PROJEK NEMBIAK-JERITA IBAN

NGUTA KABAU
ANNA (2 IPHONE)

Sida ke bujang, Sida ke nyau setengan umur, Sida ke tuai agi. Sida ke apai orang,
Sida ke aki orang. Nembiak redak sengapa. Bala tuai rumah , bala pengulu ,
bala Iban , bala Melayu , bala China. Pupu bansa. Bisi ke datai ari Sebetan. Datai
ari Krian. Ari Awik. Ari Perepat. Selandung. Kaba. Kupang. Ari kampung
Melango. Ari kampung Tanjung. Nyau ngereban bala lelaki sebelah bukit kubau.
Datai siku ngempas , datai siku ngempas kayu ti disan diri. Kayu ke besai san
disaup. Kayu ti berat diperibit. Agi bisi sekeda apin datai. Kayu belanggar kin-
kitu. Kayu bedampar din-ditu. Belampar kayu dia-dia baka batang rimba.
Seribu bansa kayu ti dibai bala. Enda milih kayu diambi. Kayu ti diambi ari paya
nya simpuh , ubah , gerunggang , kechiau , subuk , selumbar , medang , menyalin
, menua , bantas , sapa. Ari bukit datai kedemba , tebulan , menggilas , bara ,
pensi , kandis , legai ,lempuang kijang , pala munsuh , tapa lelabi , retak burung ,
datai ke pudu.

Nyenguk Tuan Gemurai ari Kubau. Ngenyuk Datuk Malim. Sama ngilikka pala
meda pemayuh mensia indah enda baka ulat garam. Indah ngemayuh daun
kayu lalu. Dilantar pan daun apung atas pala mensia , enda meh labih ke tanah.
Bulih setelak leka mata. Sama tuchum meda pemayuh kayu ti diambi iban ,
mayuh agi ari apat reba di Batang Rimbas. Iban nadai salah endur meda sekayu
Bukit Kubau. Bisi ke bediri tenjik-tenjik. Bisi ke duduk atas kayu. Bisi ke agi
belelak. Bisi ke limpang nekuka dekuan. Bisi ke berandau. Sekeda bungah
enggau pangan.

"Ngambika Jipun meda jamah anak Saratok," ku Tuan Gemurai nelai Datuk
Malim. Seduai nenggelamka diri baru tama ke kubau. Sekejap bekau nya , alai
Tuan Gemurai ngechul baru di mua kubu. Iya ngenataika jaku gerah. "Titi semua
kulit kayu! Tuan meri ukum ngasuh niti!" Ku Tuan Gemurai ngenataika jaku
gerah ari Tuan Kim Chiji.

"Titi kulit kayu! Titi! Tuan ngasuh niti!, ku iban betunda-tunda , nampung gerah.
Ngenying tegugup munyi bukit kubau laban nyawa iban ke nampung gerah indah
enda munyi pengerami nyawa rayat Rajah Merom ke begigaka pintu gemuru mas
enggi Raja Merom lenyau. Merak sepenginggar nyawa diri baka ke nangika pangan
enda ninga. Mensia mayuh lalu belabuh niti kulit kayu ti diambi diri enggau diri
sebala. Niti-meniti. Ngerias-mengerias. Nganit-menganit kulit kayu. Kulit kayu ti enda
ulih titi jari , dipalu enggau pemalu baka ti malu kulit tekalung. Ditenchang penapat
tulang baka ti nenchang kulit ipuh ngaga pua.

Buau Nyada kunsil-kunsil muai kulit pudu. Enggai nyadi dititi jari. Enggai nyadi
disubak enggau duku. Nyau ulih malu enggau pemalu.
"Nyaa , nuan , aki," ku nembiak sida serumah ke berimbai enggau iya. "Ku jku nuan
deka beduan Jipun , nya nyu beduan diri empu." Bekeringik sida ketawaka iya.

