1 SAMBAYANG KOTIMPUUNAN Oi Jesus, sumamba zou Diau. Guminavo om monongkotohuod zou Diau tu’ minatai Ko sabap dogo. Mimang zou do koondom zou daa Diau tomoimo, om do oomdom ku daa ngaavi i sontob nimaan Nu. Nga atangkangau zou do kalaja ku ngaavi om kololoizan om suvai po. Iti no do saasau zou dii kohiiu Diau. Tumongob zou kozo oi Jesus. Tumanud zou Diau do baino do tumakad do nuhu do kalvari do mamalati tokuudi di nimaan Nu do minamadadi dogo do tanak do Kinoingan. Nung songuhun zou potuu kozo doid pomogunan, impio Ko’i do minimang daa do miaga dii. Songkuo o kogiiginovoo Nu dogo oi Jesus. Monongkotohuod zou Diau sabap do koginavaan Nu dogo. Ia’o zou no do tadautadau do mazo-gazo no daa o koginavaan Ku doid Diau.
2 KOUNDAANGAN KOISO UKUMON I JESUS DO PATAZON M: Sambaon za Iziau oi Kristus, om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi Jesus, poingkakat Ko no do doino do nagakom om mositi do patazon Ko ka di tuhun ngaavi tangalaat. Nga aiso i do hasa do nimaan Nu. Minimang Ko nopo di avasi doid dovokon do sohiihinaid Nu do doiti id pomogunan. Mositi ondomon ku tomoimo, do minatai Ko do sabap dogo, mooi do kakaa zou dii doid surga om asanang miampai Diau. (Poimizo toluu’ai) Ia’o zou oi Jesus, do ontok nopo do atandasan zou kokomoi do nunu noopo, sundung tu’ do poinhasa ii, nga, poimizo zou nopo daa miaga haid Diau, sabap guminavo zou Diau om mongki’oo’mit Diau. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Poingkakat id doos do salip, Mogiad Tina pointahib, Poimpapak o Tanak Dau.
3 KOUNDAANGAN KODUVO PASAANON I JESUS DO SALIP M: Sambaon za Iziau oi Kristus om pantangon za Iziau. S : Sabap mantad di salip Nu tobitua nokoponobus Ko do tuhun ngaavi. Oi Jesus, avagat kozo o salip do pasaanan Diau dioho. Songkuo nodii o kosiisinduoho Nu dino! Tu pointongkop ngaavi o ganit doid tinan Nu. Poingkuo Ko nodii dati do koovit do manaan dino salip tagazo do tumakad diho nuhu totungab. (Poimizo toluu’ai) Poondomo zou do hobi po do moninduo Diau o tikid-tikid douso ko ino salip tavagat. Om sabap Diau no do toimoon ku o kosusaan ngaavi gisom oikot o kapatazon ku. Mokiinsian zou dii Diau do monokodung dogo do manaan do salip ku miaga Diau, do monogit tokuudi do douso ku ngaavi. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Mongos-ongos ginavo Dau, Kotongob sabap tanak Dau, Sinuak no do padang.
4 KOUNDAANGAN KOTOHU KODUNSANGAN DI JESUS DO INSAN NOGI M: Sambaon za Iziau oi Kristus om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi Jesus, noikot nodii o minungkang om inuzan Nu do osomok no do au Ko kapanau, nga unsubon Ko vagu diho maamata ngaavi do mamanau. Au Ko’i kahaahaid om kasadu om kahaap Ko no, nga aiso no do tuutumamba po Diau toi ko avaavasi po do moboos Diau. (Poimizo toluu’ai) Songkuo nodii kohiihizabo ku do doiho zou po daa do popoiho Diau, do guminavo om osianan kozo Diau, tu douso ku no ngaavi o popodunsong om mamadaa Diau do ingkaa. Tumongob zou dii poogi, nga onuai zou po, oi Jesus, do grasia ngaavi do au nodii momidouso. M: Insiano zikoi oi Jesus, insiano zikoi. S : Om kosianai dagai tu nadaa Ko kozo. Osusa om osisi’an, Tokito Tina Kinoingan, Tabantug om tobitua.
