PAPANDIRAN ACIL IZAK LAWAN ACIL TIZEN

Papandiran Acil Izak Lawan Acil Tizen Di Palatar.

Assalamu’alaikum, napa di ulah ujar Acil Tizen manyarang ka rumah
Acil Izak.

Wa’alaikum salam…

Nah… ujar Acil Izak tukang uji kasabaran datang.
Bismillahirrahmaanirrahiim. Ya Allah berilah hambamu ini patunjuk
ujar Acil Izak sambil mambuka lawang.

Acil Izak: Napa ti habar cil,,,

Acil Tizen: Hai pusang aku kam di rumah, tasalah tarus.

Acil Izak: tasalah napa pian?

Acil Tizen: Aku malajari anak banyanyi yatu di muntungi sidin.
Napang muntung sidin, acil Izak panasaran.
Tahu, kada paham jua aku, acil Tizen makin mamusang.
Acil Izak: Pian malajari anak banyanyi napa gerang.
Acil Tizen: Aku malajari anak banyanyi cicak – cicak di dinding.
Acil izak: Napa salah nya jer sidin.
Acil Tizen: Lagunya tu kalu kaya ini,
Cicak – cicak di dinding diam - diam merayap datang seekor nyamuk
hap lalu ditangkap.

Acil izak: Imbah pang napa salahnya ujar mintuha pian.

Ujar sidin napang Ikam Zainab malajari anak lagu nitu kadada
faedahnya. Lihatakan ha Inya, nang cacak manangkap nyamuk ah,
manangkap lalat ah, itu urusan cacak, Napa Ikam baurusi hidup
cacak ujar Sidin.

Hah,,,Kada paham aku lawan sidin ne, ujar acil Tizen sambil
mangucak hidung.

Acil izak: bila urang tuha bapandir tu pasti ada bujurnya, karena sidin
sudah banyak makan asam garam. Tapi takadang kita nang anum ne
kada hampai mamikirakan.

Acil Tizen: baulai kapala kada kawa aku mamaham. Kadada nang
salah klu lagunya pas haja. Cuba ha pikirakan. Han klo kada nyaman
- nyaman sarumah lawan mintuha, tasalah tarus. Cuma aku ne kada
handak mahalangi laki untuk mencapai syurganya melalui bakti lawan
kuitannya.

Acil izak: beh... Syurga jua gassn pian cil ae...

Acil tizen: aamiin. aku kasini ne kada handak tahual lawan mintuha.
Mun aku bagana di rumah klu pina tasahuti ku. Inya nang kada –
kada haja kam Sidin tu. Nang samacam lagu tu ti han napa salahnya.

Acil izak: mungkin maksud sidin jangan malajari lagu nang kaya itu,
Jaka lagu - lagu Islami mungkin kahandak sidin tu.

Acil Tizen: Sudah ay jua ku lajari lagu - lagu Islami, kada nang lagu
cacak haja ah. Maksud ku tu supaya bavariasi. Nyaman inya bila
masuk sakulah TK bisa sudah, kada nganga – nganga.

Pian padahi kaya itu lah mintuha pian, jer Acil izak.

Sudah....., tapi napa nah sasahutan sidin,

“hidup itu hanya sekali, kesempatan kada datang dua kali. Jangan sia
- siakan setiap detik waktu yang diberi supaya ikam kada tamasuk
orang nang merugi”, uujah. Han.. aku memadahakan alasannya sidin
malah baulah puisi.

Acil izak: Kadanya meolah puisi pang, itu mamadahi pian dengan cara
yang romantis, supaya sekecil apapun gawian kita amun kawa
bamanfaat.

Acil tizen: paham ikam leh lawan sidin. Pina sehati banar lawan
mintuha ku, Napa neh. Asal ikam tahu lah, sidin tu bisi anak saikung
lakiku haja. Jangan pina – pina, apa kada bakawan lagi kita. Jangan
handak pagar makan tanaman ha... Apalagi laki ku sudah bajanji jua,
tidak akan mendua meski langit terbelah dua, ujarnya. Biar ikam
maambil hati mintuha ku kada bataha laki ku ka lain. Mana gerang
bungasnya ikam lawan aku.

Acil Izak: inggh nyata banar bungas pian. Ulun ne napa da. Pian ne
jangan su uzun haja lawan Ulun. Kita ne kan besti kada bataha lun
menghianati... Apalagi lun sudah beisi laki.