"Anang bemunyi , 'chu. Pupuk," saut tudah tuai , pia ga rengkung-rengkung malu kulit pudu.
"Adik-adik benar nda Bujang Simanggang tu! Apo pulah, bujang? Mulah selimut?" Ku Sui ,
ngelimpangka diri , nundi Buau Nyada.
"Ni enda benar di, mulah balut bini Bujang Tebuk," balas Buau Nyada.
"Hah! Hah! Bujang Simanggang, kakan upo Jipun mulah kito macam orang bodoh tu! Kelak,
kelak tanggar kita kelas, Bujang Simanggang , ada maso nyo encheri asa buku limak Bujang
Tebuk tu," ku Sui. Tak mangah gamal iya mansutka jaku indah enda baka mua orang ke
naruh dendam.
"Anang banyak tutur bunyi iyo , pok. Kelak Jipun ninga kau," ku tibar Aki Malau ke semak
iya. "Apu, lalek nyo nengar. Cuba embak setu-sih , mun geru nyo sik 'ku tebu." Nyau kirik-kirik
ngeli orang empu. Penyelum anak ngelik ti dikirik nadai endur jaku nyema, baka ti udah
digelintum tujuh kali. Jaku tundi tang munyi ti bendar.
Mensia agi majak betiti, beanitka kulit. Agi majak bepaluka kulit kayu. Bekeketuk.
Bekerengkung indah enda munyi auh menua orang ke parai beranak ti kena teresa jalai ke
sebayan.

Lebuh hari nyau lemai, nyau deka ujung pengawa betitika kulit kayu, Datuk Malim
ngechul baru pansut ari kubau. Iya diperintah Tuan Kim Chiji meri jaku gerah baru. "Kita
mayuh enda diasuh pulai. Semua kitai diperintah bemalam di Bukit Kubau tu malam tu
laban pagila kitai deka berengkah niri kuta ngelingi kubau tu. Tu perintah ari Tuan Kim
Chiji. Aku minta ampun."

Jaku gerah disambut mensia mayuh enggau panjung sereta semalei. Pansut Tuan Kim
Chiji ari kubau. Bediri bechekak punggung di mua kubau. Lalu merak iban tak
sepenginggar nyawa mensia. Baka ti begetak dan kayu ensuna ti ditanam ngelingi
kubau laban gegar lubang ansang tuan. Perak iya enda ditemu iban leka, tang merak.
Merak marah. Merak ringat. Merak ngenakut. Mua iya berapi-rapi baka mua rima
garang. Lalu tegeram mensia mayuh.

"Timbai, Bujang Tebuk, mun kau benar berani," ku Aki Malau meransang, lalu ngerut
patung Sui.

"Tuan! Api hai!" Ku Sui, lalu rigang-rigang iya bejalai, mansang nuju Tuan Kim Chiji. Gerinik
langkah iya indah enda baka singkang Sri Petala Jaya ke baru keluar betapa ari tuchung
Gunung Runduk. "Apo..apo..apo!" Enda bejawap-jawap, Tuan Kim Chiji lalu besurung deka
nampar Sui. Tak baka ke enda Sui nyingkirka tampar. Tuan Kim Chiji semina nampar angin.
"Hee, belum ! !" Ku Sui sambil ngetis pala. Iya lalu undur mimit nguji deka ngulihka kejut
dikena ngayunka tumbuk. Apin sempat ngayunka tumbuk, alai Sui lalu ditangkap Datuk
Malim enggau Tuan Gemurai. Lalu lekat ga Bujang Endek. Lekat ga Sidik. Tak sawang
mimit tubuh sida ke magar Sui, alai tampar Tuan Kim Chiji sangkai ba kuyu Sui. Sui merijat.
Tang tangkap bala kaban iya rat amat. Sida endang enggai ngelepaska iya laban sida
nemu pengarang iya. Lalu iya ditarit sida Mat , sida Bebanir ke bukai, jauh ngejang ari Tuan
Kim Chiji. Tuan Kim Chiji ketawa rakah-rakah.

"Cubo lepas aku tu! Ku ngajar nye. Jangan nyo patih gila main nampar-nampar macam iyo.
Ku nyagui nye. Kitak mau ndiat giginya terbang! Nyo belum tahu, siapa Sui! Buayak berani
'ku misak nye, jangan upo muko keoarat macam iyo!" Ku putap Sui. Iya endang nyau jauh
ditarit sida pulai.

