GEGURITAN AJI PALAYON

Pangastungkara ngastawayang sang lina
Om Awignam satu
Atma Tattwatma narayatma swadah,
Ah Om Swargantu, moksantu, Sunyaitu murccantu
Ksama sampurna ya namah swaha

PADARTA
Om Hyang Parama Wisesa
Astu Jiwitaning Sang Paratra.......
Sidha manamwaken swarga pada
Mamisre ri dehanta
Tan hana wighe anungkup nirmala bhawana
Om Hyang mami
Ksamakna sadosanya
Plar sampurna makantang ri Kamahatmyanta
Kasadhu jnyananta, len anubhawantu
Om Santhi, Santhi, Santhi Om

TEGES
Inggih Ratu Sanghyang Widhi Wasa
Mugi-mugi jiwatman sang lina ..
Sida memanggihin jagat Swarga
ha presidha matunggilan ring anggan palungguh ratu
Tan wenten pamialang nincap jagat suci nirmala
Inggih ratu sasuhunan tityang
Ampurayang ugi salwir dosan ipun
manados sampurna malarapan kautaman anggan ratu
tuk kasatwikan miwah kasampurnan palungguh ratu
Om Santhi, Santhi, Santhi Om

Pupuh Sinom
1. Iseng tityang nganggit gita,

Sangkaning demen magending,
Nagingin galahe luang,
Anggen mamurnayang hati,
Pangkah pongah sareng ngurit,
Nulad Sang meraga wiku,
Aji pelayon punang kata,
Katur ring sang sane pamit,
Jaga nglantur,
Memargi ke Sunya loka,

2. Cerita Sang mraga Atma,
Saking tuduh Sang Hyang Widhi,
Yan sampun gantine pejah,
Tan sida mesangke malih,
Sang Atma janten mepamit,
Ninggal arta,kama,sunu,
Ri pemargin Sang Hyang Atma,
Bintang siang ngendih kangin,
Cihnan ipun,
Das lemahe sampun prapta

3. Suryane mesunar galang,
Egar Atmane memargi,
Ring langite sayan terang,
Ngardi ical bintang sasi,
Katah sekar spanjang margi,
Ambun nyane miyik ngalub,
Paksine meswara binal,
Sadpada mengisep sari,
Kadi wiku,
Rikalaning nguncar Weda.

4. Pemargin Atma Utama,
Lwah Serayu saget panggih,
Punika ne ka tuutang,
Tepyan tukad lintang ening,
Ring sisinnya batu putih,
Taru cempaka ngungkul,
Ledang Sang Atma mesiram,
Saget wenten buaya panggih,
Bungut ipun,
Nyebak ngereresin manah,

Pupuh Durma
1. Sang buaya , digelis ipun ngarepang,

Pacang nadah Sang Hyang Atmi,
Tambis kacegut Sang Atma,
Yening tan gelis lumumpat,
Ngandika Sang Atma raris,
Nah cai buaya, eda mialangin margi,

2. Cai mula, adin beline tuah,
Ari-ari panitis cai,
Sapunika ling sang Atma,
Ring sang menadi buaya,
Ngegol ikuh buaya yukti
Kadi mangege, bawos sang Atma Utami

3. Uduh adi, adin beli mawak buaya,
Tulung beli gandong jani,
Sida ngeliwatin tukad,
Apang gelis beli nglintang,
Saking tukad dalem niki,
Sang ketuduh, ngarepang ia sada gelis

4. Ngenjuhang tundun, ring sang meraga kaka,
Raris munggah tur malinggih,
Ring tundun buaya aya,
Ngelangi ngeliwat tukad,
Tan asuwe saget prapti,
Tepining lwah, sang atma lantur memargi,

Pupuh Ginada

1. Pemargine ngaja kanginang,
Alas madurgama panggih,
Katah tarune kecingak,
Taru ageng tegeh ngungkul,
Ditu sang atma kecadang,
Olih Raksasi, kebawos Raksasi Sirsa

2. Matannyane nelik barak,
Kadi surya kembar ngendih,
Bok selem kadi duk jaka,
Angkihane angina nglinus,
Bungut cara gua linggah,
Gigi lanying, manumpuk rangap tur mangan

