TUGASAN 1 BIBB3193 2021032340168

INSTITUT PENDIDIKAN GURU KAMPUS RAJANG
96509 BINTANGOR, SARAWAK

TUGASAN 1

Nama : PATRICIA KELINAH ANAK EDWIN
Angka Giliran : 2021032340168
No. K.P. : 010808130828
Kumpulan : PISMP BIBB AMBILAN JUN 2021
Kod Kursus : BIBB3193
Nama Kursus : MORFOLOGI BAHASA IBAN

Nama Pensyarah : PN. BELIN ANAK ENSING
Tarikh Hantar : 12 OKTOBER 2022

Tandatangan Pemeriksa :
Nama Pemeriksa : PN. BELIN ANAK ENSING
Tarikh Pemeriksaan :

Pengesahan Maklum Balas Kerja Kursus
Saya mengesahkan bahawa maklum

balas yang diberikan oleh pensyarah

telah saya rujuk dan fahami.

...............................................
Tandatangan Pelajar
Tarikh: ... .......

RIPIH ISI

Pekara Lambar
Lambar Mua i
Ripih Isi ii
1.0 Pelasar 1
2.0 Konsep Morfofonemik 1
3.0 Proses Morfofonemik 2
2
3.1 Proses Ubah Fonem 2
3.2 Proses Nambah Fonem 3
3.3 Proses Pengelenyau Fonem 3
4.0 Simpul Penemu
Kereban Sanding

Tanya 1

1.0 Pelasar
Seraris enggau ubah pemansang dunya ba mayuh bengkah bidang kelebih agi ba
sukut dunya pelajar, jaku pan bisi nerima ubah sereta empas kediri empu ari sukut
nerima penambah, ubah ba munyi jaku tauka sepil, beturuka leka jaku, chara
begunaka jaku nengah chara ti nemban, proses beinjauka leka jaku ari jaku bukai
enggau mayuh agi ke bukai. Kebuah pia, jaku beguna bendar dikena dalam pengidup
kitai besehari-sehari maya bekomunikasyen tauka berinteraksyen enggau pangan diri
baikka nengah chara betulis tauka bejaku. Nya alai, perintah pelajar menua bejalaika
mayuh macham chara dikena nyungkak pengerembai dalam pelajar jaku bansa Iban
ngambika ulih nerima pemansang ti sebaka enggau jaku bansa bukai. Entara bidang
penemu ti bisi dipelajarka dalam pelajar jaku Iban iya nya proses morfofonemik.

Proses morfofonemik tu siti pampang penemu ti disakumka dalam bidang morfologi
jaku Iban ( Ulfa, 2017 ). Nitihka penemu Rahmad dalam jurai penemu iya ba taun 2018,
iya madahka morfofonemik tu siti proses ti nyantilka subsistem fonologi tauka munyi
jaku enggau subsistem morfologi ti bekaulka enggau ubah dalam urat jaku nengah
chara meri penambah.

2.0 Konsep Morfofonemik
Keterubah, ba jurai penemu ke sekali tu kitai deka beratika sereta belajarka enggau
silik senentang konsep morfofonemik. Morfofonemik tu sebagi ari proses ti deka nyadi
nyema dua tauka lebih morfem dijantilka dalam urat jaku. Morfofonemik tu mega suah
agi dikumbai siti proses ti beubahka munyi nyadi siti munyi ti bukai lalu munyi jaku ti
diasilka nya tadi dikumbai kitai fonem. Ubah tauka pengasil munyi ba sesebengkah
leka jaku deka bepanggai ba fonem tauka munyi jaku keterubah ti deka diubah. Siti
ubah ti nyadi ba sepil tauka morfem leka jaku deka ngasilka siti leka jaku ti ngembuan
munyi, sepil sereta reti ti bebida ari morfem ti diubah. Proses ngubah fonem ulih nyadi
nengah tiga chara iya nya proses nambah fonem, proses ubah fonem enggau proses
pengelenyau fonem. Nangkanka tu, kitai deka beratika utai ti dikumbai proses tiga iti
nya tadi, bakani proses nya tau nyadi sereta bida ti nyadi ba tiap iti proses ngubah
fonem nya tadi.