Seruran bekekiji isi iya. Pun bulu belaga baka kulit buah nangka . Isi iya teriki laban
gagah pansut. Tusah sida Ujang Kapak nimuh Sui , baru pengeringat iya pukas agi. Tuan
Kim Chiji enda lelak agi. Udah tembu ati; tampar iya udah sangkai ba utai ti diselinting.
"Enti diteju tadi , bedau temu baka tuan nya dilaban Sui. Aku enda tentu berani nguti
Laut nya , laban aku udah meda empa iya. Perau panjai lima dirungkupka iya di pala
baka ti enggau tanggui;enggai usah matak perau nanjak pantai niki ke tebing lebuh pulai
nyala maya air tur," ku tusui Aki Malau.

"Kati nuan ngelala iya deh, aki?" Tanya nembiak sida serumah.
"Kati ku enda ngelala. Apin bisi kita nya menya, tak kai main iya nemuai ngagai rumah
panjai kitai , bedajaka budu, bubuk, numpung, empedi enggau salai. Sekali, lebih sebulan
iya pereman ba sida Pengulu Garung, ngajar kami bekutau. Nya Tuai Rumah Balai nya
anang terangu kita ke nembiak. Taja kita meda iya chuyuk-chuyuk bakanya , anak murit
Penikar Sui lumur satu," tusui Aki Malau.

"Nuan nemu ga jari, aki?" Tundi sida.
"Nemu, enda nemu. Tang umbas kena nyaga badan diri empu," saut Aki Malau.
Enda seleman mulut iban , ga nitihka pemayuh tubuh. Bisi ke bekemut. Bisi ke bekegetuk.
Bisi ke mutap. Sekeda bekegut. Ringat ditan Jipun bemalam. Nadai besindang gari. Nadai
bebai bebal lebih. Tang dini nemu besindang gari enggau bebaika bekal laluh, ukai nya
nemu diri lalu jung bemalam.

" Tu meh asai kitai dipegai perintah Jipun. Ga perintah Rajah kitai udah tumbang," ku
serebana Buau Nyada.
Endang nyada bala. Dinga bala mata-mata bekekaung ngerah iban ngasuh ngambi
pemakai diri empu.

"Ui, pengabang mayuh. Pemakai udah sedia. Alai , ambi kediri empu ba rumah pasung di
baruh. Ambi asi. Ambi lauk. Ambi diatu. Ka malam ari tu." Sereta ninga jaki gerah mensia
mayuh lalu bedudus mansang ngambi pemakai . Duduk makai sebarang endur sebelah bukit
kubau. Sebarang ke agi belala, mansang baru gak ngambi pemakai. Asi enggau lauk mua
pemayuh-mayuh. Iban enda nemu alai soldadu Jipun bulih pemakai ngemayuh nya. Udah
badu , daun buan ti ke pinggai lalu diparukka sengapa alai . Bekekiak ga iban madahka diri
kenyang belaukka pusu enggau tesar champur laksa. Sekeda bekeleguk enteraie.

Datai maya bala nindukka diri. Bekekasak. Bekekerus iban ngiga endur diri ngenduh. Tak gali
ba endur ti dipilih diri empu. Betikaika rumput, bepanggalka ramu kuta, bepuaka jemu
malam, bekibungka langit timur, betenggauka bintang ti bekekijap, lelang tesa anak-mensia.
Ga chelap. Ga gatal dipegigitka kerengit, dipepantangka nyamuk. Tang bisi gak tulihka
pengerindu ati. Tang pia mega , rindu ati ninga kutap pangan diri , kuruh ti bekederut semunyi
enggau sintak peputan Kayan. Udah mayuh macham utai di nyadi malam nya , siti da ga
malam padam. Siti da siang nunjang.

Tegenung bala beratika soldadu baris ba padang di luar kubau. Gah magang gamal sida
bebai ke pedang sereta nyandih senapang. Pansut Datuk Malim. Pansut gak Tuan Gemurai.
Lalu dientudika Tuan Kim Chiji. Lalu bediri ketiga-tiga di mua kubau. Datuk Malim bejaku
nerangka atur pengawa ti nirika kuta meling kubau.

