Tangon om Hiis

Tangon om

Hiis

NGARAN: ERNIWENA SABING

Tangon

I Taki
di

I Todu

I pogulu po, haro duo tulun i
misasawo id iso kinoyonon.
Kinoyonon dii nopo nga id gouton tu’
posorili do kogoutanan o walai diolo.
Misasawo diti nopo nga songulun taki
om todu di laid no aiso tanak. Taki
nopo diti nga agaras po kopio do
mindahu-dahu. I todu nopo nga amu
no songkuro agaras nga kouhup
kasari di koruhang dau do
mongimburu walai.

Insan tadau, minidahu kaka I taki
nga amu I todu minoyo sabab amu
kaka osonong topurimanan dau.
Mantad di kaka om sinuhu no di taki
mundorong id walai I todu. Ka di taki
minimboros di todu, ‘Arud hiti ko
nopo walai baino om pogonsok no do
linangatan om taduk, do oruhai oku I
muli baino ti moi oku no ompuya
tomod hilo dumo.' kaka di taki
minomisunud di todu. ‘Bah.' kaka di
todu sinumimar. Ontok di, pamanau
no kaka I taki minidahu hiloo id dumo
I osudu-sodu po mantad walai diolo.

Tintod kaka di taki mamanau do
mindahu, kopurimanai nogi kaka dau
do nolihuan dau do minongowit do
waig dau. 'Aiyaa nolihuan tomod ku
kopio waig ku baino, muli I pama kagu ti
do tuuhan nopo tiinu,' kaka di taki.
Poguliai no kaka di taki minuli kawagu
walai. Amu po kaka nokosigampot
kopio, pomolohou no I taki sawo dau,
mokiongoi di waig dau nolihuan. Amu I
kaka korongou I todu matu tu’ aiso
komi di todu.

Pomogiak kagu i taki do mokianu
waig dau nga amu i monimbar i todu.
‘aii nokuro kopio I karud baino ti, oining
tomod I torongou dau sumonu do
mimboros oku, bosukon no di karud di?
Kaka id ginawo di taki. Pamanu no kaka
I taki minuli walai om amu po kopio
korikot do totobon om, 'arud nokuro
kopio ko tu amu korongou mamaayo
oku dia? Kaka di taki minimboros do
nohuyan po mamnau om nohuyan
kagu minggiak kaka. 'araa siou amuku
norongou, mogonsok oku gia ti nim
korongou oku giak nu.'

Kaka di todu minonimbar. 'Heii dia indo,
uh pamanau oku po katu.' Kaka di taki
soira nongoi dau waig dau.

Korikot kaka I taki hiri id dumo nga
kotigog yau do nosungalan po kaka
ngawi ri mundok om woie tinanom dau.
'Adii nokito kopio bakas baino mundok
ku, kada po dia tingkaan tia baino.' Kaka
di aki do naratan kopio nokito
sinungalan di bakas. Ongoi I taki hilo
kinuhub-kuhub dau om tilombus nopo
di kaka minongukad do woie om
mundok di minaan pinsungalai
bakas.'Doi gea ti mundok, haro po to gia
topod di bakas, naawi-awi no bakas
mundok ku. ilo woie nga nopisi ngawi
po,' ka di taki do mamaso mogihum do
topod-topod do bakas. Laid kaka om
hano-hano no kaka opitanga ri wakid
dau o topod do woie om mundok dii.