1

3.0 Proses Morfofonemik
3.1 Proses Ubah Fonem

Proses ti beubahka fonem sesebengkah leka jaku nyadi nengah tig achara. Entara
proses ti keterubah iya nya proses ubah fonem. Proses ubah fonem tu sebengkah ari
proses ti nganti tauka nukar sepil siti-siti morfem lebih iya disakumka enggau morfem
ti bukai. Dipuntangka ngena jaku pandak, proses ubah fonem tu nyadi dikena ngasilka
siti fonem tauka munyi jaku ti baru ngambika ulih nyadi siti leka jaku ti nemban sereta
ngembuan reti ti entap. Ukai semina nya aja, proses ubah ba fonem tu mega deka
ngasilka munyi jaku ti semitan dikena dalam komunikasyen besehari-sehari.
Ngambika chunto leka jaku ti nerima ubah ba fonem dalam leka jaku Iban iya nya
morfem per ti disakumka enggau morfem ajar deka ngasilka siti fonem jaku ti baru iya
nya pelajar. Ari proses ti nyadi nya tadi, deka ulih nemu urup r dalam morfem per
diganti enggau urup l ti ngujungka fonem pelajar ulih diasilka. Chunto ti kedua dalam
proses ubah fonem tu iya nya morfem pe dijantilka enggau morfem duduk deka
ngasilka fonem jaku penuduk. Ari proses nya tadi, urup d dalam morfem duduk
ditingkilka lalu diganti enggau urup n ti ngasilka leka jaku penuduk.

3.2 Proses Nambah Fonem

Kelimpah ari nya, proses ti kedua dalam sakum morfofonemik iya proses nambah
fonem. Enda jauh bida enggau proses dalam jurai keterubah nyin tadi, proses nambah
fonem tu mega nyadi berindik ari proses ti bechampurka siti morfem enggau morfem
ti bukai ngambika ulih nempa siti munyi jaku ti baru. Proses tu kelebih agi meri
penambah ngagai munyi sesebengkah leka jaku dalam dua sakum morfem. Enti
disukat ari sukut dunya pelajar jaku Iban, proses tu beguna bendar sereta meri empas
ti besai dalam pengerembai jaku Iban. Kebuah pia, ari proses tu tadi, kitai ulih
nambahka mayuh agi variasyen jaku dalam jaku Iban. Chunto jaku ti nerima proses
ubah fonem iya nya baka fonem jaku ngerampit ti diasilka ari jantil morfem nge enggau
morfem ampit. Bebida ari proses ti nganti sekeda ari morfem dalam urat jaku, proses
nambah fonem tu meri penambah ngagai munyi jaku ti dijantilka. Ngambika banding,
fonem ngerampit diasilka ari pengawa ti nambahka munyi r ba entara morfem nge
enggau morfem ampit. Ngambika kitai sama bela bulih penemu ti seriran senentang
pekara tu, dia’ kitai deka beratika penambah munyi ti nyadi dalam chunto ti kedua tu
iya nya fonem beranjung. Fonem beranjung tu ditempa ari proses ti nambahka munyi
r dalam sakum morfem be enggau morfem anjung.

2

3.3 Proses Pengelenyau Fonem
Nangkanka nya, proses ti ketiga dalam proses morfofonemik iya nya proses
pengelenyau morfem. Proses tu ngelenyauka urup ti sebaka ba entara dua iti morfem
ti berimbai ngambika ulih ngasilka siti fonem ti ngembuan entak sebut sereta reti ti
meruan. Ngambika chunto dalam sakum morfem ber enggau morfem ripih, siti ari urup
r ba entara morfem nya tadi deka dilelaka ngambika ulih ngasilka fonem beripih. Ari
proses ti ningkilka sebagi ari urup nya tadi ulih ngasilka siti fonem baru ti muntang
dikemeretika orang ti nguna. Kebuah pengawa ti betingkilka sebagi ari morfem tu nyadi
laban berindik ari dua morfem ti disakumka, bisi dua iti urup ti sama berimbai. Nyema
sebagi ari morfem nya enda dilelaka iya deka ngasilka siti leka jaku tauka fonem ti
nadai ngembuan reti sereta enda kala dikena. Tambah mega, maya proses ti betempa
leka jaku tauka munyi jaku ti baru meseti nitihka atur sepil di udah ditetapka dalam
standard pelajar jaku Iban. Ngambika chunto, ba sakum morfem ber enggau morfem
rintai, nyema sebagi ari morfem r enda dilenyauka iya deka ngasilka siti munyi jaku ti
enda engkeman didinga pending.