5 KOUNDAANGAN KAAPAT KOTUKA I JESUS DI TINA DAU M: Sambaon za Iziau oi Kristus om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi Jesus, iisai iti i poingandad Diau do poingkakat doid lahan di avazaan Nu? I Tina Nu iho, i guminavo kozo Diau. Songkuo o kotootongobo dosido do kokito Diau do adaa Ko kozo. Aanangan daa zosido do zosido daa o maan dioho koozo do ingkaa ko Iziau po. Moboos po zosido nga au asaga iho maamata ngaavi; koponongkiboos nopo dii zosido Diau doid mato dau do maso Ko tumahib. (Poimizo toluu’ai) Oi Jesus, ia’o zou do guminavo kozo di Tina Nu Tobitua. Om iziau, oi Tina ku, pokiinsianai zou do au zou daa kotingkod do momusoou do toluo ngaavi di Tanak Nu, Jesus. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Minintong Tina do Tanak, Miad sabap pinapapak, Adahan do linuo.
6 KOUNDAANGAN KOHIMO TUMAMBA DI JESUS I SIMON DO SIRENE DO MANAAN DI SALIP M: Sambaon za Iziau oi Kristus, om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi Jesus, omungkang Ko toomod dii, do salip Nu po sondii nga au Ko dii koovit. Suu’o nodii diho maamata ngaavi i songuhun, i pungaanan do i Simon do tumamba Diau. Asaga zou daa nung i Simon zou daa mooi do katamba zou nodii daa Diau. (Poimizo toluu’ai) Nga ia’o zou do mingat do tumamba Diau do hobi podii do baino, ontok do monohuod zou dovokon sabap Diau. Om onuai zou no do graasia ngaavi do manaan do salip ku sondii om do tumaan om tumoboi do ontok osusa o ginavo ku. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Iisai tuhun amu miad, Nung Tina Kristus mogiad, Nosusa o ginavo.
7 KOUNDAANGAN KOONOM MOMIID I VERONICA DO VOOS DI JESUS M: Sambaon za Iziau oi Kristus om pantangon za Iziau. S : Sabap mantad di salip Nu tobitua nokoponobus Ko do tuhun ngaavi. Oi Jesus, natakapan do siovuk om zaa o voos Nu, om pininduhaan Ko po vagu do tuhun tangalaat. Mii’tii o zaa mantad siga do ugi doid tuhu Nu do humuzung doid mato Nu, do ontok pamadsut i Sangti Veronica di ginumuan tuhun om piido no dosido o voos Nu di sunduk dosido. Id koponongkotohuadan do kosiavan dosido dii, timpoono Nu no o vaza do voos Nu doid sunduk dii. (Poimizo toluu’ai) Ia’o zou do mingat, do au zou daa miho do oosizan moboos do Iziau no o sanganu dogo om tanak zou Diau. Nga onuai zou no do graasia ngaavi do au ku nodii ozomutan do douso ngaavi o koduduvo ku. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Tina Kristus poingintong zou, Om poingampai kosusaan Dau, Izou nogi tumongob.
8 KOUNDAANGAN KOTUU’ KODUNSANGAN DI JESUS KUMOINDUVO M: Sambaon za Iziau, oi Kristus, om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi, Jesus, hobi podii vagu o kadaa’an Nu do kodunsong diti baino ko’ di guhu i’ om hobi sinusa Nu do mingkakat. Sugagangon om maan Ko nogi dii paagab-agabo diho maamata ngaavi, sundung potuu do poingiho izioho do osomok no do au Ko kapanau. Oundoosi zou momuondom do songkuo no o kadaadaa’o Nu do nimangan, tu Iziau no i Tuhan om i Kinoingan ku. (Poimizo toluu’ai) Ia’o zou do mamalati, do songkuo o kalaalato do douso tu nadaa Ko toomod do monogit dii. Nga, onuai zou no do graasia ngaavi do mimang vasi do mantad baino om do tumanud do ponuu’an Nu ngaavi. M: Insiano zikoi, oi Jesus, insiano zikoi. S : Om kosianai no dagai, tu nadaa Ko kozo. Nookuo tu’ Jesus za matai, Nung okon ko sabap dagai, Do monogit douso za.
