KANDAYU MANYARAH SANGKU TAMBAK RAJA

KANDAYU MANYARAH SANGKU TAMBAK RAJA

1. Sangku tambak hai pahalendang
Basuang behas parei manyangen tingang
Rukun tarahan je giling pinang
Inihang luhing je dandang tingang

2. Sangku tambak hai baguna
Inyarah bentuk balai paseban Raja
Taharep ulun bakas tabela
Manumun peteh Ranying Hatalla

3. Sangku jetuh basuang behas
Pambelum inyarah dia bara tikas
Umba Hatalla ilaku ka-abas
Hambaruan salamat bereng barigas

4. Hetuh itah uras manyaksi
Ranying Hatalla te puna ati
Biti bereng daha dan isi
Bakas tabela hatue bawi

5. Hetuh itah manyarah sangku
Panungkup utus je Raja Bunu
Tutuh kameluh balimut batu
Peteh hajamban je Raja Uju

6. Hatalla nangkilik Jatha nanggera
Narui peteh sangga tatamba
Nyalupu sangku tambak Raja
Akan kaharingan sahapus dunia

7. Sangku inyarah manumun peteh
Uka itah uras menteng ureh
Aluh utus ije kueh-kueh
Bereng barigas kahaban keleh

8. Itah manyarah dia Malayan
Umba Hatalla ije katamparan
Uka manenga nyalung Kaharingan
Ingkes into behas hambaruan

9. Sangku inyarah je intu baun
Sangku impunduk je into hunjun
Narai ilaku inenga dinun
Tuah rajaki je uras atun

[email protected]

10. Sangku inyarah puna bagulung
Behas imintih bangkusan timpung
Panyalumpuk entang penyang hatampung
Sama belum tatau manyambung

11 Sangku inyarah kalutuh helu
Imapui manyan sangku inggaru
Lampang ewau je mangat tutu
Mukei kuasan je Raja Uju

12 Hetuh itah je sama mite
Intu bentuk je biti are
Behas i-intih hariten pire
Jetuh panenga te tutu tege

13 Hetuh itah je uras mingat
Pasin Hatalla batang salamat
Aluh narai bewei kahimat
Gawi manjadi hayak imberkat

14 Pasin Hatalla jadi inarang
Coba irima hayak ingumang
Bara tamparae sapanja-panjang
Bakandung behas manyangen tingang

15 Hetuh itah uras katawan
Bentuk ungkup utus babuhan
Lunas helu tege kalampangan
Janjin Hatalla tantahian huran

16 Itah kaharingan laku imberkat
Ranying Hatalla atun mampa-ingat
Keleh utus mamparahan kabulat
Belum batuah bereng salamat

17 Hajamban jetuh bulau mandurut
Tatean riwut bahing karungut
Peteh hajamban Nyai Inai Mangut
Parit balanga je runjan riwut

18 Balanga bulau je runjan riwut
Turus panatau ain inai mangut
Nusang pahayak ambun hadurut
Eweh katawae tatau basewut

[email protected]

19 Sarah sangku tikas hetuh bewei
Basarah penyang itah hinje simpei
Mamparahan ampin kabulat atei
Kaharingan belum penyang karuhei

20 Sangku inyarah umba Hatalla
Kahimat itah bakas tabela
Tuah rajaki utus babala
Umur panjang belum baguna

21 Hetuh itah basarah bulat
Hinje atei tiruk pampakat
Manintu Hatalla eka kahimat
Bereng barigas itah salamat

[email protected]