"Kita Penghulu, Tuai Rumah enggau nembiak rebak mayuh. Pengawa kitai seharitu niri kuta
ngelingi Kubau Saratok kitai tu. Pemesai payung kuta tu, nyin iya. Nitihka ajar tiang ti udah
dientak bala pemesai soldadu kitai nyin. Kuta tu mesti digaga manah-manah. Ramu ke
udah diambi kitai tu kitai sukat betul-betul. Kitai tetak betul-betul. Kitai lancham badas-
badas ari setak-setak, reti nya puting ramu ti dientakka tanah belancham lalu puting ti
nyadi pala kuta pan belancham tajam. Kuta tu kitai entak teguh-teguh. Kitai diri tegap-
tegap. Tu kuta kitai. Kuta dikena byaga pengelikun Kubau Saratok tu. Kubau kitai. Bala
pemesai perintah nyin ke udah belabuh gawa ba setiap penyuru deka ngulu kitai gawa. Kitai
gawa bebendar. Jampat siap , jampat pulai. Terang jaku aku nya?" tanya Datuk Malim.
Mensia mayuh nyaut terang. Enda usah ditandu agi. Tiap-tiap iku udah meretika pengawa ti
dikereja.

Orang berengkah gawa. Bisi ke nanggung , nanggung. Bisi ke ngesan , ngesan ramu.
"Bah, Apak!" Ku Aki Malau ngangau China ke penama Apak. "Lapa nuan tak ngenung.
Tanggung kitu ka ramu nya ulih seduai Apek Kunting! Bai kitu , aku mungga." Aki Malau
endang rindu beduan seduai. Awakka ensepi asai dibalut rengas, ku ati iya.

Orang bukai pan sama gawa bebendar. Jampat tembu , jampat pulai , ingat sida. Bisi ke
nyukat pemanjai ramu , bisi ke mungga. Sekeda ngelancham. Pengawa ngelancham lungat
mimit. Laban enda tak sebarang lancham. Puchuk kuta asuh Tuan Kim Chiji lancham
nyimbang. Sekeda ngelubang. Sekeda ngentak. Lalu ke bukai ngelalin ngena sega enggau
letik. Muak ke ari dalam digagaka palang beringkat-ringkat lalu dilantik ngena paku.
Tukang Bebanir enggau Tukang Lana enggau Tukang Sidin, laban ditemu iya manah
jamah, dipadu Datuk Malim nembuka pintu kuta.

Apin tentu bulih ngalih mata panas alai kuta udah gemerit bediri. Udah gemerit melit
Bukit Kubau. Udah gemerit ngelikup Kubau Saratok. Tuan Gemurai singkum meda
pengering iban gawa. Datuk Malim tuchum meda pengasi iban ka atur. Tuan Kim
Chiji senyum laban guna kuta nya udah bekelingar ngekar diri dalam pala iya. Kuta
nya nyaga pengelikun kubau. Tang kelebih agi kuta nya jadika Pengelindung seput
enggau nyawa raban Pemerintah Kempitai.

Semua pengereja pengawa belatur nyurutka diri ke rumah tangga diri empu mai
perut engkerau, udah bekau semalam dua hari, beserumpu nguta Bukit Kabau. Tuan
Kim Chiji ngulurka jari nabi Tuan Gemurai. Nabi Datuk Malim. Tuan Gemurai tama
ke dalam kuta. Tama ga Tuan Mushi Busan. Masuk ga Tuan Su Suzukan. Lalu
dientudika Datuk Malim. Tuan Kim Chiji dudi bendar masuk. Pintu kuta lalu
betambit rapit.

" Ni pengelama kuta tu bediri, Gemurai?" Tak melesut ari mulut tanya Datuk Malim.
Tuan Gemurai enda nyaut. Semina runding iya nyagam sedalam-dalam.

ABIS

Cherita Apai Saloi Pengibun Reta

THERESA

Nyadi Apai Saloi tu diau enggau ini iya ba sebuah rumah panjai. Kebuah iya laban apai
enggau indai iya udah parai maya iya agi mit. Ukai nya aja, Apai Saloi mega orang ti lurus.
Iya semina nitihka jaku orang aja. Nya mih kebuah bala kaban iya ngambi ulih ba iya.
Hari siti , Apai Seumang- umang mai Apai Saloi ngagai kampung laban deka ngiga reta.
"Apai Saloi, dek ka enggau aku ke kampung?” tanya Apai Seumang- umang.
"Lapa tua ke kampung deh?" tanya Apai Saloi.