9 KOUNDAANGAN KAVAHU MOBOOS I JESUS DOID TONDU NGAAVI DO JERUSALEM M: Sambaon za Iziau, oi Kristus, om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi Jesus, kivaa do tondu ngaavi do songingingdad do doiho id disan di lahan do mintong Diau do maso ko tumahib. Noikot no zioho do tumongob do kokito Diau om iad nodii. Vosion Nu nogi dii do moboos dioho, om biisai Nu no do: “ada iad sabap dogo nga sabap diozu sondii om i tanak ngaavi diozu,” ka Nu, tu i no Johudi ngaavi o adaa, sabap do nakapamatai izioho Diau. (Poimizo toluu’ai) Ia’o zou do tumongob kozo do douso ku ngaavi, om okon ko sabap do oukum zou do kokomoi ngaavi dii, nga sabap no do moninduo Diau ngaavi ii. Nga, onuai zou no do graasia do au nodii momidouso. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Om nokito di Maria, Tanak Dau Jesus osusa, Mogimpapatai nodii.
10 KOUNDAANGAN KOSIZAM KODUNSANGAN DI JESUS KUMOINTOHU M: Sambaon za Iziau, oi Kristus om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi Jesus, iti no do touvi no kozo do kasadu Ko om kahaap Ko doid tana. Koingkakat Ko po nangku? Oonsitan Ko dino salip tu avagat kozo om sonsoosoou iho tuhun ngaavi ii songinghiput do nung apatai Ko toi ko au. Nga au i, imang Ko po vagu ingkakat do insan po do tuminakad diho nuhu do Kalvari. (Poimizo toluu’ai) Ia’o zou, do au zou daa atahou, sundung potuu do tomoimo zou do mimang do ii om ii o douso, nga tambaai zou do osikap zou vagu do mimozo Diau om tumanud do kaandak Nu. Onuai zou no do graasia ngaavi do humavan om magaha do koimbaazatan ngaavi do momidouso. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Oi Tina do koginavaan, Pokitoo zou katangaban, Dii id suang ginavo Nu.
11 KOUNDAANGAN KOOPOD IDUAN I JESUS DO BASAAN M: Sambaon za Iziau oi Kristus, om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi, Jesus, ahaid po dii om katampa Nu no iho nuhu do Kalvari, i kinoizonon do kapatazon Nu. Nohiputan ko do tuhun togumu; pongiakan Ko om intition Ko no dioho. Au koinsomok Diau i Tina Nu do songovian diho kookoluang Nu ngaavi. Vundaton toomod diho maamata tangalaat o basaan Nu om mubus vagu o zaa Nu. Miaga nopo do ogonitan Ko vagu do kumoinduvo. (Poimizo toluu’ai) Ia’o zou do popogiot do ginavo ku do mada daa do somoonu do munsikou, sabap nadaa Ko toomod sabap dogo, nga onuai zou no do graasia ngaavi do guminavo di tavasi om i sontob di doun surga. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Oi Maria, ajalo zou, Guminavo Jesus tokou, Om au nodii humavan.
12 KOUNDAANGAN KOOPOD OM ISO PAPAPAKON I JESUS DOID SALIP M: Sambaon za Iziau, oi Kristus, om pantangon za Iziau. S : Sabap mantad di salip Nu tobitua, nokoponobus Ko do tuhun ngaavi. Oi Jesus, papapakon nodii dioho o pahad Nu om hapap Nu doid salip. Tobokon ku nogi do totombi o tuntuu ku om oluahan zou no. Doolu podii kozo Diau do topiumanan tu paku. Biisan Ko nopo diho maamata om mimozo Ko no, om au Ko guugumaga po. Izou diti, impio zou do gumaga do ontok kivaa ponuu’an dogo do mimang di touhan. (Poimizo toluu’ai) Ia’o zou do mimozo kozo, tu minimozo Ko kozo di maso Ko do papapakon doid salip. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Maria, Tina Tobitua, Papapako ginavo za, Id salip di Jesus za.