Eh lun lihat pina rame urang tulakan, kamana an lah urang, Acil Izak
mengubah topik pembicaraan.

Acil Tizen: Nah ikam kada tahu ah. Urang rami tulakan ka Mr. Di A
Yaw. Aku samalam tulakan lawan bapanya.

Umay, mesranya acil… han urang bungas, kalu disayangi laki….
Untung banar pian cil ae… ujar Acil Izak manyahuti.

Cah ay, inya aku gagarunum banarai klu ah mati aku dibawanya.

Rami jurut - jurutan urang ka Mr. Di A Yaw. Nang kaya saurang ne
pabila jua kah kawa kaya urang jua tulakan ujar ku gagarunum
dirumah. Muyak luku bapanya mandangar, ikam handakah umanya,
ayu nah kita tulakan jua cuci mata ka Mr. Di A Yaw jer. Uma aku kam
kada kisah ae batitilambung kasukaan dibawai bapanya tulakan.
Singkat kisah sampai di Mr. Di A Yaw. Umaaaa sakalinya disitu,
rambang mataku asa handak ku tukari barataan. Tp aku ne sadar diri
haja pang ngaran laki ne kada panduitan kaya urang, dalam hatiku
aku nukar kambang barang nah.

Imbah pang cil kambang nang kayapa nang pian tukar? acil Izak
panasaran.

Dangari hulu nah kisah ku, ikam ne badadahulu batakun.

Aku lihat rami status urang bagambar di kambang, sambung acil
Tizen….

Uuu bapanya, ujar ku,,, futuakan ulun nam dikambang nang banyak
ni nah. Ayu lakasi nah aku memutuakan ujar bapanya.

Cekrek … cekrek… han biniku ne dasar bungas ujar bapaya kam, asa
salah tingkah aku dipuji – puji bapanya.

Acil Izak: amun dasar bujur jua ujar laki pian tu. Bunga desa jua tuh
bahari.

Sambil lihum bapair acil Tizen manyambung kisah. Lagi kah umanya
jer, ayuha ampih ah bapamu ae banyak hudah nah kaina hibak
memori, maklum hp jadul kada tapi banyak memorinya kada kaya hp

wahini ah hp sorang ne. Mun Hp urang tu cap apal baigut, pun sorang
ne barang ae cap rugut. Syukur jua Han beisi hp, kawa haja tuh jua
baulah status. .......

"Rambang mata, bingung mamilih @Mr. Di A Yaw" ujar Acil Tizen
beolah status.

Melihat kambang nang langkar – langkar lalu ae aku ne pilih pilih, ujar
ku nu bapanya, nang ini bagus lah bapanya? Bagus banar, meitihi
inya lawan haraganya, imbah itu ujarnya shalawati umanya ae jer.

Naik pulang ka lantai dua, uma makin lapar mata malihat, sagala
peralatan mulai paralatan dapur sampai parabut palatar sakalinya,
cuma itu tih, pabila aku manjapai barang, shalawati umanya ae jer.

Aku manjanaki barang pina lawas haja gen sudah am disuruhnya
manyalawati.

Ujahku… Bapamu ne bapala, mun kada handak menukaraakan tu
kada usah mambawai diaku bapamu ae.

Urang hibak karanjang, ada saurang ... hanya mampu untuk
memandang.

(Atikah: han… mangaluar kata – kata Acil Tizen)

Acil izak: bujur haja laki pian tu, mulai pamulaan sidin mambawai
pian ka Mr. Di A Yaw gasan cuci mata, kada gasan batutukar.

Acil Tizen: Jaka ti jajarat rambut barang aku di tukarkan ada jua, kada
ada handak manyanangakan hati bini. Han klo sadang, mun ditulis
kada mayu karatasnya kisah ku ne.

Acil izak: kadanya kayatu pank cil ae, kada salah kada laki pian
manyuruh bashalawat tu. Mun dipandang dari haraganya, alahan lagi
pada nang pian handaki. Nyata banar ganal shalawat haraganya di
banding barang nang pian handaki, apalagi hanya sekedar jajarat
rambut.

Pahamannya tu cil ae shalawat nang ganal haraganya haja sanggup
pian mandapatkan, apalagi mun barang di Mr. Di A Yaw ha, gampang
banar bagi Allah mammbarii mun sidin bakahandak.