"Ngiga reta, “ ku Apai Seumang- umang .
"Anang irau,udah bulih reta nya,tua pulai, “ku Apai Seumang- umang nambahka jaku iya .
Tudah Apai Saloi semina ninga aja jaku Apai Seumang- umang. Mimit pan iya enda
terundingka Apai Seumang- umang semina nguna iya aja.
Baka ke udah semaya, seduai pan bejalai ngagai kampung. Mayuh bekal dibai seduai iya.
Udah lama bejalai, seduai iya lalu tetemuka siti gua. Gua nya bisi reta ti amat mayuh baka
tawak, gedumbak,emas, pirak enggau duit mega. Apai Seumang- umang nyau berasai gaga
ati maya meda pemayuh reta nya. Taja pia Apai Seumang- umang enda mai guni mayuh,
nya alai, iya ngasuh Apai Saloi nganti dia, nganti iya ngambi guni baru.

Nyau udah lama Apai Saloi nganti Apai Seumang- umang , enda berasai mata iya ngantuk
nyangka ketegal dipuputka ribut chelap. Iya pan lalu tinduk. Tinduk nyandih ba dinding
batu. Enda lama udah nya, iya tedani maya ninga nyawa orang ari luar gua nya. Iya pen
pansut lalu tepedaka tiga iku lelaki ti bela nangkin sebilah duku.

"Nama pengawa dek ditu?” ku sida nanya Apai Saloi.
"Nyaga reta aku,"saut Apai Saloi baru.
"Reta sapa tu?" ku sida.
"Reta raja,”ku Apai Saloi nyaut sida.
"Bai orang tu ngagai istana," ku siku ari tiga lelaki nya.
Nyadi , Apai Saloi pen dibai sida iya ngagai istana.
Sepengudah datai ba istana,raja nya meri Apai Saloi duit laban iya ngumbai Apai Saloi udah
nyaga reta iya ti lenyau suba .

ABIS.....

MENUA DALAM AI
EVIANNIE - (2 Iphone)

Ba siti menua, bisi siku penulis bup ti chukup tebilang benama Nuing. Tang iya udah
lama enda ngarang bup laban ngasaika nadai jerita ti deka dikunsi iya enggau bala
pemacha. Iya lalu mutus ati deka ngiga inspirasyen ba endur ti jauh ari nengeri. Iya
deka raun ngagai sebuah rumah panjai ti nerima orang luar diau enda lama ba
rumah sida iya.

Nuing gaga ati laban bala nembiak rumah nya nerima penatai iya. Maya ti bejalai ba
tengah laman iya bisi tepedaka siku indu ti benung nulung apai iya ba pendai. Nuing
lalu nanya sapa indu nya ngagai siku nembiak ti bediri semak iya.

“Nama indu nya Sebai. Iya rindu nulung apai iya ba sungai,” ku saut nembiak iya.
Nuing semina nganggukka pala aja.

Hari siti, benung Nuing rindang bejalai niti ruai, apai Sebai ngangauka iya lalu minta tulung
iya mukat ikan ba sungai. Sebai, Nuing enggau apai Sebai ngejangka pengkalan sida ngena
sebuah perau. Perau nya endang selalu dikena apai Sebai maya turun. Datai ba endur mukat,
sida tiga pan belabuh ngetanka pukat. Udah nya, sida tiga sama ngintu diri ba perau seraya
ke nganti maya narit pukat. Maya narit pukat, apai sebai bulih ikan ti pemadu besai. Ikan nya
bechura gadung lalu mata iya bechura biru. Sebai enggau Nuing nyau enda bemunyi laban ke
tekenyit meda ikan ti nyelai nya. Enda ngadang ikan nya ulih pukat sida sehari nya. Enda
mukai-mukai ikan nya engkuda lalu lepas ke dalam ai. Apai Sebai terejun ke dalam ai nguji
deka nangkap ikan nya baru. Laban ai nya enda dalam, Sebai enggau Nuing enda nulung
apai sebai . Seduai ngumbai tudah apai sebai ulih nangkap ikan nya baru lalu nyemerai pulai
ngagai perau.

Kepuas ke lama nganti, Sebai enda nyamai ati lalu terejun enggau Nuing ke dalam ai
deka ngambi apai iya. Enda lama udah nya, seduai iya beperening pangan diri laban ai
sungai iya amat dalam. Seduai berasai nesal laban enda ulih nyemerai agi. Seduai iya
asai ditarit ke dalam ai. Enda lama udah nya, seduai iya alit ati laban ngasaika diri ulih
enseput ba dalam ai.

