PRISCILLA - BAHASA IBAN ENSERA

PROJEK BAHASA IBAN 2021

NAMA: PRISCILLA ANGELA SAWAI AK NYAMBANG
NO. IC: 070522-13-0464
KELAS: 2 IPHONE

JERITA IBAN

ENSERA MAYAU SEDUAI
REMAUNG

Lebuh menua agi puang kelia, Mayau
seduai Remaung balat bepangan.
Seduai iya rindu besulu laban bulu
seduai iya sama alus sereta bechura-
chura. Seduai iya sama rindu makai
dagin, nya alai seduai selalu ngasu.
Bala jelu semua takutka seduai.

Remaung seduai Mayau landik bejalai
dalam babas ngipa jelu. Remaung
ngipa Rusa, Kijang enggau Pelanduk.
Mayau nengkilunka Chit, Chuik enggau
Tupai. Mayau suah mega nangkap
Pama, Engkatak enggau ikan. Lebuh
ngasu, seduai iya jarang lebu.

Lebuh hari siti, seduai tekenyit
tepedaka tiga iku anak Mensia benung
ngalang siku Rusa. “Uji peratika kini ke
sida iya mai bangkai Rusa nya. Pama
enti bisi dagin nya tinggal lagi,” ku
Remaung. Liur iya nyau metali nitik.

Remaung seduai Mayau begadai-gadai
nyidi jalai Anak Mensia. Anak Mensia
nyau rembus di pendai sida. Bangkai
Rusa lalu diengkah sida di tanah
beselapka daun rangkai. Dua iku
nembiak lalu diasuh tuai pengasu ngiga
kayu ke raran.

Enda lama udah nya, nembiak dua iku
nya pulai mai kayu enggau rutan.
Seduai iya lalu ngaga utai ti disebut
Anak Mensia raran. Anak Mensia lalu
menyadika api. Remaung enggau Mayau
sama enda nemu nama utai ti disebut
Anak Mensia api.

Udah nya Remaung seduai Mayau
meda Anak Mensia ngengkah bangkai
Rusa nya ba atas raran. Api lalu Makai
bulu Rusa ti ngasuh dagin nya meresih
bau rum. Udah nya Anak Mensia melah
tubuh Rusa ngulihka perengka dalam
iya.

Anak Mensia nisil mimit dagin Rusa nya
lalu nibarka iya ke babas ke Antu Rua.
Remaung seduai Mayau lalu berebut
nerekam dagin nya. “Apu, naka penyamai
dagin ditunu tu dih. Untung Anak Mensia
bisi api,” ku Remaung.

Remaung seduai Mayau pulai
begadai-gadai ngagai kupan seduai.
Seduai agi ingatka asai dagin ditunu.
“Pama enti tua nemu ngena api,” ku
Remaung. “Enti bisi api lapa tua enda
nemu ngena iya” ku saut Mayau.

“Uji nuan ngiga api,” ku Remaung.
“Eh, ni ulih. Lagi ditemu Anak
Mensia. Enda aku berani,” ku Mayau.
“Nadai utai diketakutka dih! Iya ga
bejimat dih. Uji peratika pemindah
Anak Mensia. Udah nya nuan melesit
tama ke langkau,” ku Remaung.

Mayau gelesi laban takut
berundingka pengemar pengawa ti
deka dikereja iya.

“Lapa nuan lalu enda mupuk?” ku
Remaung ke lalu negung inggar.

“Aku mupuk pagila. Malam tu tua
ngintaika mimpi,” ku Mayau.

Tumu-tumu pagi hari siti, Mayau
mupuk nyidi jalai nuju langkau Anak
Mensia. Remaung nitihka Mayau ari
belakang. Mayau beratika pemindah
Anak Mensia. Utai nadai bemunyi.

“Tentu Anak Mensia udah mindah,” ku
ati iya.

Mayau lalu mupuk begadai-gadai.
Remaung nganti ba endur ti enda jauh
ari nya awakka ulih meda utai nyadi.
Mayau nuntung di kaki tangga langkau.
Iya niki jampat-jampat. Iya udah datai di
tanju. Peda iya pintu bisi telenga mimit.
Iya lalu tama.

Dalam langkau, Anak Mensia sebilik
benung Makai ngelingi pemakai ti
diengkah dalam mangkuk enggau
sesingkap pinggai di tengah-tengah
sida. Dalam mangkuk nya kerat dagin
enggau sup iya. Mayau apin nemu
peningkuh api. Siku Anak Mensia angkat
deka malu Mayau.

“Anang malu iya apai. Kapa iya enda
tama. Mayuh tulang nya,” ku anak Anak
Mensia. Apai Anak Mensia lalu meri
Mayau makai asi dichampur kuah dagin
Rusa.

“Apu! Nyamai amat pemakai tu,” ku
Mayau. Iya lalu ingatka Remaung.

Jam nya Anak Mensia lalu murus-
murus Mayau. Mayau nemu sida Anak
Mensia rinduka iya.

“Enti iya tetap ditu, nyamai kitai nadai
dikachau cit agi,” ku siku Anak Mensia.
Sida meri Mayau Makai baru. Iya ensepi
dagin dia nyamai amat.

Udah Makai, Mayau lalu tinduk. Iya
tedani ninga nyawa Remaung negung.

“Oh Mayau! Pansut nuan ari langakau
nya. Ni api ti diasuh aku ambi nuan?
Lapa nuan enda mai nya pulai dih?
Lama bendar aku udah nganti nuan,” ku
kutuk Remaung.

“Aku enda bulih api. Aku enda nguna
api. Aku enggai pulai ke babas agi. Ditu
nyamai diau,” ku Mayau.

“Nuan enda ingatka pangan lebuh
udah nyamai. Kitai mesti taluk lalu
enda bulaka semaya. Berat sama
diangkat, lempung sama ditanggung,”
ku Remaung. Mayau enda nyaut.

“Enti baka nya, nuan tu orang ke enda
tau dikarapka. Nuan mungkir danji. Nya
alai aku deka ngintai nuan. Enti nuan
ulih, nuan aku empa, anangka tubuh
nuan enda aku empa, tai nuan aku empa
ila,” ku Remaung.

Remaung pan lalu mupuk mai ati balat
ringat.

Datai iya di tuchung bukit, Remaung
lalu negung naka penginggar. Mayau
takut bendar lalu betapuk ba teluk dalam
langkau. Lebuh iya pansut, iya balat
bejimat. Lebuh iya bira, iya lalu
ngelamun tai iya. Mayau pan enggai agi
ngasu ke babas lebuh siang hari.

Ari ulah Mayau kelia, betumbuh
sempama baka Mayau ngelamun tai ti
dikena nyemaka orang ngelalaika
penyalah diri. Remaung mega nyau
bedengki enggau Anak Mensia, nya alai
iya suah ngenanka buah nyadi umpan
tauka taju iya di babas. Taju Remaung
mali ditegu enggaika dianu jelu nya.

ABIS….