3. Layahne meleped dawa,
Waluya naga Basukih,
Rikala meswara ngerak, -,
Kadi krebek siyu mepadu,
Isin alas mengejeran,
Tan ajerih, Sang Atma caria ngarepang

4. Uduh Ibu memen tityang,
Eda meme mialangin,
Pejalan tityang ke Sunya,
Ring I meme tityang tahu,
Nitis saking Bagawasa (Walanakan)
Durus nyamping, tityang nyelang pemarga

5. Uduh cening mraga Utama,
Mejalan Dewa pang becik,
Madak sida labda karya,
Nenten manggihinn pikewuh,
Tumus rawuh ring swarga,
Dawning cening, teleb mlajah Aji Palatra

Pupuh Semarandana
1. Crita malih Sang Atma lwih,

Ngelantur dane memarga,
Pangguh rejeng bukit reko,
Margine nedunang linggah,
Ngojog maring soring tanah,
Irika saget kepangguh,
Macan barak sane nyadang.

2. Macan barak menyagjagin,
Jaga nyagrep Sang Hyang Atma,
Metu jejeh tur mengetor,
Irika dane ngandika,
Nah to adi samong abang,
Melahang adi mengrungu,
Beli adi tuah menyama.

3. Di getihe adi nongos,
Bareng beli adi medal,
Sede tegeh kadi bukit.
Rikalaning manumadi,
Sareng-sareng ke marca pada,
Uli kundi mandi lekad,
Keto adi apang tahu,
Mekipekan ia I macan.

4. Ikuh ngegol laut megedi,
Kadi matutang Sang Atma,
Pejalane sada alon,
Sang Atma kehanan ledang,
Raris ngelantur memarga,
Wenten kidang makecos rauh
Ngicen wangsit ring Sang Atma.

Pupuh pangkur
1. Kememegan dane Sang Atma,

Wenten ula, sane ageng ngeliwatin,
Menawi pacing menyegut,
Sang Atma gelis lumampah,
Saha yatna, ring marga malih kepangguh,
Wenten asu selem ngarepang,
Gede tegeh kadi bukit

2. Sang Atma raris ngandika,
Uduh adi, cicing selem da mencanin
Yeh nyom panitise dumun,
Dewa bareng-bareng lekad,
Ajak beli, nyamping adi da mengulgul,
Cicing selem ya tatas,
Laut nyongkok cihna bakti.

3. Tangan Sang Atma kejilat,
Tur metilar, ngegol I asu memunyi,
Madak Dewa gelis rawuh,
Irika ring swarga loka,
Tur mejalan, Atma Utama ngelantur,
Ring margine panes pisan,
Sunar surya kadi Agni.

4. Sang Atma ke panesan,
Duaning tajeg, Hyang Arka ngemanesin
Dane mekayun meraup,
Maring tepining bulakan,
Tur kagiat, kedis kaklik-meswara umung,
Makeber ipun me tinggal,
Mirib cihna anggen wangsit.

Pupuh Maskumambang
1. Wenten batu ditu Sang Atma melinggih,

Napkala punika,
Katah Buta kala kapanggih,
Meswara ngresresin manah.

2. Ah,ah,uh,uh, ne koya Atma ke panggih,
Lakar tadah ingwang,
Dewek bedak layah yukti,
Uli telun twara neda.

3. Sedeng melah, jani ada atma mai,
Uluh sepisanan,
Punika munyin sang Kali,
Pejingrak ngrunyung Sang Atma.

4. Ngendah pelag, solah sang buta ke aksi,
Ada nagih makpak,
Ada nyegrep nyambak nigtig,
Ada ne nganggar senjata.

5. Tur ngarepang, Sang Atma nenten ajerih,
Ajer matur banban,
Maring Buta kala sami,
Pada waspada mirengang.

Pupuh ginanti
1. Sang Atma gelis úmatur

Ngarepang tan takut ngarepin,
Maring Buta kala Detya,
Sang Bawal lan Sang Badmoti,
Sang Badpamyad Sang Mraja seha,
Sampunang jro duka ring kui.

2. Mangda jro tatas ring ingsun,
Wantah Atma ingsun niki,
Tan pabekel tan rarapan,
Tangan puyung tityang mriki,
Yan jero ngalih lelaban,
Wenten upakara cumawis.