4.0 Simpul Penemu
Disimpulka ngena jaku pandak, ari jurai penemu nya tadi kitai ulih nempa penemu baru
senentang proses ti nyadi dalam pengawa ti meri ubah ngagai sesebengkah fonem.
Nyadi ba penemu aku, pampang penemu tu beguna bendar dikena nambahka agi leka
jaku Iban kelebih agi ba pengawa sekula. Pia mega, pengaya dalam leka jaku bansa
diri tu ulih narak pengulih nembiak begunaka mayuh macham munyi jaku sereta
ngasilka komunikasyen ti semitan. Pemansang jaku ukai semina beguna ari sukut
dunya pelajar tang mega ulih dikena ba pengawa dagang baka dagang temuai sereta
bejualka perengka pengelandik jari bansa Iban.

3

Kereban Sanding

Rahmad, H. (2018). Kaedah morfofonemik bahasa Sumbawa dialek Sumbawa Besar. Genta
Bahtera : Jurnal Ilmiah Kebahasaan dan Kesasteraan, 1(6), 11 -22.

Saidatul, N., M. (2021). Imbuhan apitan dalam bahasa Bajau Kota Belud, Sabah : Satu
tinjauan dini. Jurnal Melayu, 561 – 564.

Ulfa, E. (2017). Proses morfofonemik dalam surat khabar Harian Fajar. Skripsi Universitas
Muhammadiyah Makassar Fakultas Keguruan dan Ilmu Pendidikan Program Studi
Pendidikan Bahasa Indonesia. https://digilibadmin.unismuh.ac.id/upload/3970
Full_Text.pdf

RIPIH ISI Lambar
Pekara i
Ripih Isi 1
1.0 Tempalai Kenang 1
2.0 Munyi Jaku 1
2
2.1 Munyi Vokal 2
2.2 Munyi Konsonan 2
2.3 Patah Sebut 2
2.4 Diftong 3
3.0 Tempa Leka Jaku Baru Bepelasarka Research Based Education 3
4.0 Ubah Ke Baru Dalam Tukuh Jaku 3
5.0 Sistem Sepil Leka Jaku Baru
6.0 Simpul Penemu
Kereban Sanding

Tanya 2
1.0 Tempalai Kenang

Jaku siti ari kereban tauka jalai ti pemadu beguna dikena mensia berandau tauka
bekomunikasyen enggan pangan diri besehari-sehari. Nengah jaku mega mensia ulih
ngenataika berita, informasyen, buah runding, pikir sereta pengasai ati diri enggau
engkeman. Jaku Iban enda tinggal disegang ubah pemansang dunya dalam betempaka
leka jaku kelebih agi ba pengawa sekula. Nya alai, ba jurai penemu ke sekali tu kitai deka
beratika chara leka jaku ditempa bepelasarka empat chara iya nya munyi jaku, pansik,
ubah ke baru ba tukuh jaku enggau sistem sepil leka jaku baru.

2.0 Munyi Jaku Iban
Nitihka penemu ti dipejuraika Chemaline Osup enggau Padang Luna ba bup seduai iya
Fonologi Jaku Iban ba taun 2011, madahka fonologi nya siti bidang penemu linguistik ti
mansik munyi jaku dalam sesebengkah bansa jaku sereta fungsyen iya dalam sistem
munyi jaku nya. Munyi jaku tu bekaul enggau senentang bakani munyi tau diasilka nengah
organ artikulasyen. Leka jaku baru ditempa bepelasarka empat aspek munyi jaku iya nya
aspek munyi vokal, konsonan, patah sebut enggau diftong.

