KANDAYU MANTANG KAYU ERANG

KANDAYU MANTANG KAYU ERANG

1. Atei itah harajur mangenang
Maniruk auh te sapanjang-panjang
Auh lunas jalan malempang
Panamuei randung banama tingang

2. Banama mamuat paramun gawi
Ije mahin dia ati balihi
Tarantang garu due puluh ije biti
Puat banama te sapan jadi

3. Banama tanggar te dia tiling
Itah samadiai uras mahining
Palus inulak auh bataling
Raja ngaragan je balai mihing

4. Tulak banama gitar gantau
Naharep matan andau tumbu
Panamuei banama gulung pahuru
Umba kakare taluh ije inggau

5. Auh kandayu sasar basikap
Banama mahalau ambun tantilap
Panjungan manjung inuju ancap
Lawang haselan kalawet batatap

6. Manjung i-urik dia narusan
Tende balaku sawang kaharingan
Tihang banama murik jalayan
Namuei danum tatau nyahukan

7. Tamuei banama paham bagulung
Dia nyarita je luwuk tanjung
Banama tingang palus parantung
Tende lewu bukit Ambun Bagantung

8. Banama tingang je palus tende
Mantir mantang je Rahan Dare
Putir Santang ewen hanyahe
Raja kameluh bawi hatue

didunniaton@gmail.com

9. Mantir mansanan ampin jalanae
Untung rajaki inenga akae
Lilis Lamiang hapan manduae
Bakam Batu eka nyarangae

10. Gawin Mantir te uras jadi
Limbah balaku ewen nanjuri
Lumpat Banama i-engkat tali
Banama haguet dia bahali

11. Tamuei banama dia bambilit
Nanturung tumbang je lawang langit
Raja Tantilap je utus rihit
Asun Bulan manjijit huit

12. Lawang langit haluan Banama
Jamban Sangiang Mantir balua
Bukit masuluh bintap tantawa
Tende lewu Bukit Tambak Raja

13. Ampin tamuei Banama bagulung
Tende nyambau je Rahan Timpung
Uluh are rata hapumpung
Ungkup babuhan laut mangantung

14. Handue Raja mendeng nanjuri
Rahan Timpung umba Nyai Siti
Umur panjang tuah rajaki
Banama batulak Rahui ngamburi

15. Banama namuei je hararahan
Murik tumbang je kasabahan
Burung metu macam bakuyan
Lauk bilis Ranying Manjuhan

16. Panamuei banama dia panjang
Murik pantai danum sangiang
Raja tatau je lebih sanang
Mina bulau telu karung kajang

17. Tende banama hete hanjulu
Raja Mantir mendeng balaku
Umba Raja je Burung Bru
Takar gantang inenga telu

didunniaton@gmail.com

18. Banama namuei hai pahalendang
Mantir mandulang untung aseng panjang
Murik pantai danum sangiang
Sembang tumbang ulang hagandang

19. Labehu eka Tambun Baputi
Talagan tuah talangan rajaki
Akan gagenep uluh ije ati
Bakas tabela hatue bawi

20. Tamuei nyandar randung banama
Mamuat balai lambang palaka
Eleh kakanderang jadi hakaja
Umba panatau je Tingang Rangga

21. Mantir mendeng palus hagatan
Mahining auh kanderang tingang
Harandue Raja mambuka lumping
Sarangan bulau untung aseng panjang

22. Banama miar je jala-jalan
Murik batang danum jalayan
Pahalendang lewu te palus gitan
Bagare kaleka je Batu Nindan

23. Banama sembang kaleka lewu
Bua are sukup macam baribu
Gagenep batang masak manuru
Teras sawang salanja sanselu

24. Mantir marentah tarantang garu
Lumpat maname je huma Ungku
Sapala namuei uras ilaku
Behas jete je paham perlu

25. bihis-bihisan tarantang garu
mimbittintue sama baramu
babaran garing karungan metu
manuk bawui je lakang buku

26. bagantung banama tende batahan
manunggu masak bari panginan
Teras Sawang Eteng pakanan
Ganan Luyang bawin balian

didunniaton@gmail.com

27. Raja mantir haguet manyampan
Bahata tambak tuntang panginan
Tuntang balai sarin kambungan
Akan likut kaleka batu nindan

28. Raja dumah puat sadia
Uluh lewu kaleka, due biti umba
Babaran garing imuat kea
Apar dulang landai parade.

29. Lasang dumah hai pahalendang
Mantir mampandui salumpuk Entang
Intu talagan untung aseng panjang
Rajaki tuah belum tatau sanang