3. Jumah tityang tragia sampun,
Bubur pirata Sang Bawal nampi,
Sekarura Sang Brajasela,
Nasi tumpeng ke aturin,
Sang Badmoti mangda nadah,
Panjang ilang Badpamyad polih.

4. Para buta kala rawuh,
Ring umah atmane lewih,
Sami pada me ngantenang,
Wenten caru lan sesaji,
Sami pada ledang nadah,
Katah sajine cumawis.

Pupuh Sinom
1. Sang Atma lantur memarga,

Panggih marga tiga mangkin,
Rika dane mesandekan,
Lesune tan kadi-kadi,
Antuk edohe memargi,
Can jangkayan raris pangguh,
Kala Patpat mengarepang,
Rambut megambahan ugi,
Tur kelangkung,
langkahnyane lumbang pisan.

2. Tangan ipun gede panjang,
Kadi punyan kepuh ligir,
Ditu ya me swara ngakak,
Nah ne ada Atma buin, .
Kal amah, tusuk tumbakin,
Ah,ah,ah, ih,ih,ih, uh,uh,
Aih, aih, mengarepang,
Kedeh pacang memancanain,
Sada ngelur,
Suarannya ngebekin jagat.

3. Sang Atma matur siaga,
Duh beli Sang Jogor manik,
Sareng beli Sang Suratma,
Miwah maha Kala Ari,
Adi Dora kala malih,
Sampunang mancanen ingsun,
Ingsun mulih nyujur sunya,
Tujuhin ja beli margi,
Tityang tahu,
Duk beli adi di merca pada.

4. Dewa tuah nyama patpat,
Meparab Sang Angga pati,
Praja pati, Banaspatiya,
Banas pati raja malih,
Sang catur tityange yukti,
Angga pati ring papusuh,
Saking cangkem wantah medal,
Swara ah, ah, mangresresin,
Tityang tahu,
Praja pati di hati twah.

Pupuh Pucung
1. Sanak ingsun, Prajapati durus rungu,

Dewa wantah medal,
Saking penyingakan yukti,
Suaranmu, ih , ih, ngardi takut manah.

2. Banaspati, ring limpa dewa melungguh,
Saking karna medal,
Swara uh, uh, nyejeh hati,
Pinih ungkur, ring nyali Banas pati raja
Sekehe santhi Sanjiwani

3. Ingsun tahu, Dewa medal saking irung,
Aih, swaran Dewa,
To Dewa elingen mangkin,
Nyama catur, durus lunga kumah tityang

4. Tragia ditu, catur tarpanane pangguh,
Kala pat pamita,
Ah, ah, ih,-ih, uh, uh, aih,
Nah dong lantur,madak dewa mangguh Swarga

5. Sampun sore, Ida Sang Hyang Surya surup,
wenten pesiraman,
toyane kelintang ening,
suba kasub, mewasta Pancaka tirta,

6. Gelis ditu, Atmane kayeh meraup,
Angga kadi slaka,
kasepuhin emas putih,
pacang nglantur,nyujur gnah Isana loka

Pupuh Durma
1. Caritayang metitah Sang Hyang Iswara

Mangda magpag Atmane lewih,
Minekadi Widyadara,
Widyadari mangda siaga,
Jempana anggen magpagin,
Swaran kendang,benda kempur lan gong beri

2. Sang Hyang Atma,kagiat dane mirengang
Swaran bleganjur ngempengin,
Gong gede makuug ramya,
Gelis ngadeg ya Sang Atma,
Rontek, tumbak, payung, panggih,
Mererod panjang,
Sang Atma twah kepanggih.

3. Sinarengan, reseng langite ngarepang,
Sang Atma takut mengilgil,
Para Dewane ngandika,
Uduh Dewa mraga Atma,
Sampunang I Dewa ajerih,
Bapa wantah,ketitah Hyang Cakra lwih

4. Jani bapa, twah magpagin I Dewa,
Dwaning Dewa lintang subakti,
Pageh kayun tur satya,
Bapa ngateh nuju Swarga,
Mapan Dewa mapikolih,
Nyalanang yasa,
Mraga pradnyan sihin Widhi.