Acil Tizen: Ikam ne ku dangar aur lakiku ha nang bujur, kada mau aku
nang bujur. Napa ikam handak lawan laki ku ah, maka mambila laki
ku tarus. Mantangan laki ku bungas, sakampungan ne apa lakiku
pambubungasnya, Cuba ha kam itihi tunggal ikungan laki - laki urang
dikampung ne.

Acil izak: baapa lun meitihi laki urang cil... cil... Jaka lun meitihi laki
lun sorang nyaman bapahala. Meitihi laki dengan rasa cinta itu
bapahala, mun meitihi laki urang dengan rasa sayang itu berbahayyya.

( Atikah: asseek…bisa jua acil izak sakalinya…)

Harau tasalah tarus aku ujar Acil izak, aasa garigitan aku, Mun ku
turut akan kada lagi aku mangawani Acil Tizen ne. Tagal asa maras,

babarataan tetangga kulir taparak sidin ne, inya kaya ini ti pang
lakun, ujar Acil Izak dalam hati.

Acil izak: ambil hikmahnya haja cil ae, jaka pian kada tulakan saku
kada tabaca shalawat nah. Inya kada saitu saini kada cil ae manfaat
kita membaca shalawat tu. Cuba ha lah pian amalakan shalawat tu
nah hari - hari, biar kada banyak tapi istiqamah jer urang tu, 40 hari
haja nah pian cubaakan insyaAllah karasaan tu.

Acil Tizen: karasaan napa, rajaki batambah leh…?

Acil izak: inggih.

Acil Tizen: Umay... Shalawat napa? Shalawat kamilah kah, shalawat
Nariyah kah, shalawat Ibrahimiyah kah, shalawat Al ‘Alil Qadri kah,

Shalawat Ummiy kah, shalawat Jibril kah, dalail kah atau shalawat
nang mana kah?

(Atikah: han tahu banar sidin, mantap Acil Tizen, lanjut… )

Acil izak: ay tasarah pian haja nang pian asa kawa tabaca hari - hari.

Acil Tizen: way kaitu ah, napa Ikam hanyar haja mamadahakan, Jaka
mulai babahari... catida sugih aku sudah. Kada sawat kusung
karanjangku ka Mr. Di A Yaw.

Uma…. aku kam asa supan haja ah, bulik kada babawaan apa – apa,
urang maka am asing – asingnya baingkutan palastik putih. Ada
saurang... Hah parayy....

Acil tizen manapak dahi sambil uling – uling sapi.

Acil Izak: rajaki tu cil ae kada nang masalah duit lawan kasugihan haja
pang, hati tantram, lawan laki baakuran, anak paasian, awak sihatan,
itu rajaki jua ngarannya. Cuba pian garing, barapa duit habis gasan
batatamba, balum lagi maarit sakitnya. Han.. makanya kita tu disuruh
banyak syukur.

Acil Tizen: Ikam mamadahakan aku kada bisa basyukur ah, aku
basyukur banar sudah. Baisi anak aku basyukur, awak sihat aku
basyukur, beisi laki nang ada ne gen aku basyukur, matinya am aku
kadada mamaksa laki tulakan ka Mr. Di A Yaw, Inya saurang
mambawai. Kadada jua aku mamaksa minta tukarkan napa – napa di
situ ti, tu bukti aku basyukur lawan laki, kada manuntut macam -
macam aku. Salain nang sabuting.

Acil Izak: napa tu cil…

Acil Tizen: jangan di puligami. Aku kada menentang puligami, tapi aku
kada sanggup mun dipuligami.

(Atikah : akuuur…)

Tapi nang ngaran aku ne bibinian leh, sambung Acil TIzen pulang,
wajar kalu beisi nafsu handak batutukar... Tapi han sanggup haja aku
maarit. Maksud ku tu laki neh, kadada ah handak mahimungi bini.
Jaka paraya aku dibawai amun anggaran hujungnya hati kaciwa.

Acil izak ne ngaran sasama bibinian asa marista jua mandangar Acil
Tizen curhat. Jadi ujar Acil izak baucap sambil manyapui mata nang
berkaca - kaca, makanya jer tuan guru tu cil ae jangan sakali – kali

baharap lawan makhluk, makhluk ne saraba kakurangan, kada
sempurna dan kadada kuasa apa - apa. Cuba baharap tu lawan nang
saraba baisian, nang Maha Sempurna, Nang Maha Kaya yaitu Allah.

