIN Paderi merekatka tinchin seduai, ngambika seduai selalu ingatka semaya ti digaga seduai enggau diri sama diri. P: Tuhan, berekat tinchin dua bentuk tu, ti diberekat kami + dalam Nama nuan. Asuh seduai ti ngena iya selalu rindu sereta arapka pangan enggau ati ti betul amat. Awakka seduai selalu ingatka semaya enggau Nuan lalu selalu diau begulai senang lantang dalam pengerindu. Tu dipinta kami ulih Jesus Kristus Tuhan kami. S: Amen. BERASUK KA TINCHIN P: Nyadi laban seduai tu sama bela ka jadi melaki bini amat, nya alai rasukka tinchin tu ngagai diri sama diri ka tanda semaya enda sarak. Diatu paderi nyua tinchin ti enggi indu ka laki lalu laki nya ngerasuk tinchin ngagai tunjuk bini iya. Nyereta nya laki nyebut nunda paderi: P+L: KAREN ambi tinchin tu ka tanda pengerindu enggau pengangkun ati aku ka nuan. Dalam nama Apai, enggau Anak, enggau Roh Kudus. Udah nya, indu disua paderi tinchin ti enggi laki, lalu ngerasuk iya ngagai tunjuk laki iya. Nyereta nya iya nyebut, nunda paderi: P+L: JUDE ROY ambi tinchin tu ka tanda pengerindu enggau pengangkun ati aku ka Nuan. Dalam nama Apai, enggau Anak, enggau Roh Kudus.
14 NGAKU PENGARAP P: Kami arapka Allah Taala, S: Apai ti pemadu bekuasa, Pengaga serega enggau dunya, lalu arapka Jesus Kristus, Anak Tunggal iya, Tuhan kitai, ti dikandung ari Roh Kudus diadaka Maria Dara Bungas, merinsa rambau Pontius Pilatus, diregang, parai lalu dikubur; iya nurun ngagai neraka; ba hari ti ketiga iya angkat baru ari pemarai; iya niki ke serega, lalu duduk ba sepiak kanan Allah Taala, Apai ti pemadu bekuasa; ari nya iya deka datai ngakim semua ti idup enggau ti parai. Aku arapka Roh Kudus, Gerija katolik ti kudus, saum orang Sante, pengampun dosa, pengangkat tubuh, enggau pengidup ti meruan belama. Amen. SEMBIANG PEMINTA P: Aram kitai besembiang ngagai Allah Taala Apai ti udah ngasuh seduai tu begulai enggau diri sama diri ngagai pengidup ti baru. O.P.: Awakka kitai besembiang ngambika JUDE ROY enggau KAREN ti udah dipegulai enggau sakramenta sabung jadi diatu, tau bulih pengelantang ti amat ti enggi orang Kristian. Tuhan, dingaka kami. S: Tuhan, sambut peminta kami.