13 KOUNDAANGAN KOOPOD OM DUVO MATAI I JESUS DOID SALIP M: Sambaon za iziau oi Jesus om pantangon za Iziau. S : Sabap mantad di salip Nu tobitua , nokoponobus Ko do tuhun ngaavi. Oi Jesus, poingini Ko nodii doid salip do mogimpapatai. Mogimpapatai Ko sabap dogo do mooi do adadi zou do tanak do Kinoingan om kougad nodii doid surga. Au Ko ohodong do tuhun tangalaat, i mamatai Diau. Pinohiong Nu ngaavi izioho om mokiinsian Ko di Ama Nu do popohiong dioho. Muhi nodii iho tuhun ngaavi. Tumongob dati o vookon dioho. I Tina Nu Tobitua om kookoluang Nu ngaavi songingkakat do poindoos do salip. (Poimizo toluu’ai) Aanangan zou daa do nakaamung zou dioho. Tumimpoon zou daa do doiho dii gisom do opupusan, do popokito do songkuo o kogiiginovoo ku Diau. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Tanak Nu aiso kahasaan, Sabap douso nogonitan, Boogizai zou linuo.
14 KOUNDAANGAN KOOPOD OM TOHU POSINDOU’ON NODII I TINAN DI JESUS MANTAD SALIP M: Sambaon za Iziau oi Kristus om Pantango za Iziau. S : Sabap mantad di salip Nu tobitua nokoponobus Ko do tuhun ngaavi. Oi Jesus, aiso nodii do giiginonsok po do poinghiput do salip. Nongokouhi no i tuhun ngaavi, nga kakaal po di vookon maamata om i Tina Nu miampai di kookoluang Nu ngaavi do minogovit do tukad, om toodoo i’ dioho do pinopoinsiibo do tinan Nu, om pokibitai Ko no dioho di Tina Nu Tobitua. Om osusa nodii o ginavo di Tina Nu do kokito di siga do ugi om i paku ngaavi om i ganit Nu ngaavi. (Poimizo toluu’ai) Ia’o zou do monginsasamod di Tina Nu, do au zou nodii popooposusa po Diau sabap di douso Ku ngaavi, nga onuai zou no do graasia ngaavi do popotundun Disido do koimaan ku ngaavi tangavasi. M: Insiano zikoi oi Jesus, insiano zikoi. S : Om kosianai no dagai tu nadaa Ko kozo. Au zou tumingkod do miad, Jesus napatai do talaat, Om Maria osusa.
15 KOUNDAANGAN KOOPOD OM APAT HOBONGON I TINAN DI JESUS M: Sambaon za Iziau oi Kristus, om pantango za Iziau. S : Sabap mantad di salip Nu tobitua, nokoponobus Ko do tuhun ngaavi. Oi Jesus, posuangon Ko nodii doid hobong. Nohiungan no ngaavi o ganit Nu om nohopot Ko no do kain tohidang. Hobongon Ko nodii do Minsosodop. Doid kabun di tosomok, kivaa do pamahabangan do doiho id pampang. Oviton Ko nodii dioho. Ii’iti po o kokitanan Diau di Tina Nu Tobitua. Ingkuo dati zosido do kataan do popotongkizad Diau? Nga Koikot nopo o kotohu tadau, oi Jesus, tumungag Ko no vagu do mantad poimpatai do avanus dii om aazou kozo do muhi do doiho id surga, do au nodii adaadaa po. (Poimizo toluu’ai) Ia’o zou do momuondom tomoimo do kaandasan om kounsikaan ngaavi Do surga. Tambaai zou no do guminavo kozo Diau, om apatai zou nopo dii nga, asanang zou nodii do miampai Diau selajul. M: Insiano zikoi oi Jesus, insiano zikoi. S : Om kosianai no dagai, tu nadaa Ko kozo. Songian tinan matai daa, Paradisum onuai daa, Maria, ada hivai.
16 SAMBAYANG KOOVIAN Oi Jesus, mooi do apasi o tuhun ngaavi, mininsiibo Ko do doiti id tana do mantad surga, om ogumu o kinosusaan om kinadaa’an Nu. Au pinopoduli Diau i Johudi ngaavi. Ginakom Ko om kinagasan do balantai om ovito Ko no doid di Padri Tagazo om doid di Pilatus do mangan poimamango, soosongio om posuto. Ogumu po i kinadaa’an Nu do suvai, om touvi nopo nga ukumo Ko no do patazon do papapakon doid salip. Oi Jesus, mantad di kinadaa’an Nu ngaavi tongobitua om mantad di salip om i kinapatazon Nu, pahapaso zou no do mantad kosusaan do nalaka, om ovito zou no do kumaa doid surga do asanang do selajul do doiho. Amen. (“Tama Za” om “Ave Maria”)