Acil Tizen: dimapa caranya?

Acil izak: gampang banar, banyaki bado'a. Khusyuk dan yakin pulang
pian dengan do'a pian tuh InsyaAllah apa nang menjadi hajat pian baik
dunia maupun akhirat InsyaAllah kabul.

Acil tizen: dintu leh... Pasti kabul leh?

Acil izak: ujar tuan guru di majelis - majelis kaya itu pang. Karna Allah
Maha Pengasih, Penyayang pulang.

Acil Tizen: aku ne kada kakurang do'a tahulah. Hari - hari aku ne
bado'a sakira sugih kaya urang, baduit kaya urang, baharta banda
kaya urang sampai detik ini kada kabul jua balum, kakaya ini pang
panghidupan saurang. Imbahanu cukup imbahanu kakurangan. Mun
tetangga nang disubalah tu maka limpuar rajaki, tuh hanyar pulang
manukar lamari . Ujar gasan sapasial maandak tas. Han urang, gasan
tas haja lamarinya sapasial ada saurang ne jangankan nukar
lamarinya, nukar tasnya haja kada sanggup, jangankan nukar tas,
talinya yatu kada kawa.

Acil izak: lun lihat, pina ba tas haja pian bila tulak ka handil atau ka
pangantin.

Acil Tizen: ada haja pang, maksud ku tuh tas nang bawarna – warni tu
nah,,,

Acil Izak: nang kayapa cil tas warna warni, kaya warna balahindang
leh?

Acil Tizen: bah… kada gaul ikam ne. Maksud ku tas warna warni tu
bila baju ungu tasnya ungu, bila baju biru tasnya biru. Mecing jer
urang tu. Tapi biar inya bapanampilan mecing, baju habang tas
habang, tulis kaning kaya kumpang parang, gincu mandarandang,
tatap ae tabungas saurang. Ngaran saurang ne bungasnya alami kada
kawa ae…. Inya tu ku lihat tuhuk bamacam – macam muha, bamasker
lah, ba skin ker lah kada jua ku lihat mancarunung muhanya tu.
Kakaya itu pang.

Acil Izak: percaya lun lawan pian ne, makanya am pian dapat laki nang
bungas jua. Sakufu kah jer urang tu.

Acil Tizen: Bahanu kam aku tapikir, napa salah ku ni maka pina kada
ada parubahannya hidupku, kada sayang kah Allah lawan diaku,
banyak banar kah dusa saku.

Acil izak: pinanya cil ae…

Dimana ikam tahu aku banyak dusa? ujar Acil Tizen pina malindap api
di dada.

Bagaya cil ae, ujar acil Izak. Tapi bujuran… ujar sidin pulang dalam
hati.

Acil Tizen: nang kaya bado’a tadi tu nah, pina kadada hilalnya handak
dikabulakan, kam.

Acil Izak: Allah tu cil ae,,, mengabulkan pas lawan waktunya, pas
lawan andaknya, pas lawan kaparluannya. Jadi bilamana pian bado'a
tp kada kabul itu bukan karna Allah kada sayang tapi karena Allah
lebih tahu mana yang baik dan mana yang buruk bagi pian.

Acil Tizen: Kayapa tuh, maka pasti kabul tapi kada kabul kayapa
kisahnya. Ikam ne kabiasaan banar bila bapandir lawan aku di ulai –
ulai. Kam ne handak mauji kecerdasanku kah napakah? Kada percaya
ah ikam pada aku ne sarjana. Kaina ku andak di status ijazah ku tu,
kalau perlu lawan transkrip nilainya. Kaini – kaini IPK tinggi haja
tahulah.

Dalam hati Acil izak, pian ne IPK tinggi tapi sumbu handap.

(Atikah: mangarti lah buhan pian sumbu handap? Sumbu handap tu
lakas malindap, dikit – dikit tasinggung, dikit - dikit sarik, dikit – didkit
baper, dikit – dikit galau. Nang kada mamadai yatu diparmasalahakan
jua).