15 O.P.: Awakka kitai besembiang ngambi seduai tau mansang dalam pengerindu enggau pemereti ati ngagai pangan diri. Tuhan, dingaka kami. S: Tuhan, sambut peminta kami. O.P.: Awakka kitai besembiang ngambi bilik baru seduai tau nyadi teladan bilik orang Kristian ti manah dipeda orang. Tuhan, dingaka kami. S: Tuhan, sambut peminta kami. O.P.: Awakka kitai besembiang ngambi seduai nerima, enggau ati ti lantang sereta gaga, lalu ngidup nupi bala anak ti ka diberi Allah Taala ngagai seduai, ngambi sida tau nyadi orang Kristian ti badas. Tuhan, dingaka kami. S: Tuhan, sambut peminta kami. P: O Allah Taala, Nuan ti pun penatai semua pengerindu, tulung seduai ti baru jadi tu, ngambika nemu ngatur ruang bilik ka teladan pendiau orang Kristian ti bendar. Kami minta tu ulih Jesus Kristus, Tuhan kami. S: Amen. SEMBIANG NENGKIRA Nyadi diatu bungai pinang (ti begulai enggau pinang) dalam baku lalu disua ngagai paderi. Roti enggau ai anggur lalu disediaka. P: Besembiang bala menyadi, ngambika piring aku enggau enggi kita, tau diterima Allah Taala, Apai ti pemadu bekuasa. S: Awakka Tuhan nerima piring ba jari nuan ke puji enggau mulia nama iya, ke pemanah kami enggau
16 ke pemanah Gerija kudus iya. P: O Tuhan, sambut pemeri kami ketegal sida, ti baru udah disabung jadi JUDE ROY enggau KAREN Ulih pengerindu sereta penau Nuan, Nuan udah mai seduai begulai; diatu berekat seduai seumur-umur seduai begulai. Kami minta tu ulih Jesus Kristus, Tuhan kami. S: Amen. SEMBIANG UKARISTIA P: Tuhan enggau kita. S: Lalu enggau roh nuan. P: Serahka ati kita. S: Kami nyerahka iya ngagai Tuhan. P: Aram kitai meri terima kasih ngagai Tuhan Allah Taala kitai. S: Nya sigi ngena sereta patut. P: Endang betul amat sereta patut, sigi pengawa enggau penyelamat kami, selalu enggau di sebarang endur meri terima kasih ngagai nuan, Apai ti pemadu kudus, ulih Anak ti dikarindu nuan, Jesus Kristus, ti Jaku nuan, ulih iya, nuan ngaga semua utai, ti diasuh nuan datai nyadi Pengelepas enggau Penebus kami, nyadi mensia ulih Roh Kudus, lalu diadaka Dara Bungas.
17 Ngamatka peneka nuan, lalu ngulihka nuan siti raban mensia ti kudus, iya entepaka jari ngenatka pemerinsa enggau pemarai, kena mutuska kaul pemati lalu ngayanka pengangkat. Nya alai, begulai enggau bala Melikat enggau semua bala orang Sante kami senyawa muji madahka mulia nuan: S: Kudus, Kudus, Kudus Tuhan Allah Taala bala semua Serega enggau dunya penuh enggau mulia nuan. Hosana enggau pengambis tinggi. Beberekat meh iya ti datai dalam nama Tuhan. Hosanna enggau pengambis tinggi. P: Nuan endang amat kudus, O Tuhan, pun semua pengudus. Nya alai, gaga kudus, pemeri tu, kami besembiang, turunka Roh Nuan baka ambun pagi atas sida, ngambika tau nyadi ke kami Tubuh enggau Darah Tuhan kami Jesus Kristus. Jam iya dibudi, lalu ari peneka iya empu, iya tama ke dalam pemerinsa enggau pemarai iya, iya nyengkau roti lalu, meri terima kasih, mechahka iya, lalu nyua nya ngagai murid iya, nyebut:
18 AMBI TU, SEMUA KITA, LALU EMPA IYA, LABAN TU TUBUH AKU, TI DEKA DISERAH KETEGAL KITA. Baka nya mega, maya makai malam udah tembu, iya nyengkau mangkuk chalice, lalu, sekali da meri terima kasih, iya nyua nya ngagai murid iya, nyebut: AMBI TU, SEMUA KITA, LALU IRUP ARI IYA, LABAN TU CHALICE DARAH AKU, DARAH SEMPEKAT TI BARU SERETA MERUAN, TI DEKA DIPANSUT KETEGAL KITA ENGGAU BALA MAYUH, KE PENGAMPUN DOSA. GAGA TU KENA NGINGATKA AKU. P: Misteria pengarap. S: Kami meritaka Pemarai nuan, O Tuhan, lalu ngaku Pengangkat nuan, nyentukka nuan datai baru. (tauka) Maya kami makai Roti tu, lalu ngirup ari Chalice tu, kami meritaka Pemarai nuan, O Tuhan, nyentukka nuan datai baru. (tauka) Selamatka kami, Pengelepas dunya, laban ulih Regang enggau Pengangkat nuan,
19 nuan udah ngelepaska kami. P: Nya alai, dikena kami ngintu pengawa mulaika pengingat pemarai enggau pengangkat Iya, kami nyua ngagai nuan, Tuhan, Roti pengidup enggau Chalice penyelamat, meri terima kasih laban nuan udah ngumbai kami aruh betunga mua enggau nuan lalu mela nuan. Enggau ati ensuruk kami besembiang ngambika kami, ti ngambi bagi ba Tubuh enggau Darah Kristus, tau begempung nyadi siti ulih Roh Kudus. Ingat, Tuhan, Gerija nuan, ngelekai di serata dunya, lalu bai iya ngagai pementas ti penuh, begulai enggau Pope kami N. enggau Bishop kami N. enggau semua bala clergy. Ingatka mega bala menyadi kami ti udah tinduk belelak andal ke Pengangkat, enggau semua sida ti udah parai dalam pengasih nuan: sambut sida ke dalam penampak mua nuan. Kami besembiang, kasih meh ke semua kami, ngambika begulai enggau
20 Maria Dara Bungas ti Beberekat, Indai Allah Taala, enggau Joseph ti Beberekat, laki iya, enggau bala Rasul ti beberekat, enggau semua orang Sante ti udah ngelantangka ati nuan sepemanjai rebak, awakka kami aruh sama enggau bempu pesaka pengidup meruan, lalu tau muji sereta ngemuliaka nuan beseruanka Anak nuan, Jesus Kristus. NENGAH IYA, LALU ENGGAU IYA, SERETA DALAM IYA, O ALLAH TAALA, APAI TI PEMADU BEKUASA, DALAM PENYERAKUP ROH KUDUS, SEMUA MULIA ENGGAU BASA ENGGI NUAN, DATAI KE SELAMA-LAMA IYA. S: Amen. SEMBIANG TUHAN P: Ari padah Pengelepas lalu ditempa ulih ajar petara, kitai kempang nyebut: S: Apai kami, ti di serega, kudus meh nama nuan;
21 datai meh perintah nuan, nyadi meh peneka nuan di dunya baka di serega. Beri ke kami seharitu numbas ke pemakai kami, lalu ampun dosa kami, baka kami ngampun orang ti salah ngelaban kami; lalu anang ngelakka kami kena penguji, tang lepaska kami ari penyai. P: O Tuhan, kami besembiang, lepaska kami ari semua penyai. Ulih pemanah nuan, beri ke kami pemaik seumur pengidup kami, ngambika ulih ditulung pengasih nuan, kami selalu lepas ari dosa, lalu likun ari semua penusah, sekumbang kami nganti pengandal beberekat enggau penatai Pengelepas kami, Jesus Kristus. S: Laban perintah, kuasa enggau mulia endang enggi nuan, diatu, datai ke selama iya. SAMPI BEREKAT P: Menyadi, aram kitai besembiang ngagai Allah Taala ka JUDE ROY enggau KAREN ngambi Iya seruran meri berekat Iya ngagai seduai. (sunyi enda lama)