2.1 Munyi Vokal
Keterubah, kitai deka beratika nama utai ti dikumbai munyi vokal. Munyi vokal nya
siti munyi ti diasilka berindik ari nadai utai ngempang pejalai angin ba tempat
artikulasyen mensia lebuh ngasilka munyi jaku. Munyi vokal tu ulih didinga sereta
dikemeretika nengah chara beratika gaya dilah, tukuh mulut enggau pemesai buka
rang nyawa lebuh nyebut tauka ngasilka sesebengkah munyi leka jaku. Ngambika
chunto, maya nyebut leka jaku ari, vokal a dipeda ayan ba mua lalu tukuh mulut
kitai mensia dipeda tebuka luas. Ukai semina nya aja, munyi vokal mega ulih datai
ari tengan tauka belakang leka jaku. Chunto leka jaku ti ngembuan munyi vokal ba
tengan enggau belakang leka jaku iya nya baka pagi. Ba tukuh leka jaku tu, ulih
diperatika urup vokal a ayan ba entara urup p enggau g lalu urup i dipeda ayan ba
pengujung leka jaku pagi. Nya alai, maya betempaka leka jaku baru, kitai patut
beratika penuduk urup vokal dalam munyi jaku ngambika ulih ngasilka siti leka jaku
ti ngembuan reti ti engkeman, ulih dikemeretika sereta dikena nyadi jaku standard
bansa Iban.

1

2.2 Munyi Konsonan
Nangkanka nya, leka jaku baru mega ulih ditempa nengah chara beratika gaya
munyi konsonan dalam leka jaku diasilka. Munyi konsonan diasilka berindik ari
pejalai angin ti besekat tauka betelisih enggau organ artikulasyen mensia baka
mulut, gusi, tauka kelekanit lemi dalam rumbang nyawa. Angin ti dilepaska ari
rumbang idung tauka nyawa tu deka ngasilka mayuh bansa munyi konsonan ti
bebida tauka nya munyi konsonan asal tauka konsonan injau. Dalam jaku Iban bisi
ngembuan dua puluh tiga iti urup konsonan lalu enam ari konsonan nya kelebih
agi beguna dikena nyepil jaku injau baka urup c, f, q, v, x enggau z. Enti diperatika
dalam pelajar jaku Iban, endang jarang bendar leka jaku disepil begunaka enam iti
urup konsonan injau tu. Nya alai, mayuh leka jaku bansa bukai diserap lalu ditempa
nyadi leka jaku baru Iban baka x-ray, zoo, vaksins enggau ke bukai.

2.3 Patah Sebut
Patah sebut mega beguna bendar dijadika malin maya betempaka leka jaku baru
dalam jaku Iban. Ngambika chunto, leka jaku jalai diasilka ari dua patah sebut iya
nya ja enggau lai. Nyema sebagi ari patah sebut nya ditingkilka iya deka ngasilka
siti leka jaku ti nadai ngembuan reti sereta sepil ti entap.

2.4 Diftong
Kelimpah ari nya, tempa leka jaku baru mega patut bepelasarka munyi diftong.
Munyi diftong tu siti munyi ti diasilka berindik ari dua iti urup vokal ti berimbai baka
au, oi enggau ui. Lebuh maya disebut, munyi diftong kelebih agi ditemu kitai ba
pun tauka tengan leka jaku baka ukui, palui, ai, galau, makai enggau mayuh agi ke
bukai. Proses nempa leka jaku tu mega ulih nyadi ari dua sakum leka jaku baka
leka jaku temuai ti nyadi ari jantil morfem temu enggau ai. Pia mega, leka jaku tau
ditempa ari sakum munyi ta enggau u lalu ngembuan reti ti menyana.