30. Mantir dumah mendeng nanjuri
Lewun tamparan uluh tuh ati
Raja kameluh je putir Nyai
Raja uju kanaruhan basakati

31. Limbah raja mendeng mujan
Salumpuk mandui nyalung kaharingan
Teras sawang laluh ngaragan
Jamban injijit- je halalian

32. Banama batulak ampi jadi
Batu nindan jadi i-lihi
Hayak auh paham karami
Tapuk tasik ngantung santagi

33. Panamue banama dia kejau
Mahalau tasik rampang matan andau
Are eka ije i-halau
Sembang banama huang ije pulau

34. Hining itah je bara bahut
Kinjap uluh tau manyewut
Banama namuei dia maliut
Jete bagare pulau karungut

35. Murik danum barirai parantung
Mahalau lewu bukit batengkung
Butut nusa bukit lambayung
Tarusan kumpang tame bagulung.

didunniaton@gmail.com

36. Banama tapuk danum jalayan
Batang danum menteng bajaman
Bukit sua tintun tujuan
Tende banama tekap Malayan

37. Hangkalime mantir nanjuri magun
Umba Raja Rawing Tempun Telun
Tuntang Kameluh Tempun Tiawun
Taluh inggau uras atun dinun

38. Jadi nanjuri haguet banama
Rawing Tempun Telun mahin umba
Murik nalatai kare lewun Raja
Tarusan paruru barantai i-huru kea

39. Tapuk batang sangkalila
Danum tatau je baranuha
Tengan awi Ranying Hatalla
Tende lewu bukit kasinta Raja.

40. Sembang bukit sinta kasambuyan
Mantir lumpat je rahan runjun
Panamuei jalanae uras insanan
Sangomang lentar rata katawan

41. Bukit shinta jadi i-nggawi
Banama inulak mujan kea jadi
Murik tarusan nyalung nantiri
Manyundau tamparan je itah ati

42. Tamuei banama kejau ingguang
Tapuk tasik riak Mihing Sambang
Nyamah manelak Baner Sangkuang
Simpei karuhei kaleka huang.

43. Murik danum simpei karuhei
Danum hasahep penyang karuhei
Lasang timpung nyahaman bewei
Hapan mantir nangkaje rawei

44. Dumah mantir nyampan jalanae
Supun untung lamiang induae
Entang tingang tintun tujuae
Bakam batu eka nyarangae.

didunniaton@gmail.com

45. Banama haguet murik laju
Eleh tapuk tasik sangkalemu
Pahalendang banama bahalap tutu
Raja ngaragae je ewen telu

46. Haluan banama sangomang bahut
Ie manelak rasau je kaput
Hayak tarusan ambun hadurut
Tatau nyahukan tasik basewut

47. Ampin Banama jalanae rangkah
Banama tapuk tasik manuah
Sangomang haluan je-japan tatah
Lampang ije kabawak kandarah

48. Pantar Nyalung Bukit Batu jadi gitan
Raja Telu uras jadi katawan
Nutung garu mamapui Manyan
Murik batang danum bapantis runjan

49. Mahalau bukit ije are tutu
Hakayun penyang je sangkalemu
Uju bukit ije batantu
Banama tende huang laut lewu.

50. Bukit uju je baratingang
Banama tende huang laut batang
Mantir balua jamban ingancang
Manarui jalanae Banama Tingang

51. Janjulanan banama ije namuei
Je-inggau uras tege bewei
Bungai langit Raja Manyamei
Tende Bukit Tampung Karuhei

52. Bara hete Banama Batulak
Limbah dinun kare kahandak
Umba bapae Raja hakutak
Indue inyundau tamparae sulak

53. Banama tulak tame tarusan
Tapuk batang danum letai runjan
Panamuei hindai tau Malayan
Tende banama je nyambau rahan

didunniaton@gmail.com

54. Rahan kameluh Nyai Inai Mangut
Nyai mahaga je runjan riwut
Ewen sundae tatau basewut
Sandik karuhei penyang sambalut

55. Batulak tinai Banama manuju
Tarusan bulau je sangkalemu
Panamuei banama te paham laju
Tapuk tasik mandalan raja telu

56. Bukit linda bulan eka tende
Mantir lumpat je rahan dare
Raja kameluh je uras tege
Uluh danum karimoi kampeleng hete.

57. Raja mantir pandulang untung
Banama palus haguet bagulung
Bulau namburak tarusan nanturung
Tapuk tasik gandang ngarambang duhung