22 Allah Taala, Apai ti bangat kudus, Nuan ngaga semua utai, ngaga orang laki enggau indu neladan Nuan empu. Nuan pun penyenang orang ti belaki bebini. Kami besembiang ngagai Nuan ka orang indu tu ti dipegulai ka seharitu enggau laki iya dalam sakramenta sabung jadi. Awakka berekat Nuan nyadi amat ba iya enggau laki iya ngambi seduai iya sama bela gaga ati nerima pemeri Nuan. Tuhan, awakka seduai iya sama muji Nuan lebuh maya senang, lalu malik asuh Nuan lebuh kena tuntung penusah. Awakka seduai gaga ati nemu diri bisi kena tulung Nuan dalam kereja lalu nemu Nuan selalu enggau seduai. Awakka seduai selalu besembiang ngagai Nuan begulai enggau bala kaban Gerija Nuan, ngambika seduai tau nyadika saksi pengerindu Nuan ngagai dunya. Awakka seduai panjai umur nguan menua lalu datai jemah ila ke dalam perintah Serega. Kami minta tu ulih Jesus Kristus, Tuhan kami. S: Amen TANDA PEMAIK P: Tuhan Jesus Kristus, nuan udah nyebut ngagai bala Rasul: Pemaik ditinggal aku ke kita, pemaik aku diberi ke kita, anang meda dosa kami, tang peda pengarap Gerija nuan,
23 lalu ulih pemanah nuan beri ke iya pemaik enggau penyerakup nitihka peneka nuan, ti idup lalu merintah ke selama-lama iya. S: Amen. P: Pemaik Tuhan selalu enggau kita. S: Lalu enggau roh nuan. P: Aram kitai meri tanda pemaik ngagai diri sama diri. MECHAHKA ROTI Anak domba Allah Taala, nuan nanggung dosa dunya, kasihka kami. Anak domba Allah Taala, nuan nanggung dosa dunya, kasihka kami. Anak domba Allah Taala, nuan nanggung dosa dunya, beri ke kami pemaik. COMMUNION P: Peda, tu Anak Domba Allah Taala, tu meh iya ti nanggung dosa dunya. Beberekat meh sida ke dikangau datai ngagai makai malam Anak Domba. S: Tuhan, aku enda patut endur nuan datai, tang sebut aja Jaku, semengat aku deka suman.
24 SAMPI SEBEDAU NYAMBUT Seduai melaki bini dikemendar nyambut Tubuh enggau Darah Tuhan Jesus, dalam gamal roti enggau ai anggur. Patut tu diterangka dulu ngagai orang mayuh sebedau pengawa belabuh. SEMBIANG UDAH NYAMBUT P: Besembiang kitai: O Tuhan, ulih pengerindu Nuan, Nuan udah meri ka kami Ukaristia tu, ngambika kami begulai sejalai enggau pangan diri lalu enggau Nuan. Laban Nuan udah ngasuh JUDE ROY enggau KAREN nyadi tubuh siku ulih sakramenta sabung jadi, diatu asuh seduai seati dalam pengerindu ngagai pangan diri. Kami minta tu ulih Jesus Kristus, Tuhan kami. S: Amen. NUTUP PENGAWA P: Tuhan enggau kita. S: Lalu enggau roh nuan. P: Awakka Allah Taala, Apai ti meruan, ngibun seduai dalam pengerindu ngagai pangan diri ngambi pengelantang Kristus meruan enggau kita lalu selalu bisi ba bilik kita. S: Amen. P: Awakka seduai selalu nyadi saksi ka pengerindu Allah Taala di dunya tu ngambi sida ti tabin enggau sida ti
25 umang ngelala kita orang ti mentas lalu ngaluka kita dalam pengelantang serega. S: Amen. P: Lalu awakka Allah Taala ti pemadu bekuasa merekat kita, Apai enggau Anak, enggau Roh Kudus. S: Amen. P: Sembiang Misa udah tembu, aku arapka seduai ngingatka sempekat ti digaga di mua Allah Taala lalu betuaika Iya belama. S: Terima kasih ke Allah Taala. MELAH PINANG Diatu buah pinang ti dalam baku dibelah. Tu kena nerangka pengawa jadi melaki bini. Tang tu ukai pengawa kena nyabung seduai jadi melaki bini, iya semina madah, nerangka pengawa aja. Terima Kasih ke sokong enggau pengerindu kita semua ke udah sampal datai ngerami lalu bersembahyang ka kenduai melakibini. Ngarapka berkat enggau pengerindu Allah Taala selalu begulai enggau semua kitai – ari pengantin seari Roy & Karen.