Jesus Besampi Ke Sida Murid Iya 1 Lebuh Jesus udah nyebut nya, Iya engkadah ke langit, lalu bejaku, “Apai, maya udah datai. Muliaka Anak Nuan, ngambika Anak ngemuliaka Nuan, 2laban Nuan udah meri Iya kuasa atas semua mensia, ngambika Iya ulih meri pengidup ti meruan belama iya ngagai semua orang ke udah diberi Nuan ngagai Iya. 3 Tu pengidup ti meruan belama iya, ngambika sida ngelala Nuan, Allah Taala ti bendar, enggau Jesus Kristus, ke dikirumka Nuan. 4Aku udah ngemuliaka Nuan di dunya tu, laban Aku udah nembuka pengawa ti diasuh Nuan kereja Aku. 5 Nya alai diatu, Apai, muliaka Aku di mua Nuan Empu ngena mulia ti dikemisi Aku di mua Nuan sebedau dunya digaga. 6“Aku udah madahka nama Nuan ngagai orang ke udah diberi Nuan ngagai Aku ari dunya tu. Sida endang enggi Nuan, lalu Nuan udah meri sida ngagai Aku, lalu sida udah ngasika jaku Nuan. 7Diatu sida nemu, semua utai ti udah diberi Nuan ngagai Aku endang ari Nuan magang, 8laban jaku ti diberi Nuan ngagai Aku, udah diberi Aku ngagai sida, lalu sida udah nerima jaku nya, lalu nemu enggau bendar Aku amat datai ari Nuan, lalu sida udah arapka Nuan udah ngirumka Aku. 9 Aku besampika sida. Aku ukai besampika dunya, tang ke sida ke udah diberi Nuan ngagai Aku, laban sida endang enggi Nuan. 10Semua utai Aku endang enggi Nuan magang, lalu semua utai Nuan endang enggi Aku magang, lalu Aku udah dimuliaka dalam sida. 11 Lalu diatu Aku nadai agi di dunya, tang sida agi mengkang di dunya, lalu Aku mupuk ngagai Nuan. Apai ti Kudus, jaga sida ngena kuasa nama Nuan, nama ti udah diberi Nuan ngagai Aku, ngambika sida nyadi siku, baka Tua ke endang siku.
Shalom serta meri tabi basa menyadi dalam Jesus Kristus. Diatu kitai udah datai ba minggu Ista ti ke-7. Lalu saritu aku deka bekunsi enggau bala kita ari baca Injil kitai pagitu ti diambi ari St John 17:1-11. Rambai jaku ti deka dikunsi aku enggau bala kitai saritu ianya BESAMPI. Aku deka nanya kitai….Kemaya kini kitai ulih besampi? 1. Sebedau tunduk malam 2. Udah dani tinduk 3. Sebedau makai 4. Sebedau ngereja pengawa 5. Lebuh sakit / gerai 6. Lebuh tusah / lebuh senang / lebuh takut 7. Lebuh deka interview 8. Lebuh deka nyaut peresa 9. dll Ba ayat ti katerubah kitai meda Tuhan Jesus udah bebendar besampi ke murid Iya. Ditu kitai ulih meda pengingin Tuhan Jesus meda nembiak Iya arap serta ngembuan pengawa besampi sekali ka dulu kelia diatu serta ia ti deka datai ila. Enggau pengawa Tuhan Jesus ti besampi tu mega nyadika teladan ngagai tuai-tuai dalam gerija ngulu ke pengawa besampi. Ngambi ka banding dalam gerija tu enti ngulu ke pengawa besampi sigi paderi kitai, enti nadai paderi bala pastoral team mega ulih ngulu ke kita dalam pengawa besampi kelebih agi ngulu ke sembiang hari minggu. Ba gerempung- gerempung ti mit tentu mega kitai bisi ketuai dalam ministri sida. Ngambi ka banding ba Men’s Fellowship kitai bisi chairman ti betuaika LR Boniface, ba Womens’s Fellowship kitai bisi chairlady betuai Mdm Yam Ladi, ba gerempung nembiak kitai bisi Miss Valarisia ketuai sida. Lalu ba gerempung-gerempung kebukai sida bisi chair person ulih ngulu ke sida ia dalam pengawa besampi. Endang patut ia sida tu orang ti tau dikarapka ngulu ka kitai dalam besampi. Lalu pagi tu legik kitai bisi Aum Besai Ninting Taun (AGM) ti ke-3 kala digaga kitai pengudah nyadi Parish. Kitai sama-sama besampi awak ka AGM kitai sekali tu bejalai enggau mujur ulih iring Allah Taala. Kitai mega minta bala ti