Nokopuriman no kopio I taki baino
tu’ nohuyan po nohuyan nokolihu waig
om naawi po bakas mundok om woie
dau. Okoro no ginawo di taki dii om
poinrikau di yau momuhondom do
ingkuro moningkaa di bakas. ‘Kada po di
bakas maan ku wansayai tingkaa sulod di,
mogianak-anak nopo da rinumikot,' Kaka
tokosou di taki. Ongoi no kaka I taki
tingkaa dau om maai no kaka di tingkaai
sulod bakas dii. 'Hodi po dia bakas,
ingkaa ko mulok om kosulung ko da,' ka
di taki moi papahapak do gakod dau.
‘Ingkaa om kosulung ko’ ka kagu di taki.
Koingis-ingis no kaka I taki kosorou do
kosulung I bakas. "Ingkaa bo ri bakas di,
kosulung nopo moti, kaka kagu di taki nga
sikog i kosumpak yau nga kosulung nopo
di tingkaaa' dau. Koinsawat nopo kaka I
taki di nokosulung miagal po dupot do
pointaid. “Odoii gakod ku nokosulung.' Ka
po di taki nokotigowo. Mingodoi po da
yau om minggayo di koruhang dau nga
amu I kaka gia korikot giak dau hid walai
diolo. Alaid kaka om louson no I taki
maso pointaid. ‘Matai no matu ti,' ka’d
tosorou dau.

Laid-laid no I todu magandad di
koruhang dau nga alaid kaka korikot
walai. ‘Dui nokuro kopio I halo baino ti,
muli oku ka’d sio om amu I korikot-rikot
kasaie.' kaka di todu nosuayan.
Nakatalib di pitangadau om louson no I
todu magandad di taki. Noloidan no
kaka kopio I todu magandad di taki om
pomiro-miro no i todu mongoi suhut di
koruhang dau minindahu do kanggau
kaka ginawo dau. Pamanau no I todu
minindahu dii om kuri po tu’ osomok I
dumo diolo di.

Korikot kaka yau nga kotigog nopo
do nopinsungalan po ngawi mundok
om woie i tinanom di koruhang dau.
Nosuayan po kaka yau nokokito
sinungalan dii. Ongoi yau hiri kinuhub-
kuhub diolo nga aiso I taki. ‘Honggo
pama nongoi dau di aiso hiti, amu I
matu louson yau di.' Ka tosorou di todu.
Kokito di todu do mingguyu kaka ri
tuntu do kolintuhan hiri id siba do
dumo. Pamanu nopo I todu minoi
intong nga I taki I pointaid nokosulun
tingkaa.

‘Tokkoi nokuro ko kopio tu pointaid
hino? Kaka di todu minonguhot. Amu
nogi minonimbar I taki nga suhuo nopo
kaka dau I todu popointuhun dau.
‘Pointuhuno oku da, maan tia tio” kaka di
taki. Simbar kak i todu do, 'Ih, mada
maan oku dia.' ka nogi di todu. ‘Adii,
pointuhuno oku kama maan tia moti’
kaka di taki kawagu. “Mada ei, maan oku
dia.' Ka kawagu di todu. Poguliai nopo
kaka di todu minoi hilo kinuhu-kuhub
om akan nopo kaka yau tu louson no
tian dau. Minggiak po kaka I taki nga
pologoson di todu tu modosi maan di
taki.

Alaid di, sumodop no om ruhuk
nogi i todu minoi ponguhot di taki,
'Louson ko indo? Kaka dau minonguhot.
'Louson, sarahan tu’ amu louson, apatai
oku po damot om monguhot ko nog,'
Kaka di taki minonogod di todu. Mantad
dii, ngoyo no di todu iduo tingkaa di do
pinopointuhun di taki. Ontok dii, ongoi
no yolo kinuhub-kuhub om akan nopo
kaka I taki linouson tomod.

Odoot no kaka I taki minangakan
do linopot om taduk di
pinikiansakan dau tu' linouson no
kopio do sangadau amu nakakan.
Mantad di om uli no di yolo walai.
Mantad no di om amu no di kaka i
taki agangau do miningkaa tu'
modosi ogulian kawagu.

Hiis

I Aki Ku

I Aki Ku

Mamanau oku,
Manangkus oku,
Tumakad nulu sokid,
Sodop tuong di konihab.

Poris rasam mantad sarayo,
Luyud bawang mantad Sondoton
Sapou darun mantad Nabalu,
Sundu mantad di aki koupusan.

Sundu diti,
Sundu di aki,
Ku'utai hongkod ginawo,
mogintong dau mamanau.

Tanah sompuru tinan di aki,
Panau gakod sumulok sodu,
Rumikot kumaa doid sondot,
Solokou dia oi Oyo.