Kumpulan Gurit Tempe Kemul_REVISI

Ayu  
 

Minggu, telu Desember rong ewu pitulas 
Aku lan sliramu bisa patemon 
Sawise telung puluh loro warsa 
Pinisah tanpa pawarta 
Tan kinira eba bungahing atiku 
Bisa nggegem astamu 
Bisa nyawang netramu 
Ing pahargyan palakramane putamu 
 
Ayu… 
Aku lan sliramu amung bisa nyawang 
Tan bisa nyandhing 
Kedheping netramu 
Nggambarake gedhening kapangmu 
 
Ayu… 
Apuranen aku amung nambahi gorehing atimu 
 
 
 
 
 
 
  

Kumpulan Gurit Tempe Kemul | 43 

 

Demafa 
 

Dea Ema lan Azfa 
Tenger kang dakparingake 
Marang katelune 
Bocah ayu gegantilaning atiku 
Wiwit isih dakpangku nganti pungkasing wektu 
Tresnaku mbayu mili 
Ora kentir dening ilining banyu jaladri 
Rasa lara ora dakrasa 
Amrih sliramu mulya 
Bisa njunjung asmane wong tuwa 
Dadi kembang kusumaning bangsa 
 
 
 
 
 
 
 
 
 
  

44 | Alfiyah Indarwati 

Si Ragil 

Kanggo anakku Azfa Noor Gistha 
 
 

Sliramu mijil nalika yuswa wis ora mudha 
Telung puluh sanga rikala semana 
Yuswa kang rekasa kanggo nambah putra 
Bisa‐bisa koncatan nyawa kari raga 
 
Ananging kabeh wis ginaris 
Sliramu dadi putra winasis 
Tamba ati rikala sepi 
Sregep ngaji uga luru ngelmi 
 
Genep sewindu umurmu 
Sansaya ayu uga kemayu 
Yen awan pijer dolan 
Pit‐pitan tekan dalan prapatan 
Amung siji panuwunku 
Dadya putri kang utami 
Njaga asma yayah wibi 
Dadi kusumaning negari 
 
  

Kumpulan Gurit Tempe Kemul | 45 

 

Putri Ayu Klambi Biru 
 

Putri ayu seneng klambi biru 
Netramu sumunar kadya lintang ing wayah dalu 
Nimas Noor Gistha aranmu 
Yen nyenyuwun gampang muwun 
Udan tangis ora uwis‐uwis 
 
Putri ayu seneng klambi biru 
Saiki wis wolulas umurmu 
Seneng turu uga maca buku 
Nadyan mangkono awakmu ora lemu 
Amung siji panyuwun ibu 
Dadya putri kang mituhu 
Mikul dhuwur asmane wong tuwamu 
 
 
 
 
 
 
  

46 | Alfiyah Indarwati 

Klambi Anyar 
 

Isih gumawang jroning rasaku 
Nalika aku isih ndherek ibu 
Ing desa kang adoh saka kutha 
Papan amba pinggir ara‐ara 
 
Isih kelingan jroning ati iki 
Bisa tuku klambi setahun mung siji 
Ngadhepi bada riyadi 
Wayah pasa badane kurang siji 
 
Klambi anyar agawe bingar 
Ora ana dhokar mlakune gancar 
Munggah mudhun gumuk karo mesem sumunar 
Bapa ibu sansaya katon lejar 
 
 
 
 
 
  

Kumpulan Gurit Tempe Kemul | 47 

 

Kembang Mawar 
 

Tinandur ing tengah latar 
Arum angambar agawe ati jembar 
warna‐warna rupamu 
abang, putih, kuning uga ungu 
dadi karemane para putri uga para ibu 
ginawe pethitan nambah reseping kalbu 
 
kembang mawar 
jinejer ing tengah latar 
kinupeng eri kanggo ngalang‐alangi tangan kemaki 
njaga ati supaya tetep suci 
 
 
 
 
 
 
 
 
  

48 | Alfiyah Indarwati 

Jaket Ireng 
 

Sing nganggo jenenge Sugeng 
Saben dina ora nate liya 
Jaket ireng nambahi gantheng 
Ora krasa wis telung dina 
Jaket ireng ora ana 
Digoleki tekan telenging wana 
Nganti entek sandhal lima 
Jaket ireng lagi ngumbara 
Lunga ora pamit uga ora kandha 
Gawe susah wong sakomah 
Semono uga tangga sagotrah 
 
 
 
 
 
 
 
 
  

Kumpulan Gurit Tempe Kemul | 49 

 

Profil  Panyerat 
 

Alfiyah  Indarwati,  M.Pd.  lair  ing 
Boyolali  08  April  taun  1971.  Wiwit  SD 
tekan  SMA  sekolah  ing  tlatah  Boyolali. 
Taun  1990,  dheweke  nerusake  kuliah 
ing  IKIP  Semarang  lulus  taun  1994. 
Njupuk  Pasca  Sarjana  ing  Unwidha 
Klaten  lulus  taun  2017.  Kaangkat  dadi 
guru  taun  1998  lan  dibenum  ing  SMP  3 
Larangan  Brebes.  Wiwit  taun  2000,  dheweke  ngabdi  ing 
SMPN  1  Mojotengah  Kabupaten  Wonosobo  nganti  seprene. 
Asring  nulis  geguritan  lan  Apa  Tumon  kang  diemot  ing 
majalah  basa  Jawa  Panjebar  Semangat.  Antologi  Geguritan 
Padhang  Mbulan  2017  (asil  nulis  bareng  kanca).  Saiki 
manggon ing Perumahan Limas Garden Blok I no 4 Jlamprang 
Wonosobo.  Dheweke  isa  dihubungi  ing 
[email protected]. 
 
 
 

50 | Alfiyah Indarwati