Pupuh Dangdang
1. Nyakup kara, dane Atma matur bakti

Ring Dewata, lwih Betara ngandika,
Ngajum-ajum dewek tityang,
Boya tityang teleb ring tutur
Aji palayon mekadi,
yukti tityang tan wruha,
Reseng langit nyawis laut,
Diastu Dewa tan uninga,
Kuranto bolong,miwah ring prana aji.
Laksana melah nto nyihnayang.

2. Tatuwiyan, I Dewa melaksana becik,
Maring jagat, pageh jati baktya,
Sang Hyang Icana nyweçanin,
Sang Atma ledang ring kayun,
Miragi Betara nyawis,
Gelis munggah ring jempana,
Kemplong-kemplongan lwir ipun,
Kala mlinggih ring usungan,
Ring ambara pemargine ngaja kangin,
Saget rawuh ring jaba khayangan

3. Wenten panggih, bale panggungan alit
Merareyan, Sang Atma kesiraman,
Olih para Dewane,
Pengastawa piragi umung.
Keuncarang para Resi,
Ngeranjing ring Kori Swargan,
Sang Atma kedandan lantur,
Gedong mase masesocan,
Ne keungsi, ngardi angob para Atmi,
Ngranyab kadi bintang ngendih.

4. Akeh pisan, penyaman Sang Atma panggih
Pada metaken, Sang Atma gargita,
Saling sapa saling takenin, ;
Duh nyaman tityang sadulur,
Lintang bagya manah tityang,
Dwaning katah sameton pangguh,
Miwah para Atma sami,
Antuk sweca para Dewa,
Labda karya, presida tityang muponin,
Genahe sane utama.

Pupuh Ginada
1. Sang Atma malih atanya,

Ring dije Bhatarane mlinggih,
Uduh Atma sinarengan,
Nikain tityang apang tahu,
Edoh ke Purin Hyang Smara,
Atma sami,nyawis ring sang wahu prapta

2. Dasa nalikan doh Ida,
Tur mangkin dewasa lwih,
Ida Hyang Jagat Karana,
Sareng rencang jaga tedun,
Mraktyasa wengkon Swarga,
Janten polih, matur ring bukpadań Ida

3. Durung puput bebawosane,
Saget pireng rebab jangih,
Mesuara saling timbal,
Ambarane kadi mekuwug,
Sang Atma sami menyingak,
Sigra panggih, jempana manik mesunar

4. Galangan ring sinar Surya,
Ring ambara Ida memargi,
Swaran para Dewane banban
Mewarga sari mekidung
Rawuhe saksana pisan
Gelis prapti,Sang Atma kehanan ledang

Pupuh Adri
1. Sinarengan, Atmane ngastawa laut,

Ring bukpadan Ida,
Pulah palihe jangkep katur,
Sekar, toya, kukus harum,
Nepud rawuh ke langite,
Sinar dadu Hyang Mesora.
Sang Atma sami umatur,
Nyakup tangan tragia pisan,
Ring cokor Hyang Jagat Karana.

2. Inggih Ratu, aksi sembah Ingsun,
Wantah ring paduka,
Wit tetujon mlajah sastra,
Betara meraga tutur,
Ngardi jagate rahayu,
Tangan kutus nyatur genah,
Kala teja putih matu,
Ratu kebawos Hyang Iswara,
Sinar dadu Hyang Mesora

3. Rikalaning sunar abange ke pangguh
Hyang brahma keparab,
Sang Hyang Rudra sinar Jingga,
Ri kanjekan caya kuninge umetu,
Maha Dewa Ratu ke wuwus,
Hyang Sangkara meteja gadang,
Sunar selem Sang Hyang Wisnu,
Hyang Sridanta parab Ida,
Rikala sinare tan panas,

4. Ri tepengan ratu mateja ulangun,
Ngawe kayune galang,
Hyang Guru parab Betara,
Maka Ciwaning sang putus,
Dibya caksu wantah ratu,
Wyapi-wyapaka separan-paran,
Rikala angkara kelebur,
Hyang Bherawa ratu ke ucap,
Olih manusa ring jagat.

