Digaga enggau ditusun Pengajar Awa PELANDAI HARI GAWAI SK SENADIN 21 MEI 2023 Pengawa ngetau udah tembu, Pekit Kumang udah diadu, Nandaka Gawai nyau datai baru, Pulai ke menua betemu bala suku juru, Baju gagung agi digantung, Baju burung bedau disarung, Tupi lelanjang meruan digitang, Datai Hari Gawai dikena ngabang. Gawai tahun tu chukup dianti, Ulih betemu enggau apai indai, Ulih betundi enggau bala menyadi, Iya ke biak enggau ke tuai. Gawai tahun tu chukup penyamai, Ulih betunga duduk di ruai, Bejalai ngabang niti ruai, Ulih begulai enggau bala temuai. Gawai tahun tu chukup pengerami, Ulih bebuti enggau pangan diri, Sida ke biak enggau ke tuai, Ngajat ngelilingi ranyai kitai. Semua Nyebut: Nya aja ari kami, Pelandai Hari Gawai tahun 2023, ari Raban Pengajar Iban SK Senadin. Kami meri selamat Hari Gawai, gayu guru gerai nyamai, lantang senang, nguan menua. Ohhhhaaaa!
PELANDAI SELAMAT HARI PENGAJAR Ngagai kitai pengajar ke pandai di chunggai jari tiga, Kitai sehari tu, Ngintu Hari Guru, Ngerami Hari Teacher. Aram kitai nikal ke pun, Nimpaika peturun adat bansa, Meri jaku peransang sereta jaku ansah, Ngambika sida pengajar terus mansang, Nempa sereta ngajar anak bansa. Kitai guru ke begelar pengajar, Kitai cikgu ke dipadu neresa menua siga, Mai kitai ngangkatka adat cherita jeman kelia, Bisi dikingatka sida ke biak dudi ila. Kitai ke selantang cikgu baru, Kitai ke udah dichiri guru jeman diatu, Mai kitai ngangkatka cherita kitai empu, Ngambika bisi dikingatka sida nembiak rebak baru, Awakka penemu kitai empu enda tekebu laya midang. Kitai guru ke disagu megai amanah, Kitai cikgu ke dichiri ngangkat maruah, Mai kitai sama-sama ngangkatka adat cherita manah, Ngambika bisi dikingatka sida nembiak ke benung lelejah, Dikena sida bungah bekelakar nuju pemanah. Kitai pengajar ke begelar tampuk pemandai, Kitai teacher dalam jaku Europa ke dibasa pemadu besai, Mai kitai ngangkatka adat cherita tuai, Ngambika bisi ke penemu nembiak kitai, Nyadika pesaka sida selantang anak dara, Bisi dibantai di tengah ruai lebuh maya gawai. Kitai selantang pengajar sidi, Ti endang mutus ati berani kempang, Mai bebatak bala nembiak belajarka urat cherita nyadi, Ngambika bisi ke penemu nembiak rebak dudi, Nyadi anak bansa ti beguna sereta lati. Keba kitai diangkat enggau martabat, Meruan pengarap tebalan wawasan, Aram kitai sama negi, sama seati, Dalam penyerakup perintah Madani. Selamat Hari Pengajar “Pengajar Mentas Penyungkak Generasyen Madani”