58. Banama dimpah dia bambilit
Naturung danum mantining langit
Gadung gasa balai masigit
Upun garing je tungket langit

59. Panamuei banama je jala-jalan
Limbah jadi maja ije rahan
Palus tapuk tasik handaran
Hayak tende intu je rahan

60. Tulak banama tinai jala-jalan
Limbah jadi maja ije rahan
Tame tinai ije tarusan
Palus tapuk tasik kaharingan

61. Raja telu, tunggal sangomang
Palus nanturung ije pahalendang
Batang garing tau nganderang
Mangku-Amat Sangen Nyai Jaya Sangiang

62. Uras jadi taluh ilaku
Batulak tinai ewen Raja Telu
Limbah manyundau je tingang tatu
Murik batang danum marakunju

didunniaton@gmail.com

63. Panamuei banama je paham panjang
Manyarah pantai danum sangiang
Mandulang balau untung aseng panjang
Tapuk tasik jaleang tingang

64. Banama namuei jala- jalan kejau
Supun untung are inyundau
Benang Entang Kandarah Bulau
Tapuk tasik je pawah Bulau

65. Panamuei Banama tinai parantung
Tamuei raja telu paham bagulung
Nyandar batang lunuk bagantung
Tapuk Danum Nyalung Batengkung

66. Dimpah tasik malambung bulau
Gitan pahalendang tuh ije pulau
Jamparan Banama dia mahalau
Tende palakuan kare panatau

67. Haguet banama tinai parantung
Tamuei raja telu paham bagulung
Nyandar batang lunuk bagantung
Tapuk danum Nyalung Batengkung

68. Raja telu je hakanduang
Banama narusan je salat sawang
Danum mendeng jete ingguang
Tende bukit bulau kangantung gandang

69. Kangantung gandang sembang jadi
Raja telu palus batatap biti
Mingat kajayae sapire ije ati
Ewen telu uras mandai

70. Mendeng raja tunggal sangomang
Lumpat lewu bukit kagantung gandang
Pakaian sukup je batun penyang
Duhung hintan je intu kahang.

71. pakaian uras je hapan jadi
Raja telu haguet mandai
Tisin bulau je sinta mani
Ie mahapan aran raja putar tiki

didunniaton@gmail.com

72. Mangkepan tisin je sinta mani
Kayu erang palus indai
Tamparan samadiai te uras ati
Uka kare gawi uras tau manjadi

73. Mendeng hayak je raja telu
Uras manalih je upun kayu
Erang Tingang gambalang nyahu
Tuntang kayu pampang saribu

74. Ampin Raja Tunggal Sangomang
Sembang Upun je Kayu Erang
Hete raja mendeng manimang
Tempun gawi belum tatau sanang

75. Timang Kayu Erang te sukup jadi
Janjin Hatalla i-ilalus i-awi
Pa-intih Hatalla ije mandai
Tikas Sangomang tuh ije biti

76. Tungking langit pals mandai
Kayu Erang katamparae ati
Batang Erang te puna sakti
Edae bungking te sapanjadi

77. Hete Sangomang mijen bajanda
Duhung inyilak hapa mambuka
Bungking ranggang te gita huma
Kameluh Bulau je Bawin jatha

78. Kameluh Bulan je bawin jatha
Kameluh Anak Ranying Hatalla
Supun untung i-laku Raja
Nyalung Kaharingan induae kea

79. Talagan tuah lapekung rajaki
Uras imekat tuntang injawi
Kahimat mangat tau manjadi
Samadiai kahandak ie kurik hai

80. Taluh handiai te uras dinun
Ampin Raja Telu te handak muhun
Utus bibit tilap manurun
Tukep sembang je baner upun

didunniaton@gmail.com

81. Uras muhun jadi je Raja Telu
Bara Kayu Gambalang Nyahu
Pusaka baguna je uras dinu
Kaharingan Belum Penyang Sangkalemu

82. Raja Telu je hakanduang
Limbah mandai hapantar pinang
Manyundau Raja je Angking Penyang
Tuntang Kameluh Putir Selung Tamanang

83. Raja Angking Penyang eka balaku
Sapire bewei taluh ije tau
Supun untung bulau sangkalemu
Kare tangkalasan je bunu hantu

84. Kangantung gandang sukup gawi
Raja mantir mendeng nanjuri
Hakaliling lewu sapire ije ati
Raja Kameluh pire-pire biti.