ngulu dalam sampi pinta besampi ka pengawa AGM kitai serta pengawa- pengawa kebukai mega. Taja piak dalam AGM sekali tu kitai nadai pengawa bepilih laban kitai udah bepilih ba taun 2022 nyin kemari. Lalu taun tu AGM kitai semina mantai ke report pengawa ti bisi digaga dalam tiap-tiap ministri sida. Kitai patut ia ngepun ke semua pengawa kitai enggau besampi. Nama kebuah kitai besampi? Kitai minta Tuhan ngiring semua pengawa kitai ngambi ka pengawa kitai ulih bejalai enggau manah. Ukai semina bejalai enggau manah, laban ulih pengawa ti manah dikerja kitai muliakaTuhan dipandang nengah tiap-tiap iko kitai. Amen menyadi…. Menyadi… Pengawa besampi tu ukai semina digaga kitai ba gerija aja. Ukai semina diuluka olih tuai-tuai dalam ministri dalam di gerija tu. Pengawa besampi tu patut ia bepun ari rumah. Apai indai ti nyadi ketuai dalam rumah patut ia nyadi ke teladan ngagai bala anak-anak kitai. Aku nemu mayuh mega bala apai indai bedau ulih ngulu ke sembiang dalam pengawa sida. Enti disuruh besampi merkatka utai empa lalu beserah-serah ngagai orang bukai. Piak meda dalam pengawa ngulu ke sembiang kebukai, maca bup kudus serta utai bukai; dia kitai selalu ninga 1001 macam alasan laban enggai serta malu disuruh besampi serta ngulu ke orang sembiang. Antara alasan paling popular “ehhh nadai ingat mai cermin mata tu”, nya suruh apai wat indai wat ngulu ke kitai sembiang ia nemu agi. Ba runding aku ba pengawa kitai besampi aku meda kitai bansa Iban jauh bendar kebelakang dalam pengawa besampi. Ukai aku deka ngemaruh ke bansa kitai tang utai tu ulih dipeda enggau mata kasar kitai. Uji kitai flashback @ merening ke belakang dalam pengawa besampi ti kala di enggau bala kita. Uji perati ka lebuh paderi besampi diak kitai kadang-kadang semina ninga nyawa paderi aja besampi. Engka semina siko dua aja bisi enggau besampi nya pan bala pastoral team ke enggau sida. Ia ke bukai semina diauuuu aja. Aku deka bekunsi enggu bala kita lebuh aku agi ngajar ba ulu baram ba taun 2007-2009 suba. Lebuh nya aku ngajar ba SK Long Sait. Enti
ba Baram nadai enda tampak rita menua tu. Menua ti pemadu ia tusah di tujah. Nyadi ba menua diwan menyadi kitai bebansa Penan. Sida sembiang ba pengarap SIB tauka BEM ko sida diatu. Aku tertarik serta terperansang ati meda sida ia ba pengawa besampi. Taja pan enda mereti ka jaku sida mula- mula ia kelia tang aku rindu meda gaya sida ia besampi. Enti ketuai sida ia nyebut aram kitai besampi dia kitai ulih nigga sida semua besampi enggau nyawa ti inggar. Nyadi tu jarang-jarang nyadi ba gerija kitai peda aku kelebih agik kitai ti megai pengarap Anglika. Enda aku malu nyebut utai tu ngambika kitai tau terperansang dalam pengawa besampi. Enti bisi pan, kitai bisi meda orang sama-sama besampi bebala mayuh engka bala sida enda mayuh. Engka nya udah ari tradisi pengarap kitai anglika. Enti paderi ngulu ke sembiang ia kebukai lalu diau. Tang ba penemu aku nadai salah lebuh besampi diak kitai sama-sama enggau nyawa ti inggar besampi lalu ba penutup sampi kitai diak ketuai ti ngulu ke sembiang ulih nutup ka sampi kitai. Nyadi tu siti agi mega deka dikunsi aku enggau bala kitai. Utai tu diajar bala paderi tauka bala pastoral team lebuh kitai belajar ba kelas betetap suba. Dia bala pastoral team bisi ngajar kitai cara nyambut sakramen. Lebuh bala paderi tauka sub deacon deka meri roti ngagai kita diak bala kami nyebut “tubuh enggau darah Kristus ngintu nuan dalam pengidup ti meruan”. tauka “tubuh enggau darah Kristus”…nama patut disebut bala kitai? Amen. Enti kita selalu sembiang hari minggu tentu mega kita ulih meda macam-macam ragam kelebih agi enti kita nya duduk enda milih endur. Tentu mega kitai duduk enda sama ninting minggu. Lalu lebuh kitai deka nyambut tubuh enggau darah kriatus tauka roti enggau wain tentu mega kitai ulih nigga mayuh macam saut ari bala kita. Ngambi ka banding “tubuh enggau darah Kristus ko paderi tauka subdeacon” bisinya mmm, auk, ya, nadai bunyi paling mayuh…ia ti bendar menyadi lebuh bala pastoral team nyadung ke kitai roti enggau wain diak kitai patut ia nyebut Amen. Dalam pengarap kitai kitai Kristian kitai percaya kitai nyambut tubuh enggau darah Kristus dalam pengidup kitai. Kelebih agi kitai percaya pemati Tuhan Jesus ba atas kayu regang mai keselamatan/pengelepas ngagai kitai orang Kristian ti arap ke ia. Lalu udah tu legik aku minta bala kita ti nyambut sakramen nyaut tauka
nyebut Amen enggau nyawa ti inggar. Lalu kita ti bedau ulih nyambut nya mansang ke mua lalu lebuh datai ba depan tu kita tau nunduk ke pala kita awak ka bala pastoral team ulih besampi ke bala kita. Menyadi… Gerija semina “rumah endur kitai besembiang” tauka building aja enti kitai enda bersembiang. Lalu nadai reti ba kitai orang Kristian enti kitai enda besembiang lebuh kitai datai ke gerija. Gerija ti bendar ianya kitai empu. Kitai empu ti patut ia besembiang dulu. Dalam ruang bilik kitai, patut ia kitai ti nyadi apai indai nya ngajar ana-anak kitai besembiang/besampi ba rumah. Nama kebuah kitai besembiang? 1. Awak ka tiap-tiap iko kitai kelebih agi anak-anak kitai ti benung ngangkat diri besai ngelela sapa Kristus, ngelala sapa Allah Taala ti bendar (John 17:3). 2. Awak ka Allah Taala meri perlindungan ngagai kitai serta awak ka sida ia enda disesatka olih sitan serta ajar ti palsu @ mengukuhkan iman. Enggau nya bala menyadi…aram kitai sama-sama mupuk ngemeran pengawa besampi dalam pengidup kitai. Tuhan Jesus udah meri teladan ti cukup ia manah ngagai kitai dalam pengawa besampi kelebih agi Iya udah ke bala sida murid ia. Sampi kitai ngagai Tuhan Jesus nya percuma menyadi sampi kitai nadai bebayar. Taja piak kena meh peluang udah tu kitai meruan besampi enggau komited dalam pengawa ti dikerja kitai bersari-sari. Enda rugi sesen pan tua enti tua nya besampi ninting ari. Rugi agi tua enti bisi bisness nyual barang tang barang tua enda abis dijual. Pengawa besampi tu ulih ngerapat ka kaul kitai enggau Allah Taala enggau lebih rapat. Baka ni tua ulih nemu kaul kitai enggau Allah Taala rapat?… Kitai deka berasai sunyi enti tua enda besampi, bisi asai ke kosong dalam pengidup kitai. Enti kita kala ngasai ditinggal ke orang ti berega dalam pengidup kitai baka nya asai ia lebuh kaul kitai enggau Allah Taala jauh. Sunyi serta kosong. Tang enti kaul tua enggau Allah Taala nya rapat taja pan kitai nya jauh, taja pan kitai nya kediri, lebuh kitai tusah, lebuh senang, lebuh sakit lebuh gerai kitai tentu kitai nemu tuhan
bisi enggau tua lalu enda ngelengka ka kitai. Amen menyadi… Aram kitai besampi. Terima kasih Tuhan ka jaku kunsi ti udah didinga kami nya tadi. Olih nuan ti udah nyadi ka teladan ke kami dalam pengawa besampi ajar kami besampi enggau ati ti baruh ngambika kami meruan besemak enggau nuan belama. Dalam nama Tuhan Jesus kami besampi. Amen