Ba dalam ai nya, seduai meda baka siti menua ikan. Ikan ti diau dia nyelai magang.
“Sebai!” ku munyi kangau siku lelaki baka ke dikelala. Sebai lalu malik ke belakang. Iya
meda apai iya ngangauka iya. Nuing seduai Sebai gaga ati laban apai Sebai nadai
nama-nama. “Peda aku, menua tu enda patut digusung kitai mensia. Aram kitai pulai,”
ku apai Sebai. Sebai enggau Nuing semina nitihka jaku apai iya lalu berumban angkat
pulai ngagai perau.

“Nama tubuh aku asai berat, apai?” ku Sebai
“Tubuh kami duai Nuing asai berat mega,” saut apai iya. Sida tiga nurun baru ke baruh.
Enda lama udah nya, ikan ti ditemu apai Sebai tadi bejaku enggau sida iya.
“Amai aku benung meda ikan bejaku tu?” tanya Nuing.
“Amai meh Nuing, semua ikan ba menua kami ditu nemu bejaku. Kami enda sama enggau
ikan ke bukai,” saut Ikan nya.

“Kita mensia enda patut nemu pemisi menua kami ba ditu, enti kita besemaya enggau kami
enda nusi ngagai orang bukai pasal utai ke nyadi sehari tu, baru kami ulih ngelepaska kita.”
ku ikan nya bejaku. S ebai, Nuing enggau apai iya lalu besemaya enda nusi ngagai orang
bukai. Udah nya, sida nguji nyemerai pulai ke menua diri. Maya nyemerai, tubuh sida enda
berasai berat agi. Apai Sebai dulu niki ke perau udah nya Nuing.

Udah datai di rumah, sida enda bemunyi ngambika orang bukai enda nanya nama
utai ti nyadi. Semina Sebai, Nuing enggau apai iya aja nemu nama utai ti udah nyadi.
Maya Nuing deka pulai pagi hari siti, sida serumah sama nganjung Nuing ke pendai.
Lebuh Nuing ngangkatka kaki deka tama ke perau, Sebai ngetanka jari Nuing lalu
bejaku, enti nuan kitu baru ila, anang enda mai ke kami bup ti dikarang nuan. Aku
mega deka macha bup dikarang nuan.” Nuing lalu nganggukka pala .
Nuing pulai ke bandar enggau ati gaga laban iya udah bulih inspirasyen dikena
ngarang bup. Iya ukai deka ngarang bup pasal menua ikan tang iya deka ngarang
bup pasal indu ti benama Sebai. Utai ti nyadi ba hari nya suah dikenang sida tiga.

ABIS

Skim Gempuru Tanjung
Kepayang....

CAROLINA (1 OPPO)

Sida ba rumah panjai nya bisi dituntung penusah rabat tumu pagi nya. Penusah rabat
ke nuntung sida Unggang sebilik. Anak Unggang ke baru beumur 6 bulan udah
madamka seput tumu pagi seharinya ketegal sakit. Bangkai udah dikatung ke ruai.
Sapat pan lalu digitang ngelingi ruai sida Unggang. Baya niang pan udah diangkut sida
lalu diengkahka ba tisi bangkai anak mit nya. Bini Unggang nyau rauh-rauh nyabak
mandam dada diri bai kelalu tusah ati. Indu sida serumah ke bukai pan bakanya.
Nadai nyadang utai baka nya tau nyadi. Unggang empu bendar ngeringka semengat
diri.

Tuai rumah sida ke benama Chagat lalu ngangauka lelaki sida serumah sama bela
betugung ba ruai siti alai sida ke deka baum ke mayuh macham pengawa kandangka
ngintu pemati anak Unggang nya. Tembu baum, pengawa pan udah dibagi, dia sida
serumah pan mupuk ngereja pengawa nitihka udah dilanggur tadi.

"Lapa dek enggai enggau sida aya dek diau ditu igat. Enda mih asai dek kediri-diri ngibun
tembawai nya din." Pia ku Chagat bejaku enggau Kebing.

"Sayau ga rumah nya nadai orang ngibun tuai. Niang apai seduai indai sayau amat ke
rumah nya. Aku tu empu pan besai diau ba rumah nya." Ku Kebing nyaut.