85. Kagantung gandang sukup gawi
i-lalus awi Raja Telu Biti
mampandui salumpuk sapire ati
mangat batuah belum marajaki

86. Tulak Banama bara lewu bukit
Jarak i-engkak palatar injijit
Supun untung uras i-imbit
Danum mendeng ngatimbung langit

87. Panamuei Banama dia kejau
Tapuk danum banyahu bulau
Hetuh are taluh inyundau
Kayun penyang karuhei tatau

88. Ayun Balai Sarin Kambungan
Mangat tau uras katawan
Panamuei Banama murik jalayan
Tende manjala je lauk untung

89. Labehu handalem riam hantutung
Banama tapuk sarigadung untung
Tende manjala je lauk untung
Itah kumae tatau manyambung

didunniaton@gmail.com

90. Haguet Banama murikharatean
Ungkup Sawang sapire ije gitan
Raja Telu namuei kabajuran
Bukit Tunjung eka tujuan

91. Bukit Tanjung Sembang jadi
Tende ungkup sawang tempun gawi
Uluh are panggil barami
Banama bajarat imeteng tali

92. Hetuh banama ba-ungkar paut
Lakang buku impalumpat
Indang Salangking Ampat Salamat
Bagawi karas atei bahimat

93. Raja umbet gawi-gawian
Masak uras bari panginan
Panggil are biti bakuyan
Raja ewen nyarung-ngantihan

94. Limbah ngantihan hapantar pinang
Sama ngantung tulang batekang
Raja Telu je hakanduang
Ewen mimbul je batang sawang

95. Ewen mampendeng je batang sawang
Bawi sandah je nangkasiang
Kayun karuhei akan karambang
Sirat bulat je hakalingkang

96. Sadia jadi gawin karambang
Telu Raja mendeng mangkang
Batang sawang palus inimang
Tempun gawi je tatau sanang

97. Gawi uras jadi sadia
Upun Sawang jadi inata
Nyalung Kaharingan i-nanjuri kea
Panengan awi Ranying Hatalla

98. Limbah jete panggil bakarak
Buli eka tintun kahandak
Kilau ampin ampah bakarak
Banama tingang handak batulak

didunniaton@gmail.com

99. Banama masuh danum banyahu
Manyarurui ampin jalan je helu
Supun untung are i-laku
Inanjuri kareh amun sembang lewu

100. Pambuli banama paham bagulung
Tapuk tumbang panjungan manjung
Palus masuh tinai je parantung
Tilap ambun lepah i-nanjung

101. Panamuei randah banama buli
Sembang eka uluh tempun gawi
Palatar i-uluh injarat tali
Tatambat hila lawin kamburi

102. Banama tingang je jadi dumah
Mimbit unung rajaki tuah
Karuhei tatau penyang panyampah
Tampalawei andau je durut sawah

103. Andau sawah tarang balawa
Kare gawi tinai nampara
Rangkan panginan uras impalua
Bara balai lambang palangka

104. Matan andau jadi gantung
Raja nanjuri je supun untung
Kayun karuhei penyang hatampung
Bara ngambung tasik malambung

105. Panginan uras jadi sadia
Piring saling uras impalua
Bangkusan timpung uras i-riksa
Bungkar puat randung banama

106. Bungkar puat banama tingang
Behas tambak labien gantang
Bulau singah manyurung timbang
Depen uei hanjuju gawang

107. Raja telu ewen hakanduang
Mameteng manas nelun lamiang
Jamban karuhei je untung panjang
Panyaang panarangmek tuntbang unt

didunniaton@gmail.com

108. Buwur hambaruan rata jadi
I-hantuk i-malas hayak inyaki
Hampatung tuah tuntang rajaki
Sahapus hakekat je niat gawi

109. Palempang jalan tikas tuh helu
Hajamban riwut bahing kandayu
Insanan awi je raja uju
Akan panungkup je Raja Bunu

110. Kalutuh auh jalan palempang
Nyarita tamuei banama tingang
Ngaragan Raja Tunggal Sangomang
Nanturung Batang Kayu Erang Tingang

111. Mangat itah rata katawan
Tamuei banama murik jalayan
Jalanae balaku nyalung kaharingan
Kayun penyang karuhei pasihan

112. Uras sukup taluh indinu
Awi raja ewen telu
Lepah i-nanjuri amun sembang lewu
Kayun panatau je sangkalemu

113. Auh palempang kalutuh bewei

Kahanjak huang narui parawei
Kakare auh keleh –nyimpei
i-haga i-rima je huang atei

114. Jalan malempang je tende helu
Tende kea riwut kandayu
Mahapan kandayu rawei balemu
Basarah akan Hatalla ngambu.

didunniaton@gmail.com