3.0 Tempa Leka Jaku Bepelasarka Research Based Education
Ukai semina nya aja, leka jaku baru mega ditempa bepelasarka pansik. Ngambika chunto
dalam pansik ti dikerembaika Nelson Tandang ba taun 2020, iya madahka leka jaku ulih
ditempa bepelasarka berapa iti elemen ti beguna. Sebagi ari elemen nya baka
konotasyen. Ngambika chunto, leka jaku abis ditempa berindik ari ngembuan reti ti sama
enggau leka jaku nadai, lenyau tauka parai. Leka jaku nya tadi bela ulih dikena nitihka
sesebengkah situasyen. Ngambika chunto ba situasyen maya madahka orang udah parai

2

kitai ulih ngena jaku orang nya udah nadai. Kebuah pia, ngambika jaku nya tadi enda
kasar sereta ngenelihka ati orang ti ninga.

4.0 Ubah Ke Baru Dalam Tukuh Jaku
Nangkanka nya, ubah ke baru dalam tukuh jaku mega meri empas ngagai pengasil leka
jaku baru dalam jaku Iban. Ngambika chunto, proses ti beturu tauka betanduka jaku nama
deka nempa leka jaku baru dalam jaku Iban. Ngambika chunto, jaku nama kepala dijantilka
enggau jaku nama pengajar deka ngasilka leka jaku kepala pengajar ti mai reti orang ke
megai sekula. Pia mega, kitai suah betanduka leka jaku baikka nya nanduka penuh,
sebagi tauka benteli. Kebuah pia, dikena mandangka pemayuh enggau penteba orang ti
dipejakuka. Ngambika chunto jaku nama ti suah nerima penandu iya nya bebajik ti datai
ari proses meri penandu sebagi ngagai dua leka jaku bajik.

5.0 Sistem Sepil Leka Jaku Baru
Ubah ba sistem sepil leka jaku baru nitihka sepil jaku standard mai empas ngagai sepil
leka jaku ti udah lama diguna ari jeman kelia. Taja pia, ubah ba sistem sepil tu patut
bepelasarka lima kriteria baka prinsip linguistik, penulin, penyedang, pengelentur enggau
praktikal leka jaku nya. Chunto leka jaku ti nerima ubah ba sepil iya nya maia disepil nyadi
maya, samoa disepil nyadi semua, pia mega burong disepil nyadi burung. Sepil leka jaku
lama tu kesuah agi ditemu kitai ba bup-bup jerita tuai ti ditengkebang anda jaku dulu kelia.
Kebuah sistem sepil tu nerima ubah laban sepil leka jaku bedau semitan enggau chara
munyi jaku disebut tauka diasilka. Enda ulih disangkal agi, ubah ba sistem sepil tu
ngujungka mayuh leka jaku baru udah ditempa.

6.0 Simpul Penemu
Nyadika simpul penemu, leka jaku ditempa nengah mayuh chara. Nya alai, kitai patut
mansik enggau silik senentang chara ti semitan ti ulih dikena maya betempaka leka jaku
baru. Kebuah pia, ngambika leka jaku ti diasilka nyamai dikemeretika lalu ngemuntangka
nembiak tauka generasyen rebak baru belajar sereta nyepil leka jaku nitihka atur ti udah
ditetapka. Kelimpah ari nya, leka jaku ti ditempa nengah chara enda beratika empat aspek
nya tadi deka menyati pengelati jaku ti ngujungka rayat menua bukai enda ngembuan
pengeransing ati deka belajarka senentang pengaya leka jaku ti dikembuan jaku bansa
Iban. Berindik ari nya, jaku bansa kitai deka napi penanggul nerima pemansang ba sukut
dunya pelajar tauka ekonomi.

3

Kereban Sanding

Chemaline, O. & Padang, L. (2011). Fonologi jaku iban. Emeritus Publications.
Nelson, T. (2020). Pansik pelajar. Institut Pendidikan Guru Kampus Sarawak. http://www.

spedip.com/uploads/1/2/9/8/129864256/e_bup_pansik_pelajar_2020.pdf