Pupuh Pangkur
1. Tangan Betara wenten patpat,

Maka cihna ratu mawisesa yukti,
Pengaksin paduka tetelu, i
Mawinan tan petawengan,
Bongkol pertiwi, akasa,langite ratu,
Para Atma puput ngastawa,
Ngardi ledang kayun sami,

2. Mepunduħ para Atma,
Maring sering , Ida Betara melinggih,
Sami tusta egar kayun,
Mawosang sedaging Swargan,
Katah panggih, ring Swargan wenten meru,
Indik meru kaceritayang,
Sang Atma ledang miragi,

3. Meru Skala ngangobin pisan,
Maring wetan,genahnya makober putih
Genah Atma pageh puguh,
Teleb ring tapa brata,
Pungkur meru, tegal penangsar jimbar pangguh
Irika genah Atma beban,
Ngulah laku duk ring bumi.

4. Meru tembaga, kidul megenah,
Sami barak, beberokannya ngabirbir,
Genah Atma wanen ditu,
Laksana lwih ring jagat,
Pungkur meru, kawah neraka ditu,
Atma jahil kagenahang,
Seneng ipun, memati-mati.

5. Meru Mase meșunaran,
Kulon gnahnya,kobernyane sami kuning,
Genah Atma, nluh anesti,
Genah Atma meswitra liyu,
Pageh ngelarang kerti yasa,
Pungkur meru, jurang dalem Atma megantung,
Antuk langgah ring rerama,
Megantung petung akatih.

Pupuh Ginanti
1. Meru besi ring lor kukuh,

Umbul umbul selem wyakti,
Genah Atma mautama,
Para ratu duk ring bumi,
Pungkur meru wit curiga,
Genah atma, nluh anesti

2. Meru manike punika,
Ring madya genahnya ngendih,
Atma para Wikutama,
Sane pageh nangun Smadi,
Teleb maring catur wedha,
Tan rered ngredana becik.

3. Wenten Atma purun matur,
Duh pukulun ingsun sisip,
Napi polih tityang genah,
Antuk yadnyan ingsun alit,
Pulah palih pengabenan,
Kelintang nista wyakti.

4. Penyawis Betara halus,
Ring Sang Atma ne menangkil,
Uduh Dewa para Atma,
Laksanane duk ring bumi,
Pageh kayun lan matingkah,
Niwrti marga solah becik.

5. Niwrti marga punika,
Jnyana, karma, bhakti margi,
Nunggalan Atma paramatma,
Lantaran mesolah becikg.
Ngardi jagate sukerta,
Ento bekelang ngalih linggih.

Pupuh Semarandana
1. Sedek Atmane ketuturin,

Tutur tatwa Upadeca,
Wenten duta Atma katon,
Utusane matur nembah,
Ampurayang ratu tityang,
Oja ratu salit sengguh,
Ingsun utusan Dewi Durga.

3. Tityang niki kenikain,
Mapagin Sang mraga Atma,
Mapesengan....reko,(Parab sang sane seda / ke aben)
Guwungannya ke abenang,
Sapuput maben kewaliang,
Ke Swarga mewali mantuk,
Mangkana ling Duta Atma.

4. Utusan lan Atma pamit,
Gelis rawuh ring ambara,
Kadi paksi me keber nyander,
Lungane ke merca pada,
Saget rawuh ring bwana loka,
Sinarengan napak tedun,
Kula warga ngwangun yadnya.

4. Sang ke aben sampun iriki,
Melinggih ring bale peyadnyan,
Buka dundun kadang warginnya,
Pianak cucu pada lega,
Pitra Yadnya ramya pisan,
Sang Atma raris umatur,
Bawose piragi sawat.

Pupuh Sinom
1. Jati agung suksman tityang,

Tresnane segede gumi,
Madak Ida Sang Hyang titah,
Masweca ring para wargi,
Braya pamidara sami,
Atur Sang Atmane nyunyur,
Nyama brayane ngastawa,
Duh Pitara Atma suci,
Madak pangguh,
Moksartam lan Jagat dhita.

Pupuh Ginada Eman-eman
1. Amunika puputang tityang,

Aji pelayone puniki,
Janten makweh sane kirang,
Dwaning tityang wau muruk,
Melajah nyurat lan nembang,
Sweca ugi,
Ngaksamayang pongah tityang,

2. Kirang langkung aturan tityang,
Sinampura Betara sami,
Tambet tityang kelintang,
Mangda sweca micayang rahayu,
Bekelang kayang ke wekas,
Manumadi,
Mengayah ring merca pada.