"Seraya ke ngibun rumah, lalu nyaga tanah tembawai nya ga aku tu tuai. Menyadi bukai
nadai ga aku tu." Ku Kebing nampung baru jaku iya. Nadai saut agi Chagat ninga jaku
Kebing ke munyi nya.

Dua malam pengudahka disenggai, tumu pagi siti sida serumah pan mupuk nganjung antu
ke tanah pendam kin. Laban pendam ke enda nengah jalai ai, ka semina sebatang insap
aja penyauh ari rumah panjai. Datai ba pendam dia, sida pan belabuh ngereja pengawa
ke patut. Pengawa nyadi lempung laban sama bela besaup ngereja ya. Mata panas baru
deka niki, pengawa sida pan nyau ga udah tembu. Ukai nya baka ke besai, pendam anak
mit aja.

Pemulai ari pendam, sida pan baum ngeletak lalu nanam ulit. Ulit diletak sida 2 minggu.
Semina pengawa ba genturung rumah panjai aja dikemendarka. Mindah ke kebun, ngasu
beburu sigi ditagang. Kebing minta diri empu pulai pengudah pengawa seharinya tembu.
"Perau kitai siti nya bai dek igat. Ambi ke bisi dikena dek berundang kulu kili." Ku Lijau
(menyadi apai Kebing) madah ngagai Kebing.

"Au mih aya. Mupuk dulu ga aku. Nadai utai agi asai aku. Nganti ke ngetas ulit ila aku datai
baru." Ku Kebing.

Takah 3 lemai udah nya, tengah malam siti.....
Ujan beberis nyerumba angin ke bepuput. Munyi rejat kaki siku mensia redup-redup bejalai
nengah jalai tanah luchak nujah pemetang malam maia nya. Belakang iya bisi ngema uyut
mit siti. Besan ke changkul enggau sandak ba bau kanan iya. Jari kiba iya megai lampu picit,
betenggauka jalai damun nuju tanah pendam. Tanah pendam rumah panjai Tanjung
Kepayang. Singkang kaki iya ngetu lebuh iya ke udah ngenataika diri ba mua jalai penama
nuju pendam kin. Dia ati iya bisi bebagi dua. Kekayang. Sekalika deka tama, tauka mulaika
diri baru.

Iya udah mutus ati. Nama-nama utai ke nyadi, pengawa malam nya enda tau enda
dipenyadi. Iya nyingkangka kaki iya nengah tanah pendam nya. Sekali dua ga kaki tudah
diri tejanggal lebuhka nyangkut rumput ke tumbuh bauh. Pemuyan enda ibuh sebut agi.
Datai ba pendam siti, singkang kaki iya ngetu lalu ngelekaka changkul enggau sandak iya.
Peluh ke nerusan bechampur enggau ai ujan ngemasahka tubuh enda dipedulika iya agi.
Uyut mega diingkaska iya.

Iya dedegi merening pendam mit siti. Pendam anak mit. Tanah agi baru. Dipelabaka iya baru
3 hari udah ditanam. Leka ke iya lampu pichit lalu japai iya changkul. Udah nya iya lalu
belabuh engkubang pendam nya. Tumbak enggau naka penegar tulang. Pemuas ke
numbak, dinga utai semetup kena pantap mata changkul iya. Baban iya ngeraus tanah ke
agi bisi beteda, ngujungka lungun mit siti nyau tebantai ba mua mata iya dia. Enggau naka
ulih iya ngerebakka lungun nya. Tekerebak mih lungun nya tadi, dia iya tepedaka bangkai
anak mit siku agi likun bebalut gari. Taja bisi ngesuh mimit bau but, tang nya enda nyadika
penanggul.

Gegetar jari tudah lebuh iya ke deka nyapai bangkai anak mit nya. Dikerendut
lalu dibai iya niki pansut ari lubang. Japai iya uyut mit ke bisi dibai iya tadi lalu
ditabanka iya nuju langkau mit siti. Bangkai nya tadi dipangku iya dulu alai iya
ngulihka keresa ti bisi disimpan ba dalam uyut mit nya. Bantaika iya butul tusu
ke udah bisi disimpanka ai tusu. Dian bechura mansau tiga batang lalu selambar
keretas ke bisi tulis. Tekala nya mega iya ingatka jaku pesan apai tuai ke alai
iya nuntut penemu nya.

ABIS