Impohon kesusasteraan boros Kadazandusun

Impohon Kesusasteraan Boros
Kadazandusun

Bryon Johnius

Tangon
Susuyan di Kilau om Tombolog

Id iso kinoyonon id puru haro duo tayam di mogiambalut tomod, tayam
nopo diti roitan sabaagi do I ombolog om I kilau. Miruba kasari I ombolog om
I kilau ponong sosodopon do mingkono-kono. Togodon kasari I kilau do tama
dau tu koligogon mimpanau sosodopon loloobi po do dumarun nga au I kilau
mokinongou boros tama dau. Ogumu ponuhuan di tama di kilau kumaa di
kilau nga au no owonsoi tu tingkananon do moi ansau hilo id di ombolog.

Insan tadau, angatan di molohing di kilau I kilau moi pogihum taakanon hilo puru tu oruhai
no dumontol timpu gompus om kopomusorou molohing di kilau do mogihum om
monimung mantad taakanon tu apagon no mogihum soira abantalan timpu gumompus.
Pomusorou no I kilau “ama au oku moi tanud mogihum taakanon tu moi oku ambalut di
ombolog” ka boros di kilau kumaa tama dau. Simbar no tama di kilau “kada ongoi hilo
baino tu mogihum tokou taakanon, nung au nopo nga owingkat tokou” ka tama di kilau.
Mulong po do nosunudan I kilau nga au I kilau opusou om au mokinongou, pamanau nopo
I kilau minongoi hilo di ombolog miampai do mosinding do “owingkat, owingkat isai nopo
owingkat”. Osindualan podi ginawo i tama di kilau tu au I kilau mokinongou.

Korikot I kilau hilo id di ombolog om pimboros no I kilau “ombolog nunu
minaan nu tu ohuyan kopio do okitoku” ka di kilau kumaa di ombolog. Simbar I
ombolog nga “monguhup oku do molohingku mogihum taakanon tu oruhai no
abantalan timpu gumompus”. Mangangat di I kilau di ombolog do mingkono-kono
nga au I ombolog kaampayat tu monguhup molohing dau. Oruol ginawo di kilau
tu au I ombolog tumanud dau do mingkono-kono om pamanau di I kilau do muli.

Id pintangaan do ralan di kilau muli nga haro iso usukon di alawa om osinggawa id
disan do bawang, poinrikau di I kilau id usukon di miampai mosinding do “isai
mambalut di kilau, aiso”. Oruol di kaka ginawo di kilau tu aiso tambalut. Au no alaid
nga moris-poris no darun nga au oontok I kilau tu hiri poingusuk. Korongou kaka I kilau
do tuni do mokiuhup “uhupai-uhupai oku” kaka di tuni mimboros norongou di kilau.
Ngoyo di kilau intangai nga tama dau norulun no id bawang sabap nawagatan do
taakanon nga au po kopio lumiud bawang. Pomusorou I kilau om arau-arau do
minongoi pokiuhup di ombolog.

Korikot no I ombolog om I kilau hiri bawang nga okito diolo do aiso no tama di kilau
hiri bawang. Muru-turu podi romou mato di kilau mogihum kinoyonon om
momolohou tama dau. “ama, hinonggo ko” ka podi di kilau mogihum tama dau id
disan-disan do bawang nga aiso simbar tama di kilau. Tulud I ombolog om kokito no
dau tama di kilau do poingigit do roun tokoro di oruhai no ohurak om marau-arau po
kaka I ombolog minongoi roun di agayo maan do sasakayon di tama di kilau. Patahako
kaka di ombolog I roun di om sakayo no do tama di kilau om ginayat di ombolog gisom
nokoongoi hiri disan do bawang. Tuminilombus I kilau do minongoi piruba do tama
dau miampai minongoi usuk hiri usukon moi do au odorunan. Ounsikou tomod ginawo
tama di kilau kumaa di ombolog tu agayo kouhupan dau.

Id usukon di, mihad-ihad po di i kilau do poingapus tama dau om pimboros
di i kilau do “ama, tumanud oku boros nu om pantangonku ika sogigisom tu
au oku koilo poingkuro koposionku soira aiso ko hiti pomogunan” ka di kilau.
Mantad nodi di nga tumanud kasari I kilau boros do tama dau om abagos di I
kilau monguhup tama dau.

Ponontudukan

Gompion tokou molohing
sogigisom tu manahak do
ralan koposion di osonong
om mokinongou kumaa
molohing tu lobi ogumu
toilaan kokomoi koposion

di otoguangan.

HIIS
(SUDAWIL)

Mamanau I Apa, Kada tokou lihuai,
Mogihum koburuon, Pason do molohing,
Poposurut no dahai, Woyo di olinuud,
Popoburu koposion. Monokodung do poimpasi.

Mamanau I Ama, Gompion tokou molohing,
Mogihum do taakanon, Tu manahak koposion,
Au nogi ababasan, Molohing kalangadan,
Monuduk do koposion. Upuson id ginawo.