Acil izak: percaya banar ulun pada pian sarjana, baapa ulun kada
percaya. Inya masalahnya ulun ne kada tapi bisa jua manjalasakan,
ngaran kada alim…, kada sarjana ha pulang.

Acil Tizen: manyindir aku pulang Inya. Tapi aku ne taguh dah, aur
kana sindir urang haja. Napanya kah aku ne kada suah bujur di mata
urang. Babaju larang dipadahakan karidit, baju murah dipadahakan

kada baduit, bapanampilan aksi dipadahakan cakah, bapanampilan
biasa tatap tasalah.

Acil izak: parasaan lun, pian nang kaya nitu.

Napa jar ikam, ujar Acil Tizen handak sarik.

Parasaan pian haja nitu… ujar Acil Izak mambaikakan pandir pulang.
Kita babulik ka papandiran kita nang tadi lah. Lun cuba maibaratakan
kaya ini nah, bila Pian tuh sakit gigi obat apa nang dibari duktur?

Acil Tizen: nyata ae ubat sakit gigi...

Acil izak: mau lah duktur mambari ubat sakit parut.

Acil Tizen: Kada nya mau ah, tu ngarannya duktur nya mal praktik….

Acil izak: umpamanya pian garing lawan anak pian nang pahalusnya.
Sama garingnya, misal sama - sama batukan. Kikira ubat nang dibari
duktur sama lah?

Acil Tizen: aku ni lain duktur, dimapa handak manjawab, cakada ku
tahu ah.

Acil Izak: sama ae pada lain duktur. Amun ubatnya sama misal neh,
kira – kira dusisnya sama lah?

Cil Tizen: jalas ae kada sama, Mun sama dusisnya kluku anak ku
karacunan batambah garing inya.

Acil Izak: mun pian kada garing pang, tulak ka duktur mau lah di bari
duktur ubat.

Acil Tizen: jalas ae kada. Biar dibari jua, cakada hakun aku maminum,
baapa jua? Baapa jua aku ka duktur mun kada garing, kaya nang
kabanyakan duit tuh. Gasan makan gen ngalih mambari duktur nang
sugih pada saurang lah. Cuba pikirakan.

Acil izak: umpamanya haja cil ae. Jangan serius banar pian, kaina
lakas tuha.

Acil Tizen: napa ikam manyambati aku lakas tuha, handak jadi bini
anum laki ku kah? Langkahi dulu mayat ku.

Acil Izak: maksd ulun meumpamakan do’a tadi tu nah. Nang kaya itu
jua do'a, mun kada kita kada perlu maka Allah kada mambari. Itu tu

nang lun maksud Allah mambari pas waktunya, pas andaknya, pas
kaparluannya.

Acil Tizen: tagal mun urusan banyak baduit tu dimana salahnya. Baik
luku mun sugih, kawa bazakat, kawa ba umrah, kawa naik haji.

Acil izak: ibadah nang pian sambati tu ada haja amalan lain nang
pahalanya kada kalah lawan bahaji ba umrah cil ae. Bisa jua kita kada
disugihakan tu karna Allah tahu mun kita sugih bisa jadi kita
sumbung, riya atau kada ingat bashalawat lagi. Mun masih balum
sugih ne ingat trus bashalawat, paling kada pas mahandaki suatu
barang tapi kada kawa manukar balalu bashalawat ha tu.

Acil Tizen: bujur haja pang jar kam tu. Tapi mun balalawasan kada
baduit sanggup jua kah aku manyandang?

Acil Izak: Pasti sanggup cil ae. Karena Allah telah berfirman dalam
Qur’an Surah Al Baqarah ayat 286 yang artinya:” Allah tidak akan
membebani seseorang melainkan sesuai dengan kesanggupannya”.

Acil Tizen: pacang sakit salawasan mun kaya ini kisahnya.

Acil Izak: nah… jangan sangka buruk kaya itu pian cil ae. Kada baik…
inya kaya ini cil lah…

Balum tuntung acil Izak baucap, aku bulik ha nah, kalu bapanya
sudah bulik ujar acil Tizen. Padahal sidin takutan kalu pina makin

panjang tausyiah Acil Izak. Bahujung tasalah tarus kalakuanku
dapatnya caramah acil Izak, ujar Acil TIzen dalam hati.

Assalaamu’alaikum ujar acil Tizen manutup pandir.

Wa’alaikum salam, acil Izak manyahuti.